ក្រសួងអប់រំសុំស្នើម្ចាស់ផ្ទះសំណាក់-សណ្ឋាគារ កុំឡើងថ្លៃនៅថ្ងៃប្រឡងបាក់ឌុប

ជាតិ

ក្រសួងអប់រំសុំស្នើម្ចាស់ផ្ទះសំណាក់-សណ្ឋាគារ កុំឡើងថ្លៃនៅថ្ងៃប្រឡងបាក់ឌុប

21, Aug 2017 , 9:27 am

រូបភាព

ដោយ:

ភ្នំពេញ៖ ក្រសួងអប់រំ យុវជន និងកីឡា បានស្នើដល់គ្រប់អភិបាលខេត្ត-រាជធានី ឲ្យជួយសម្រួលដល់បេក្ខជនប្រឡងបាក់ឌុប នៅពេលពួកគេទៅស្នាក់នៅទីរួមខេត្ត និងរាជធានីក្នុងថ្ងៃទី២១-២២ ខែសីហា ដែលជាកាលបរិច្ឆេទប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)ឆ្នាំ២០១៧។ នេះបើតាមសេចក្តីជូនដំណឹង ដែលបានផ្សព្វផ្សាយនៅថ្ងៃទី៣ ខែសីហា។

ខណៈការប្រឡងបាក់ឌុបនឹងរៀបចំនៅគ្រប់ទីរួមខេត្តទាំង២៤ និងរាជធានីភ្នំពេញ ក្រសួងអប់រំស្នើដល់អភិបាលខេត្ត និងរាជធានីទាំងអស់ ជួយសម្រួលដល់បេក្ខជនប្រឡងបាក់ឌុប ដូចជា៖ សម្រួលជាមួយម្ចាស់ផ្ទះសំណាក់ ឬសណ្ឋាគារ កុំឡើងថ្លៃនៅថ្ងៃ២១-២២ ខែសីហា ដែលថ្ងៃប្រឡងបាក់ឌុប ជួយសម្រួលចរាចរណ៍ ត្រួតពិនិត្យប្រព័ន្ធអគ្គិសនីនៅតាមមណ្ឌលប្រឡង និងសម្រួលដល់បេក្ខជនអាចស្នាក់វត្ត ដែលជិតមណ្ឌលប្រឡងជាដើម។

ការស្នើនេះ គឺធ្វើឡើងដើម្បីសម្រួលដល់បេក្ខជន មាតាបិតា និងអាណាព្យាបាលរបស់បេក្ខជន ដែលនឹងមកស្នាក់នៅទីរួមខេត្ត និងរាជធានីចាប់តាំងពីថ្ងៃមុនប្រឡងមួយថ្ងៃ រហូតការប្រឡងបានបញ្ចប់។

សូមបញ្ជាក់ថា ការប្រឡងមធ្យមសិក្សាទុតិយភូមិ(បាក់ឌុប)នៅឆ្នាំ២០១៧ នឹងប្រព្រឹត្តទៅនៅថ្ងៃទី២១ ខែសីហាខាងមុននេះ ដោយមានបេក្ខជនប្រឡងចំនួន ១០៣,១១២ នាក់ មណ្ឌលប្រឡងចំនួន១៧៨ ។ លទ្ធផលប្រឡង នឹងប្រកាសនៅថ្ងៃទី១២ ខែកញ្ញា សម្រាប់មណ្ឌលនៅភ្នំពេញ និងខេត្តកណ្តាល និងនៅថ្ងៃទីទី១៣ ខែកញ្ញា សម្រាប់មណ្ឌលនៅបណ្តាលខេត្តផ្សេង៕