នៅក្មេងចូលចិត្តបិតតែមលេងសោះឥឡូវលោក ណារិទ្ធ បើកហាងបិតតែម រកចំនូលបានរាប់ពាន់ដុល្លារ

ជាតិ

បទយកការណ៍ / បទសម្ភាសន៍

រថយន្ត

07, Aug 2017 , 8:59 pm

រូបភាព

ដោយ:

ភ្នំពេញ៖ លោក សុផា ណារិទ្ធ ម្ចាស់ហាង Zoom Sticker បានអះអាងថា កាលលោកនៅក្មេង លោកមានចំណង់ចំណូលចិត្តលេងបិតតែមម៉ូតូ ឬទូរសព្ទដៃ គ្រាន់តែជាការកម្សាន្តប៉ុណ្ណោះ។ ប៉ុន្តែដល់ពេលធំដឹងក្តី លោកក៏បានទៅរៀនបិតតែមពីម្ចាស់ហាងមួយ ដើម្បីក្រេបយកចំណេះទាំងនេះ មកបើកហាងរកស៊ីដោយខ្លួនឯង។ ទីបំផុតបំណងប្រាថ្នារបស់លោក ក៏បានសម្រេច។ បច្ចុប្បន្នអាជីវកម្មរបស់លោក កាន់តែរីកចម្រើន រហូតមួយខែ លោកអាចរកចំណូលបានរាប់ពាន់ដុល្លារអាមេរិក។

លោក សុផា ណារិទ្ធ បានកែប្រែចំណង់ចំណូលចិត្តពីក្មេងៗ ដែលចូលចិត្តលេងបិតស្កុត ឬតែមទៅលើឧបករណ៍ផ្សេងៗដូចជា ទូរសព្ទដៃ ឬម៉ូតូជាដើម ទៅជាបើកហាងបិតតែមមួយនៅក្បែរវិទ្យាល័យទួលទំពូង ដែលអាចរកចំណូលបានរាប់ពាន់ដុល្លារក្នុងមួយខែ។ លោកនិយាយថា៖«ពីមុន ខ្ញុំចូលចិត្តបិតទូរសព្ទលេង ចូលចិត្តបិតម៉ូតូលេងតិចៗ តែមិនមែនជំនាញអីទេ។ ដល់ពេលមួយ ខ្ញុំមើលឃើញថាល្អ ក៏រត់ទៅរៀននៅហាងផ្សេង ដែលគេបើកហាងបិតតែមហ្នឹងដែរ។ ក្រៅពីរៀនបិតតែម ឬកាត់តែម ខ្ញុំមានជំនាញឌីស្សាញខ្លះៗហើយ។ ពេលរៀនរួច ខ្ញុំចង់បើកហាងខ្លួនឯង»។

ខណៈម៉ូតូនៅកម្ពុជាបច្ចុប្បន្នបានកើនឡើងរហូតដល់ ៣,៣ លានគ្រឿង និងរថយន្តមានចំនួន៥សែនគ្រឿង គេសង្កេតឃើញថា អាជីវកម្មបិតតែមម៉ូតូឡាន ត្រូវបានគេបង្កើតព្រោងព្រាតផងដែរ ដើម្បីបំពេញតម្រូវការនៃកំណើនយានយន្ត។

លោក សុផា ណារិទ្ធ ម្ចាស់ហាងបិតតែម Zoom Sticker ដែលបច្ចុប្បន្នមានបុគ្គលិកជាង១០នាក់ហើយនោះ បាននិយាយថា តម្លៃបិតតែមឡានមួយគ្រឿង សម្រាប់ប្រភេទការពារឆូត មានតម្លៃចាប់ពី២០០ដុល្លារ ទៅ១,៥០០ដុល្លារ។ ចំណែកកញ្ចក់ការពារពន្លឺព្រះអាទិត្យមានតម្លៃចាប់ពី៦០ដុល្លារ ទៅ៤០០ដុល្លារ។ រីឯប្រាក់ចំណូលវិញ ត្រូវបានបុរសមាឌដំបងរូបនេះ បង្ហើបឲ្យដឹងដូច្នេះថា៖«ក្នុងមួយថ្ងៃ ខ្ញុំអាចរកប្រាក់ចូលហាង បានពី៣០០ដុល្លារ ទៅ៥០០ដុល្លារ ឬដល់១០០០ដុល្លារ» ។

សូមអញ្ជើញស្តាប់បទសម្ភាសរវាង លោក រ៉ឹម ភារី អ្នកយកព័ត៌មានរបស់គេហទំព័រថ្មីៗ ជាមួយ លោក សុផា ណារិទ្ធ ដូចតទៅ៖