ជាតិ
បន្ទប់ស្ថានការណ៍អាចបន្តសកម្មភាពបានទៀត ឬយ៉ាងណា? រដ្ឋាភិបាលកំពុងពិចារណា
× ភ្នំពេញ៖ ក្រសួងមហាផ្ទៃ កំពុងតែពិចារណាថា គួរអនុញ្ញាឲ្យបន្ទប់ស្ថានការណ៍ បន្តសកម្មភាពទៅមុខទៀត រហូតដល់ការបោះឆ្នោត ក្នុងឆ្នាំ២០១៨ ឬក៏បញ្ជាឲ្យបញ្ឈប់។ សមាជិកមួយរូបនៃបន្ទប់ស្ថានការណ៍ អះអាងថា បន្ទប់ស្ថានការណ៍ នឹងធ្វើតាម ប្រសិនបើក្រសួងមហាផ្ទៃ ស្នើឲ្យបញ្ឈប់សកម្មភាព។
រដ្ឋាភិបាល មិនពេញចិត្តសោះឡើយចំពោះបន្ទប់ស្ថានការណ៍ ដែលបង្កើតឡើងដោយបណ្តុំអង្គការជាង៤0 នៅកម្ពុជា ដើម្បីចូលរួមតាមដាននិងឃ្លាំមើលការបោះឆ្នោត។ រដ្ឋាភិបាល ប្រហែលជាមិនអនុញ្ញាត ឲ្យបន្ទប់ស្ថានការណ៍នេះ បន្តសុពលភាពរបស់ខ្លួន ដើម្បីតាមដានការបោះឆ្នោតជ្រើសរើសតំណាងរាស្ត្រ នាអាណត្តិទី៦ ក្នុងឆ្នាំ២0១៨ នោះទេ។
លោក លោក ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់សារព័ត៌មានថ្មីៗថា ក្រសួងមហាផ្ទៃ នឹងចេញលិខិតផ្លូវការ ក្នុងពេលឆាប់ៗនេះ ដើម្បីបញ្ជាក់ថា ឲ្យបន្ទប់ស្ថានការណ៍ ដំណើរបន្តទៀត ឬក៏បញ្ជាឲ្យបញ្ឈប់។ ប៉ុន្តែ លោក ខៀវ សុភ័គ សន្និដ្ឋានជាមុនថា ក្រសួងមហាផ្ទៃ ប្រហែលជាបញ្ជាឲ្យបញ្ឈប់ ច្រើនជាងឲ្យបន្ត។
ទីមួយ បន្ទប់ស្ថានការណ៍ ត្រូវបានចម្លងពីបរទេសទាំងស្រុង។ ទីពីរ បន្ទប់ស្ថានការណ៍ ធ្លាប់ផ្សព្វផ្សាយព័ត៌មានមិនពិត ដូចជាលើកឡើងថា ទឹកខ្មៅ ដែលប្រើប្រាស់សម្រាប់ការជ្រលក់ចង្អុលដៃ ពេលបោះឆ្នោត អាចលុបជ្រះជាដើម ដែលធ្វើស្ថានភាពច្របូកច្របល់។ ទីបី បន្ទប់ស្ថានការណ៍ ហាក់មានជំហរដូចនឹងគណបក្សសង្គ្រោះជាតិ ដែលបានសេចក្តីថ្លែងការណ៍ ដើម្បីរិះគន់ដំណើរការនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ កន្លងទៅ។ ទីបួន កម្ពុជា ធ្លាប់ឆ្លងកាត់ការបោះឆ្នោតច្រើនលើកមកហើយ ដោយមិនចាំបាច់មានបន្ទប់ស្ថានការណ៍។លោក ខៀវ សុភ័គ បានលើកឡើងនូវហេតុផលទាំងបួនខាងលើ ដែលក្រសួងមហាផ្ទៃ ប្រហែលជាតម្រូវឲ្យបន្ទប់ស្ថានការណ៍ បញ្ឈប់សកម្មភាបរបស់ខ្លួន។
អ្នកនាំពាក្យក្រសួងមហាផ្ទៃរូបនេះ បញ្ជាក់យ៉ាងដូច្នេះថា៖«បង្កើតបន្ទប់ស្ថានការណ៍ហ្នឹង អត់ប្រយោជន៍ទេ នាំតែមានបញ្ហាវិញទេ។ ឲ្យពួកគាត់ទុកលុយ ជួយប្រជាពលរដ្ឋ ដែលកំពុងមានបញ្ហា ដូចទឹកជំនន់ ជាដើម ប្រសើរជាង។ ហើយម្យ៉ាងទៀត គណៈកម្មាធិការជាតិរៀបចំការបោះឆ្នោត មានយន្តការគ្រប់គ្រាន់ហើយ សម្រាប់ការរៀបចំការបោះឆ្នោត។ នេះ ជាការយល់ឃើញរបស់ខ្ញុំ មិនមែនជាជំហររបស់ក្រសួងមហាផ្ទៃទេ»។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (និកហ្វិក) ហើយក៏ជាសមាជិកមួយរូបរបស់បន្ទប់ស្ថានការណ៍ បានប្រាប់សារព័តមានថ្មីៗថា បន្ទប់ស្ថានការណ៍ នឹងមិនប្រឆាំងនោះទេ ប្រសិនបើក្រសួងមហាផ្ទៃ ស្នើឲ្យបញ្ឈប់សកម្មភាព។ លោក និយាយដូច្នេះថា៖«បើមិនឲ្យបង្កើត យើងក៏មិនបង្កើតដែរ កុំឲ្យក្រសួងមហាផ្ទៃ ថាយើងប្រឆាំងនឹងសេចក្តីសម្រេចរបស់រដ្ឋាភិបាល។ យើង នឹងបំបែកគ្នា ហើយទៅធ្វើតាមអង្គការរៀងៗខ្លួនវិញ»។
លោក សំ គន្ធាមី យល់ឃើញថា សេរីភាព ពាក់ព័ន្ធនឹងការបោះឆ្នោត នឹងត្រូវបានរឹតត្បិតតិចតួចបន្ថែមទៀត ប្រសិនបើក្រសួងមហាផ្ទៃ ចេញលិខិតជាផ្លូវការ ដើម្បីតម្រូវឲ្យបន្ទប់ស្ថានការណ៍ បញ្ឈប់សកម្មភាពមែននោះ។ យ៉ាងណាក៏ដោយចុះ លោក អះអាងថា អង្គការនានា អាចនឹងបន្តសហការ ដើម្បីធ្វើការរួមគ្នាដដែល ពាក់ព័ន្ធនឹងការបោះឆ្នោត នាពេលខាងមុន។ ប៉ុន្ត លោក បញ្ជាក់ថា ការចងក្រងជាបណ្តុំរវាងអង្គការលើកក្រោយ មានទម្រង់ផ្សេង ពោលគឺមិនមែនមានឈ្មោះជាបន្ទប់ស្ថានការណ៍ដដែល នោះទេ។
ជាចុងក្រោយ លោក សំ គន្ធាមី បានឆ្លើយតបនឹងលោក លោក ខៀវ សុភ័គ ដែលថាជំហររបស់បន្ទប់ស្ថានករណ៍ និងគណបក្សសង្គ្រោះជាតិ មានលក្ខណៈដូចគ្នា។ ប្រធាននិកហ្វិក រូបនេះ អះអាងថា ការចេញនូវសេចក្តីថ្លែងការណ៍របស់បន្ទប់ស្ថានការណ៍ គឺដើម្បីសរសើរពីការបោះឆ្នោត ដែលដំណើរការទៅដោយរលូន និងមានលក្ខណៈល្អប្រសើរ ដោយរិះគន់តែចំណុចអវិជ្ជមាននិងការខ្វះខាតមួយចំនួន ប៉ុណ្ណោះ។ លោក បញ្ជាក់ថា បន្ទប់ស្ថានការណ៍ មិនជាប់ពាក់ព័ន្ធអ្វីជាមួយគណបក្សសង្គ្រោះជាតិ ឡើយ។
កន្លងមក សម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សប្រជាជនកម្ពុជា បានប្រតិកម្មនឹងបន្ទប់ស្ថានការណ៍ ដែលរិះគន់ដំណើរការនៃការបោះឆ្នោត។ ប្រមុខរដ្ឋាភិបាលរូបនេះ បានស្នើឲ្យក្រសួងមហាផ្ទៃ ពិនិត្យឡើងវិញ ចំពោះភាពស្របច្បាប់របស់បន្ទប់ស្ថានការណ៍៕
Tag:
ក្រសួងមហាផ្ទៃ
បន្ទប់ស្ថានការណ៍
បញ្ឈប់សកម្មភាព
ខៀវ សុភ័គ
សំ គន្ធាមី
© រក្សាសិទ្ធិដោយ thmeythmey.com