ខួប ៥០ ឆ្នាំនៃការបង្កើតអាស៊ាន៖ កម្ពុជាប្តេជ្ញារួមជាមួយរដ្ឋសមាជិកអាស៊ានពង្រឹងសមាហរណកម្មឲ្យស៊ីជម្រៅ

ជាតិ

ខួប ៥០ ឆ្នាំនៃការបង្កើតអាស៊ាន៖ កម្ពុជាប្តេជ្ញារួមជាមួយរដ្ឋសមាជិកអាស៊ានពង្រឹងសមាហរណកម្មឲ្យស៊ីជម្រៅ

12, Aug 2017 , 10:02 am

រូបភាព

ដោយ:

ក្រសួងការបរទេសកម្ពុជា បានរៀបចំពិធីបង្ហូតទង់អាស៊ាន ដើម្បីអបអរខួបលើកទី ៥០ ឆ្នាំ នៃការបង្កើតអាស៊ាន។ នៅក្នុងពិធីនេះ លោករដ្ឋមន្ត្រីក្រសួងការបរទេស ប្រាក់ សុខុន បានប្តេជ្ញា នៅចំពោះអ្នកចូលរួមជាពិសេស មន្ត្រីទូតនៃបណ្តាប្រទេសសមាជិកអាស៊ាន ដើម្បីពង្រឹងសមាហរណកម្មឲ្យកាន់តែខ្លាំងឡើង។

កម្ពុជានឹងបន្តរួមដៃគ្នាជាមួយរដ្ឋសមាជិកអាស៊ានទាំងអស់ ដើម្បីពង្រឹង សហគមន៍ដែលមានសមាហរណកម្មឲ្យស៊ីជម្រៅ រឹងមាំ ដោយផ្តោតលើគោលដៅលើប្រជាជន និងយកប្រជាជនជាសំខាន់។ នេះជាការលើកឡើងរដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន នៅថ្ងៃទី ១១ ខែសីហា ក្នុងពីធីបង្ហូតទង់អាស៊ាន នៅទីស្តីការក្រសួងការបរទេសកម្ពុជា ដើម្បីអបអរខួបលើកទី ៥០ ឆ្នាំ នៃការបង្កើតអាស៊ាន។

នៅចំពោះមុខមន្ត្រីទូតនៃបណ្តាប្រទេសសមាជិកអាស៊ានដែលបានចូលរួមពិធីនេះ លោក ប្រាក់ សុខុន បញ្ជាក់យ៉ាងនេះថា៖«ការប្រឈមនានាគឺស្ថិតនៅទីនោះ សម្រាប់យើងក្នុងការធានាឲ្យបាននូវគុណភាពនៃសមាហរណកម្ម និងរក្សាឲ្យបាននូវតួនាទីស្នូលរបស់យើងក្នុងការជំរុញនិម្មាបនកម្មតំបន់ ក្នុងពេលដែលទិដ្ឋភាពនយោបាយ និងសេដ្ឋកិច្ចសកលកំពុងមានការប្រែប្រួល»។ ទោះបីជាយ៉ាងណា លោករដ្ឋមន្ត្រីមានជំនឿថា ការប្រឹងប្រែង ការរួមគ្នានៃរដ្ឋអាស៊ាន នឹងសម្រេចបាននូវសន្តិភាព និងវិបុលភាពដែលមនុស្សគ្រប់រូបទទួលបាន។

បើតាមលោក ប្រាក់ សុខុន នៅឆ្នាំ២០១៥ ពាណិជ្ជកម្មសរុបរបស់អាស៊ានស្ថិតនៅលំដាប់លេខបួន បន្ទាប់ពីចិន សហរដ្ឋអាមេរិក និងអាល្លឺម៉ង់ ហើយអាស៊ានបានទាក់ទាញការវិនិយោគដោយផ្ទាល់ពីបរទេស នូវទឹកប្រាក់ ១២១ពាន់លានដុល្លារ ពោលគឺស្មើនឹង ៧% នៃលំហូរវិនិយោគផ្ទាល់ពីបរទេសនៅលើពិភពលោក។