កីឡាជាតិ
ជាតិ
លោក ស៊ុន ចាន់ថុល បន្តជាប់ជាប្រធានសហព័ន្ធខ្មែរកីឡាហែលទឹក ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនក្នុងឱកាសចូលរួមមហាសន្និបាតរបស់សហព័ន្ធខ្មែរកីឡាហែលទឹក។ រូបភាពពីហ្វេសប៊ុកក្រសួងសាធារណការ និងដឹកជញ្ជូន
× រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានបន្តជាប់ជាប្រធានសហព័ន្ធខ្មែរកីឡាហែលទឹកអាណត្តិទី៦(២០១៧-២០២១) ក្រោយទទួលបានសម្លេងគាំទ្រច្រើនជាងគេពីការបោះឆ្នោតរបស់តំណាងក្លិប-សមាគម ដែលជាសមាជិករបស់សហព័ន្ធ។ ក្រោយទទួលបានតំណែងជាប្រធានក្នុងអាណត្តិថ្មី លោក ស៊ុន ចាន់ថុល ប្តេជ្ញាថា នឹងខិតខំប្រឹងប្រែងអភិវឌ្ឍន៍វិស័យកីឡានេះឲ្យកាន់តែរីកចម្រើនថែមទៀត។
លោកទេសរដ្ឋមន្ត្រី ស៊ុន ចាន់ថុល ដែលជាប្រធានសហព័ន្ធខ្មែរកីឡាហែលទឹកអាណត្តិទី៥ បានបន្តជាប់ឆ្នោតជាប្រធានសហព័ន្ធក្នុងអាណត្តិទី ៦ ក្រោយបានសម្លេងគាំទ្រ ១០០ ភាគរយក្នុងចំណោមតំណាងក្លិបសមាគមដែលជាសមាជិកចំនួន៥០ នាក់។ ជាមួយការប្តេជ្ញានឹងខិតខំប្រឹងប្រែងអភិវឌ្ឍន៍កីឡាហែលទឹកឲ្យកាន់តែមានភាពរីកច្រើន លោក ស៊ុន ចាន់ថុល ដែលជាប្រធានសហព័ន្ធខ្មែរកីឡាហែលទឹក បានជំរុញឲ្យសហព័ន្ធរៀបចំរបាយការណ៍ចំណាយចំណូលឲ្យបានច្បាស់លាស់សម្រាប់អាណត្តិថ្មីនេះ។
ដើម្បីអភិវឌ្ឍន៍វិស័យកីឡាហែលទឹកឲ្យកាន់តែរីកចម្រើនស្របតាមផែនការមេស៊ីហ្គេមលើកទី៣២ឆ្នាំ២០២៣ ដែលកម្ពុជាធ្វើជាម្ចាស់ផ្ទះ លោកប្រធានរូបនេះ បានជំរុញឲ្យកីឡាករកីឡាការិនីបង្កើនការហ្វឹកហាត់ឲ្យបានល្អ។ ទន្ទឹមនឹងនេះ លោករដ្ឋមន្ត្រី ក៏ប្រកាសឲ្យដឹងដែរថា សហព័ន្ធលោក នឹងខំស្វែងដៃគូឧបត្ថម្ភដើម្បីរៀបចំការប្រកួតឲ្យបានច្រើន ដើម្បីចម្រាញ់យកកីឡាករកីឡាការិនី ដែលមានសមត្ថភាពឲ្យចូលក្នុងក្រុមជម្រើសជាតិ និងបញ្ជូនកីឡាករទៅហ្វឹកហាត់នៅក្រៅប្រទេស ព្រមទាំងរៀបចំវគ្គបណ្តុះបណ្តាលដល់គ្រូបង្វឹក និងមន្ត្រីបច្ចេកទេស ជាដើម។
សមាជិកប្រតិបត្តិក្នុងអាណត្តិទី៦របស់សហព័ន្ធខ្មែរកីឡាហែលទឹកមានចំនួន១១រូបរួមមាន លោក ស៊ុន ចាន់ថុល ប្រធាន, លោក សំ បុណ្ណារិន, លោក គូ គឹមហៀក, លោក ជា ប៊ុនហេង និងលោក ហែម ចាន់លី អនុប្រធាន, លោក ហែម គីរី អគ្គលេខាធិការ, លោក នាង សូរិទ្ធិយ៉ា អគ្គលេខាធិការរង, អ្នកស្រី កើត ស៊ីវណ្ណ អគ្គហិរញ្ញឹក, លោក ហែម លំផាត់, លោក យ៉ែម បៃ និងលោក ពិន ច័ន្ទលាភ ជាសមាជិក៕
Tag:
ហែលទឹក
ស៊ុន ចាន់ថុល
© រក្សាសិទ្ធិដោយ thmeythmey.com