រថយន្ត
សាកលវិទ្យាល័យ៤នៅឥណ្ឌូណេស៊ី ចូលរួមក្នុងគម្រោងផលិតរថយន្តអគ្គិសនី លោក Muhammad Nasir រដ្ឋមន្ត្រីទទួលបន្ទុកផ្នែកបច្ចេកវិទ្យា ស្រាវជ្រាវ និងអប់រំជាន់ខ្ពស់នៃប្រទេសឥណ្ឌូណេស៊ី
× គ្រឹះស្ថានអប់រំថ្នាក់ឧត្តមសិក្សាចំនួន៤នៅក្នុងប្រទេសឥណ្ឌូណេស៊ី បានចូលរួមជាមួយរដ្ឋាភិបាលលើគម្រោងអភិវឌ្ឍន៍រថយន្តអគ្គិសនីថ្នាក់ជាតិ។ នេះបើតាមការផ្សាយរបស់ទីភ្នាក់ងារព័ត៌មាន Antara News។
លោក Muhammad Nasir រដ្ឋមន្ត្រីទទួលបន្ទុកផ្នែកបច្ចេកវិទ្យា ស្រាវជ្រាវ និងអប់រំជាន់ខ្ពស់នៃប្រទេសឥណ្ឌូណេស៊ី បានបញ្ជាក់ថា សាកលវិទ្យាល័យចំនួន៤រួមមាន Sebelas Maret University, Universtiy of Indonesia in Depok, Bandung Institute of Technology និង November 10 Institute of Technology បានចូលរួមក្នុងគម្រោងអភិវឌ្ឍន៍រថយន្តអគ្គិសនីនៅក្នុងប្រទេស។
តាមការផ្សាយរបស់ Antara News លោក Muhammad Nasir បានលើកឡើងថា៖ «យើងបានកំណត់ផែនការអភិវឌ្ឍន៍រហូតដល់ឆ្នាំ២០២០ ដោយបង្កើតឲ្យបានទូលំទូលាយទូទាំងប្រទេសនូវរោងចក្រផលិតរថយន្តថ្នាក់ជាតិ ហើយចាប់ផ្តើមដំណើរការដាក់លក់នៅឆ្នាំ២០២០តែម្តង»។
ក្រសួងថាមពល និងធនធានរ៉ែ ដែលសហការលើគម្រោងនេះដែរនោះ ការអភិវឌ្ឍន៍រថយន្តអគ្គិសនី គឺជាការប្តេជ្ញាចិត្តខ្ពស់របស់រដ្ឋាភិបាលឥណ្ឌូណេស៊ី ក្នុងការគាំទ្រថាមពលស្អាត និងប្រយុទ្ធប្រឆាំងនឹងការបំរែបំរួលអាកាសធាតុ៕
© រក្សាសិទ្ធិដោយ thmeythmey.com