ជាតិ
សម្តេច ហ៊ុន សែន គ្រោងបង្កើតកងពលថ្មើរជើងថ្មីមួយនៅស្ទឹងត្រែងដើម្បីពង្រឹងទំនាក់ទំនងជាមួយឡាវ រូបភាពពីហ្វេសប៊ុក សម្តេច ហ៊ុន សែន
× ភ្នំពេញ៖ តាមរយៈទំព័រហ្វេសប៊ុក សម្តេច ហ៊ុន សែន នាយករដ្ឋមន្ត្រីកម្ពុជា បានបង្ហាញគោលបំណងក្នុងការបង្កើតកងពលតូចថ្មើរជើងថ្មីមួយទៀត នៅខេត្តស្ទឹងត្រែង។ លើសពីនេះ សម្តេច ថែមទាំង ចង់ដាក់ទីតាំងកងទ័ពជើងទឹក ឲ្យប្រចាំការនៅខេត្តស្ទឹងត្រែង ផងដែរ។
សម្តេច ហ៊ុន សែន បានសរសេរលើទំព័រហ្វេសប៊ុកយ៉ាងនេះថា៖«ការរៀបចំទាំងអស់ មិនសំដៅធ្វើសង្គ្រាមជាមួយប្រទេសជិតខាងនោះទេ តែសំដៅលើ កិច្ចការពារជាតិ ការពារប្រជាជន និងទំនាក់ទំនងល្អជាមួយប្រទេសជិតខាង»។
សម្តេច ហ៊ុន សែន បានបង្ហាញគោលបំណងខាងលើ ក្នុងពេលធ្វើដំណើទៅសួរសុខទុក្ខកងទ័ព ដែលមានទីបញ្ជាការដ្ឋានក្នុងខេត្តស្ទឹងត្រែង នៅព្រឹកថ្ងៃទី១៦ ខែសីហា ឆ្នាំ២0១៧នេះ។ សម្តេច បានបញ្ជាក់ថា ការចុះទៅនាពេលនេះ គឺដើម្បីពិនិត្យនិងដោះស្រាយការលំបាករបស់កងកម្លាំងប្រដាប់អាវុធ នៅទីនោះ។
សូមបញ្ជាក់ថា ថ្មីៗនេះ កម្ពុជានិងឡាវ មានបញ្ហាព្រំដែនជាមួយគ្នា ដោយសារតែកងទ័ពឡាវ បានចូលមកឈរជើងក្នុងតំបន់ក្បែរអូរអាឡៃ និងតំបន់អូរតាងាវ ព្រំដែនខេត្តស្ទឹងត្រែង។ ប៉ុន្តែ បញ្ហានេះ បានស្ងប់រម្ងាប់ទៅវិញ ក្រោយសម្តេច ហ៊ុន សែន ចរចាជាមួយលោក ថោងលន់ ស៊ីសូសីត នាយករដ្ឋមន្ត្រីឡាវ។ នាយករដ្ឋមន្ត្រីឡាវ បានបញ្ជាឲ្យដកកងទ័ពរបស់ខ្លួន ចេញពីទឹកដីកម្ពុជា៕
Tag:
សម្តេច ហ៊ុន សែន
បង្កើតកងទ័ព
© រក្សាសិទ្ធិដោយ thmeythmey.com