កម្ពុជារងឥទ្ធិពលសម្ពាធទាបពីសមុទ្រចិនខាងត្បូងដែលធ្វើដំណើរឆ្លងកាត់វៀតណាម

ជាតិ

កម្ពុជារងឥទ្ធិពលសម្ពាធទាបពីសមុទ្រចិនខាងត្បូងដែលធ្វើដំណើរឆ្លងកាត់វៀតណាម

17, Aug 2017 , 7:59 am

រូបភាព

រូបភាពពីហ្វេសប៊ុកក្រសួងធនធានទឹក

ដោយ:

ក្រសួងធនធានទឹក និងឧតុនិយម បានចេញសេចក្ដីប្រកាសនៅថ្ងៃទី១៦ ខែសីហា ឆ្នាំ២០១៧ ថា បន្ទាប់ពីបានធ្វើការអង្កេត តាមដានលើអាកាសធាតុរួចមក កម្ពុជានឹងរងឥទ្ធិពលសម្ពាធទាបមួយពីសមុទ្រចិនខាងត្បូង។ សម្ពាធទាបនេះនឹងធ្វើដំណើរមកដល់វៀតណាម(ភាគខាងត្បូង) នៅថ្ងៃទី១៧ ខែសីហា ហើយមានឥទ្ធិពលមកលើកម្ពុជា រហូតដល់ថ្ងៃទី២០ ខែសីហា ឆ្នាំ២០១៧។

ក្រសួងធនធានទឹក និងឧតុនិយមបានបន្តទៀតថា លក្ខណៈបែបនេះ នឹងធ្វើឲ្យអាកាសធាតនៅកម្ពុជា ចាប់ពីថ្ងៃទី១៧ ដល់ថ្ងៃទី២០ ខែសីហាឆ្នាំ២០១៧នេះ នៅតំបន់ទាំងបីរបស់ប្រទេសកម្ពុជាអាចមានភ្លៀងធ្លាក់ខ្លាំង លាយឡំជាមួយនិងផ្គររន្ទះ។

តំបន់ទំនាបកណ្ដាល ផ្ទៃមេឃមានសភាពអាប់អួរ មានពពកច្រើន ក្នុងនោះមាន រាជធានីភ្នំពេញ កណ្ដាល ស្វាយរៀង បាត់ដំបង សៀមរាប និងខេត្តបន្ទាយមានជ័យ អាចមានភ្លៀងធ្លាក់ខ្លាំង លាយឡំជាមួយ និងផ្គររន្ទះ។ ចំពោះខេត្តតាកែវ កំពង់ស្ពឺ កំពង់ឆ្នាំង ពោធិ៍សាត់ ប៉ៃលិន និងខេត្តកំពង់ធំ អាចមានភ្លៀងធ្លាក់ពីមធ្យមទៅបង្គួរ។

តំបន់ខ្ពង់រាប ផ្ទៃមេឃមានសភាពអាប់អួរ មានពពកច្រើនដេដាស ក្នុងនោះមាន ខេត្តមណ្ឌលគិរី រតនគិរី ស្តឹងត្រែង ព្រះវិហារ និងខេត្តឧត្តរមានជ័យ អាចមានភ្លៀងធ្លាក់ខ្លាំង លាយឡំជាមួយនិងផ្គររន្ទះ។ ចំណែកឯ ខេត្តត្បូងឃ្មុំ កំពង់ចាម និងខេត្តក្រចេះ អាចមានភ្លៀងធ្លាក់ពីមធ្យមទៅបង្គួរ។

តំបន់មាត់សមុទ្រ ផ្ទៃមេឃមានសភាពអាប់អួរ មានពពកច្រើនដេដាស មានភ្លៀងធ្លាក់ខ្លាំង លាយឡំជាមួយនិងផ្គររន្ទះ ហើយនិងរលកសមុត្រមានកំពស់ខ្ពស់ៗ។

ក្រសួងធនធានទឹក បានស្នើប្រជាពលរដ្ឋទាំងអស់ឲ្យមានការប្រុងប្រយ័ត្នចំពោះជំនន់ទឹកភ្លៀងដែលអាចកើតមានឡើង ជាពិសេសនោះ គឺចំពោះប្រជានេសាទសមុទ្រ និងអ្នកធ្វើដំណើរតាមសុទ្រ ត្រូវបង្កើនការយកចិត្តទុកដាក់ប្រុងប្រយ័ត្នឲ្យបានខ្ពស់ ដើម្បីចៀសវាងនូវគ្រោះថ្នាក់ផ្សេងៗដែលអាចកើតមានឡើងជាយថាហេតុ៕