ជាតិ
បាក់ឌុប៖ បេក្ខជន ដែលមកដល់មណ្ឌលប្រឡងក្រោយជួងទី២ មិនអនុញ្ញាតឲ្យប្រឡង
× ក្រសួងអប់រំ យុវជន និងកីឡា បានចេញបញ្ញត្តិកំណត់ឲ្យបេក្ខជន ដែលមកដល់មណ្ឌលប្រឡង ក្រោយជួងទី២ ដោយចេតនា ឬធ្វេសប្រហែស និងត្រូវបានពិន្ទុសូន្យ ។
បញ្ញត្តិក្រសួងអប់រំ បានកំណត់មិនអនុញ្ញាតិឲ្យបេក្ខជន ដែលមកដល់មណ្ឌលប្រឡង ក្រោយជួងទី២ ដោយចេតនា ឬដោយធ្វេសប្រហែសនោះ ចូលប្រឡងបានឡើយ ។ ហើយចំពោះបេក្ខជន ដែលធ្វើឲ្យខូចសណ្ដាប់ធ្នាប់របៀបរៀបរយនៃការប្រឡង និងប៉ះពាល់ដល់កិត្តិយសគណៈមេប្រយោគ ត្រូវកំណត់ឲ្យពិន្ទុសូន្យផងដែរ។
ចំពោះករណីដែលក្រសួងអប់រំ កំណត់មិនផ្ដល់ពិន្ទុដល់បេក្ខជនប្រព្រឹត្តកំហុសក្នុងពេលប្រឡងនោះរួមមាន ទី១សន្លឹកកិច្ចការណា ដែលមានសញ្ញាសម្គាល់អាគតដ្ឋានរបស់ខ្លួន។ ករណីទី២ចម្លើយនៃសំណួរណា ដែលមានវិចារដូចគ្នាទាំងស្រុង ។ ករណីទី៣ ចម្លើយនៃសំណួរណាដែលមានខ្លឹមសារដូចគ្នាទាំងស្រុងទៅនឹងសំណៅវិញ្ញាសា ដែលត្រូវបាននាំចូលក្នងបន្ទប់ប្រឡង ដោយបេក្ខជន ឬដោយអ្នកដទៃ តាមគ្រប់មធ្យោបាយ ឬក្រោយការធ្វើកោសល្យវិច័យឃើញថាសន្លឹកកិច្ចការនេះមានខ្លឹមសារដូចគ្នាទាំងស្រុងទៅនឹងចម្លើយវិញ្ញាសាដែលមានស្រាប់ ដែលត្រូវបានរៀបចំឡើងដោយខុសច្បាប់។
ការប្រឡងសញ្ញាបត្រមធ្យមសិក្សាទុតិយភូមិ សម្រាប់ឆ្នាំសិក្សា២០១៦-២០១៧ នឹងប្រព្រឹត្តទៅនៅថ្ងៃទី ២១ សីហាខាងមុខនេះ។ សម័យប្រឡងឆ្នាំ២០១៧នេះ មានបេក្ខជន សរុបចំនួន ១០៣ ១១២ នាក់ ទាំងថ្នាក់វិទ្យាសាស្ត្រ និងវិទ្យាសាស្ត្រសង្គម ដោយចែកចេញជា ១៧៨ មណ្ឌល និងបន្ទប់ប្រឡងចំនួន ៤១៥៥ បន្ទប់ នៅទូទាំង២៥រាជធានី-ខេត្ត៕
Tag:
បាក់ឌុប
បទប្បញ្ញត្តិ និងកម្រិតវិន័យ
© រក្សាសិទ្ធិដោយ thmeythmey.com