លោក ហង់ ជួនណារ៉ុន ផ្តាំបេក្ខជនបេក្ខនារី ឲ្យប្រើបញ្ញាញាណ ប្រឡងឲ្យបានជោគជ័យ

ជាតិ

លោក ហង់ ជួនណារ៉ុន ផ្តាំបេក្ខជនបេក្ខនារី ឲ្យប្រើបញ្ញាញាណ ប្រឡងឲ្យបានជោគជ័យ

20, Aug 2017 , 2:04 pm

រូបភាព

ដោយ:

ភ្នំពេញ៖ ខណៈការប្រឡងបាក់ឌុបនឹងប្រព្រឹត្តទៅនៅថ្ងៃទី២១ ខែសីហាខាងមុខនេះ លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានផ្តាំផ្ញើទៅបេក្ខជនបេក្ខនារីប្រឡងបាក់ឌុបទាំងអស់ ឲ្យខិតខំប្រឹងប្រែងប្រើប្រាស់នូវបញ្ញាញាណរបស់ខ្លួន ដើម្បីទទួលបានជោគជ័យក្នុងការប្រឡង។

ខណៈបេក្ខជនបេក្ខនារីប្រឡងបាក់ឌុប កំពុងសម្រុកមកមណ្ឌលប្រឡងដែលនៅគ្រប់ទីរួមខេត្ត និងរាជធានី ដើម្បីពិនិត្យឈ្មោះ លេខបន្ទប់ លេខតុ និងអានបទប្បញ្ញត្តិក្នុងការប្រឡង រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន ឯនេះវិញ បានផ្ញើសារជាវីដេអូតាមហ្វេសប៊ុកផ្លូវការរបស់ក្រសួងអប់រំ ប្រាប់ទៅបេក្ខជនបេក្ខនារីប្រឡងបាក់ឌុបឆ្នាំនេះទាំងអស់ ឲ្យខិតខំប្រឹងប្រែង ប្រើប្រាស់នូវបញ្ញារបស់ខ្លួន ដើម្បីដណ្តើមជោគជ័យក្នុងការប្រឡង។

លោករដ្ឋមន្ត្រីថ្លែងយ៉ាងដូច្នេះថា៖ «សូមឲ្យប្អូនៗទាំងអស់ ដែលជាបេក្ខជនបេក្ខនារីប្រឡងសញ្ញាបត្រមធ្យមសិក្សាទុតិយភូមិ កុំមានការភ័យខ្លាច ត្រូវមានជំនឿជាក់លើខ្លួនឯង និងខិតខំប្រឹងប្រែងយកអស់កម្លាំងកាយចិត្ត ប្រើប្រាស់នូវបញ្ញាញាណ និងចំណេះរបស់ខ្លួន ដើម្បីប្រឡងឲ្យបាននូវជោគជ័យ។ ប៉ុន្តែ ប្អូនៗត្រូវគោរពបទប្បញ្ញត្តិ និងវិន័យរបស់ក្រសួងអប់រំ យុវជន និងកីឡា»។

សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)នៅឆ្នាំ២០១៧ នឹងប្រព្រឹត្តទៅនៅថ្ងៃទី២១ ខែសីហាខាងមុននេះ ដោយមានបេក្ខជនប្រឡងចំនួន ១០៣,១១២ នាក់ មណ្ឌលប្រឡងចំនួន១៧៨ ។ លទ្ធផលប្រឡង នឹងប្រកាសនៅថ្ងៃទី១២ ខែកញ្ញា សម្រាប់មណ្ឌលនៅភ្នំពេញ និងខេត្តកណ្តាល និងនៅថ្ងៃទីទី១៣ ខែកញ្ញា សម្រាប់មណ្ឌលនៅបណ្តាលខេត្តផ្សេង៕