ស្ត្រីកម្ពុជាជាង៣០ភាគរយកំពុងប្រើប្រាស់មធ្យោបាយពន្យារកំណើតបែបទំនើប

ជាតិ

ស្ត្រីកម្ពុជាជាង៣០ភាគរយកំពុងប្រើប្រាស់មធ្យោបាយពន្យារកំណើតបែបទំនើប

20, Aug 2017 , 9:39 pm

រូបភាព

ដោយ: ថ្មីៗ

នៅឆ្នាំ២០១៦ មានស្ត្រីកម្ពុជាក្នុងវ័យបន្តពូជដែលបានរៀបការរួច ប្រមាណ៧១ម៉ឺននាក់ ស្មើនឹងជិត៣៣ភាគរយ កំពុងប្រើប្រាស់មធ្យោបាយពន្យារកំណើតតាមបែបទំនើប នៅមូលដ្ឋានសុខាភិបាលសាធារណៈ។ តែយ៉ាងណាចំនួននេះនៅតិចតួចនៅឡើយ ខណៈក្រសួងសុខាភិបាល តាមរយៈប្រធាន មជ្ឈមណ្ឌលជាតិគាំពារមាតា និងទារក បានជំរុញឲ្យស្ត្រីក្នុងវ័យបន្តពូជ ដែលបានរៀបការហើយ ប្រើមធ្យោបាយពន្យារកំណើត ឲ្យបានកាន់តែច្រើនបន្ថែមទៀត។

មធ្យោបាយពន្យារកំណើតបែបទំនើប រួមមានការប្រើប្រាស់ថ្នាំគ្រាប់ ថ្នាំចាក់ កងដាក់ក្នុងស្បូន កងដាក់ក្រោមស្បែក និងការប្រើស្រោមអនាម័យជាដើម។ តាមរបាយការណ៍ក្រសួងសុខាភិបាល នៅឆ្នាំ២០១៦ មានស្ត្រីកម្ពុជាក្នុងវ័យបន្តពូជដែលបានរៀបការរួចហើយ កំពុងប្រើប្រាស់មធ្យោបាយពន្យាកំណើតតាមបែបទំនើបនៅមូលដ្ឋានសុខាភិបាលសាធារណៈ មានចំនួនជាង៧១ម៉ឺននាក់ ស្មើនឹងជិត៣៣ភាគរយ។

ក្រសួងសុខាភិបាល បានជំរុញឱ្យស្ត្រីនៅកម្ពុជាបង្កើនការប្រើប្រាស់មធ្យោបាយពន្យាកំណើត តាមបែបទំនើបបន្ថែមទៀតដើម្បីគាំពារសុខភាពមាតា និងទារកឱ្យកាន់តែប្រសើរឡើងថែមទៀត។ នេះបើតាមទីភ្នាក់ងារសារព័ត៌មានកម្ពុជា (AKP) ដែលបានស្រង់ប្រសាសន៍ លោកស្រី ទុង រដ្ឋាវី ប្រធានមជ្ឈមណ្ឌលជាតិគាំពារមាតា និងទារក។ ប្រធានមជ្ឈមណ្ឌលជាតិគាំពារមាតា និងទារក បញ្ជាក់ថាស្ត្រីក្នុងវ័យបន្តពូជគួរតែប្រើប្រាស់មធ្យោបាយ ពន្យាកំណើតបែបទំនើបឲ្យបាន១០០ភាគរយ ដើម្បីការពារសុខភាពមាតានិងទារក។

ប្រធានមជ្ឈមណ្ឌលជាតិគាំពារមាតា និងទារក បញ្ជាក់ទៀតថា ការពន្យាកំណើតតាមវិធីសាស្ត្រទំនើបជួយឲ្យស្ត្រីជាម្តាយមានសុខភាពល្អ កូនមានកាយសម្បទារឹងមាំ បញ្ញាវាងវៃ ដោយសារតែម្តាយមានពេលគ្រប់គ្រាន់ ចិញ្ចឹមបីបាច់ និងផ្តល់អាហារូបត្ថម្ភដល់កូន ដែលខុសពីការពន្យារកំណើតតាមបែបធម្មជាតិ។ ផ្ទុយទៅវិញការមិនប្រើមធ្យោបាយពន្យាកំណើត អាចធ្វើឲ្យស្ត្រីមានកូនច្រើន ប៉ះពាល់ដល់សុខភាពម្តាយ ទារកលូតលាស់មិនបានល្អ ខ្សោយសតិបញ្ញា ពិសេសគ្រួសារជួបភាពក្រីក្រដោយសាររវល់តែមើលថែទាំកូនមិនមានពេលវេលាប្រកបរបររកស៊ីផ្គត់ផ្គង់ជីវភាពប្រចាំថ្ងៃ។ នេះបើតាមលោកស្រី ទុង រដ្ឋាវី ដែលឲ្យដឹងតាមរយៈ AKPទៀតថា តាមផែនការក្រសួងសុខាភិបាល គ្រោងសម្រេចឲ្យបាន ៤២ភាគរយ នូវការប្រើប្រាស់មធ្យោបាយពន្យាកំណើតទំនើបក្នុងចំណោមស្ត្រីដែលបានរៀបការ និងបង្កើនដល់៤៦ភាគរយនៅឆ្នាំ២០២០ ៕