ជាតិ
សំណើបក្សប្រឆាំង ដែលសុំកែច្បាប់ ដើម្បីឲ្យមានការបោះឆ្នោតនៅក្រៅប្រទេស ត្រូវបានសភាយកទៅពិនិត្យ គណៈកម្មាធិការអចិន្ត្រៃយ៍រដ្ឋសភា ប្រជុំពីសេចក្តីស្នើសុំកែប្រែច្បាប់ស្តីពីការបោះឆ្នោតជ្រើសតាំងតំណាងរាស្ត្រ នៅព្រឹកថ្ងៃទី២១ ខែសីហា ឆ្នាំ២0១៧។ រូបភាពពីរដ្ឋសភា
× ភ្នំពេញ៖ គណៈកម្មាធិការអចិន្ត្រៃយ៍រដ្ឋសភា បានបើកកិច្ចប្រជុំនៅព្រឹកថ្ងៃទី២១ ខែសីហា ឆ្នាំ២0១៧នេះ ដើម្បីពិភាក្សា លើសេចក្តីស្នើសុំកែប្រែច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដែលស្នើដោយគណបក្សសង្គ្រោះជាតិ។ ក្រោយបញ្ចប់កិច្ចប្រជុំ គណៈកម្មាធិការអចិន្ត្រៃយ៍រដ្ឋសភា សម្រេចបញ្ជូនសេចក្តីស្នើសុំកែប្រែច្បាប់នេះ ទៅឲ្យគណៈកម្មការនីតិកម្មនិងយុត្តិធម៌ ដើម្បីសិក្សាលម្អិត។
សេចក្តីប្រកាសព័ត៌មានរបស់រដ្ឋសភា ដែលចេញផ្សាយក្រោយកិច្ចប្រជុំ បានឲ្យដឹងថា សេចក្តីស្នើសុំកែប្រែច្បាប់ខាងលើ នឹងត្រូវបញ្ជូនទៅកាន់គណៈកម្មាធិការអចិន្ត្រៃយ៍វិញ នៅពេលគណៈកម្មការនីតិកម្មនិងយុត្តិធម៌ ពិនិត្យចប់សព្វគ្រប់។ ជានីតិវិធី គណៈកម្មាធិការអចិន្ត្រៃយ៍ នឹងបើកកិច្ចប្រជុំលើកទីពីរ ដើម្បីបន្តពិភាក្សានិងសម្រេចថា ត្រូវបញ្ជូនសេចក្តីស្នើសុំកែប្រែច្បាប់នេះ ទៅកាន់កិច្ចប្រជុំពេញអង្គនៃដ្ឋសភា ឬយ៉ាងណា។
ខ្លឹមសារសំខាន់ ដែលតំណាងរាស្ត្រគណបក្សសង្គ្រោះជាតិ ស្នើឡើងនៅក្នុងច្បាប់ស្តីពីការបោះឆ្នោតជ្រើសតាំងតំណាងរាស្ត្រ គឺចង់ឲ្យប្រជាពលរដ្ឋ ដែលកំពុងរស់នៅនិងធ្វើការនៅឯប្រទេសក្រៅ អាចចុះឈ្មោះបោះឆ្នោត និងអាចបោះឆ្នោតបាន ដោយមិនចាំបាច់វិលមកកាន់ប្រទេសកម្ពុជា។
កន្លងមក គណៈកម្មាធិការជាតិរៀបចំបោះឆ្នោត (គ.ជ.ប) ធ្លាប់អះអាងថា ខ្លួនពុំអាចរៀបចំឲ្យមានការចុះឈ្មោះនិងការបោះឆ្នោតនៅក្រៅប្រទេសបានទេ ដោយសារតែច្បាប់ មិនបានចែង។ គ.ជ.ប ធ្លាប់អះអាងទៀតថា ការរៀបឲ្យមានការចុះឈ្មោះនិងការបោះឆ្នោតនៅក្រៅប្រទេស នឹងអាចធ្វើទៅបាន លុះត្រាតែកែប្រែច្បាប់បោះឆ្នោត ជាមុនសិន៕
Tag:
ច្បាប់បោះឆ្នោត
កែប្រែ
© រក្សាសិទ្ធិដោយ thmeythmey.com