ជាតិ
បាក់ឌុប៖ ព្រឹកថ្ងៃទី២មានបេក្ខជនអវត្តមានជាង១៥០០នាក់ និងអ្នកមានបញ្ហាសុខភាព៤២ករណី
×![]()
ដោយ: ខន ចំប៉ា
ក្នុងដំណើរការប្រឡងបាក់ឌុប នៅព្រឹកថ្ងៃទី២នេះ មានបេក្ខជនអវត្តមានចំនួណ១,៥៤៩នាក់ កើនឡើងចំនួន៥៧នាក់ បើធៀបនឹងថ្ងៃប្រឡងទី១ ។ បើតាមក្រសួងអប់រំ បេក្ខជនមានបញ្ហាសុខភាពក្នុងពេលប្រឡងចំនួន៤០ករណី ខណៈអនុរក្សមាន២ករណី ខណៈបេក្ខជនប្រព្រឹត្តកំហុស និងត្រូវបានរៀបចំកំណត់ហេតុពិសេសចំនួន៣ករណី ប្រឡងជំនួស១ករណី លួចចម្លង២ករណី និងបុគ្គលិកអប់រំប្រព្រឹត្តកំហុសចំនួន៤ករណី។ ទោះយ៉ាងណា ក្រសួងអប់រំ វាយតម្លៃថា ដំណើរការប្រឡងបាក់ឌុបនៅព្រឹកថ្ងៃទី២ ប្រព្រិត្តទៅដោយរលូនល្អ
ក្រោយបញ្ចប់ដំណើរការប្រឡងបាក់ឌុបនៅព្រឹកថ្ងៃទី២ នេះក្រសួងអប់រំ យុវជន និងកីឡា បានវាយតម្លៃថា ការប្រឡងប្រព្រិត្តទៅដោយរលូនល្អ មិនមានបាតុភាពមិនប្រក្រតីណាមួយកើតឡើងគួរឲ្យកត់សម្គាល់ឡើយ។ បើតាមហ្វេសប៊ុកក្រសួងអប់រំ ការសំណេរនាព្រឹកថ្ងៃទី២នេះ មានបេក្ខជន អវត្តមានចំនួន១ ,៥៤៩នាក់ កើនចំនួន៥៧នាក់ ខណៈថ្ងៃប្រឡងទី១ មានសិស្សអវត្តមានចំនួន ១,៤៤១នាក់។
ក្រៅពីនេះ ក៏មានបេក្ខជន និងអនុរក្ស មានបញ្ហាសុខភាពក្នុងពេលប្រឡងដែរ។ បើតាមក្រសួងអប់រំ បេក្ខជនមានបញ្ហាសុខភាពចំនួន៤០ករណី ក្នុងនោះមាន៥ករណី ដែលមិនអាចត្រឡប់ពីមន្ទីរពេទ្យមកបន្តការប្រឡងបាន។ ចំណែកអនុរក្ស មានបញ្ហាសុខភាពចំនួន២ករណី។
ក្រសួងអប់រំ បានបញ្ជាក់ទៀតថា ក្នុងដំណើរការប្រឡងសំណេរនៅព្រឹកថ្ងៃទី២នេះ ក៏មានការប្រព្រឹត្តខុសបទបញ្ញត្តិដែរ ក្នុងនោះបេក្ខជនប្រព្រឹត្តកំហុសឆ្គងត្រូវបានរៀបចំកំណត់ហេតុពិសេស៣ករណី បេក្ខជនស្វៃរិនប្រឡងជំនួស១ករណី បេក្ខជនលួចចម្លងសំណៅឯកសារ២ករណី និងមានបុគ្គលិកអប់រំប្រព្រឹត្តកំហុសឆ្គង៤ករណី។
ចំពោះភ្លៀងធ្លាក់ដែលកើតមាននៅខេត្តក្រចេះ ខេត្តព្រះសីហនុ និងខេត្តរតនគិរី នៅព្រឹកថ្ងៃទី២ នេះ មិនប៉ះពាល់ដល់ដំណើរការប្រឡងឡើយ៕
Tag:
បាក់ឌុប
អប់រំ
សុខភាព
អវត្តមាន
© រក្សាសិទ្ធិដោយ thmeythmey.com
