ជាតិ
×![]()
ដោយ: ខន ចំប៉ា
ក្រសួងអប់រំ យុវជន និងកីឡា បានវាយតម្លៃថា ដំណើរការប្រឡងបាក់ឌុបឆ្នាំនេះ មានភាពល្អប្រសើរជាងឆ្នាំកន្លងទៅ។ បេក្ខជន គោរពបទប្បញ្ញត្តិនៃការប្រឡងយ៉ាងល្អ ស្ទើរតែគ្មានយកសំណៅឯកសារ និងឧបករណ៍ហាមឃាត់មកជាប់ខ្លួន ខណៈមេប្រយោគបំពេញភារកិច្ចរបស់ខ្លួនបានយ៉ាងល្អ និងមានការសហការយ៉ាងជិតស្និទ្ធពីគ្រប់ភាគីពាក់ព័ន្ធ
ក្រោយបញ្ចប់ការប្រឡងបាក់ឌុប ក្រសួងអប់រំ យុវជន និងកីឡា បានវាយតម្លៃថា ដំណើរការប្រឡងទាំង២ថ្ងៃនេះ មានភាពល្អប្រសើរជាងឆ្នាំកន្លងទៅ ពុំមានឧបទ្ទវហេតុអ្វីកើតឡើងគួរឲ្យកត់សម្គាល់ឡើយ។
បើតាមសេចក្តីប្រកាសព័ត៌មានចេញផ្សាយក្រោយការប្រឡងបញ្ចប់ គណៈមេប្រយោគគ្រប់ថ្នាក់ មានការទទួលខុសត្រូវខ្ពស់ ក្នុងការបំពេញភារកិច្ច ទោះបីនៅតាមរាជធានី ខេត្តមួយចំនួនមានភ្លៀងធ្លាក់ក៏ដោយ។ ទន្ទឹមនឹងនេះ គ្រប់ភាគីពាក់ព័ន្ធ បានផ្តល់កិច្ចសហការយ៉ាងល្អ រួមមានអង្គភាពប្រឆាំងអំពើពុករលួយ អាជ្ញាធរដែនដី កងកម្លាំងមានសមត្ថកិច្ច សហភាពសហព័ន្ធយុវជនកម្ពុជា និងយុវជនស្ម័គ្រចិត្តដទៃទៀត។ ដោយឡែកបេក្ខជន បានគោរពបទប្បញ្ញត្តិនៃការប្រឡងយ៉ាងល្អ ស្ទើរតែគ្មាននាំមកជាប់ខ្លួនសំណៅឯកសារ និងឧបករណ៍ហាមឃាត់។
ទោះជាយ៉ាងនេះក្តី ក៏មានដែរបេក្ខជនប្រព្រឹត្តកំហុសឆ្គងក្នុងពេលប្រឡង។ បើតាមសេចក្តីប្រកាសព័ត៌មាន បេក្ខជនប្រព្រឹត្តកំហុសឆ្គងត្រូវបានរៀបចំកំណត់ហេតុពិសេសចំនួន១៣ករណី ក្នុងនោះដកហូតទូរសព្ទដៃ៦ករណី ប្តូរលេខតុអង្គុយ១ករណី លួចចម្លងសំណៅឯកសារ១ករណី លួចប្រើម៉ាស៊ីគិតលេខ១ករណី ប្រឡងជំនួស១ករណី លួចប្តូរលេខតុ១ករណី។ ដោយឡែកបុគ្គលិកអប់រំមានកំហុសឆ្គង៥ករណី។
បេក្ខជនមានបញ្ហាសុខភាព៧០ករណី ក្នុងនោះមាន៩ករណីមិនអាចបន្តការប្រឡងបាន។ ចំណែកឯបុគ្គលិកអប់រំ ក៏មានបញ្ហាសុខភាពចំនួន២ករណីដែរ។
សូមបញ្ជាក់ថា ក្នុងដំណើរការប្រឡង២ថ្ងៃនេះមានបេក្ខជនអវត្តមានសរុបចំនួន ១,៦៤៧នាក់ ស្រីចំនួន៥៨៤នាក់ ត្រូវជា១,៦២ភាគរយ នៃចំនួនបេក្ខជនចុះឈ្មោះប្រឡងសរុប។ ក្រសួងនឹងប្រកាសលទ្ធផលនៃការប្រឡង នៅថ្ងៃទី១២ ខែកញ្ញា នៅមណ្ឌលក្នុងរាជធានីភ្នំពេញ និងនៅតាមបណ្តាខេត្ត និងនៅថ្ងៃទី១៣ ខែកញ្ញា សម្រាប់មណ្ឌលនៅបណ្តាខេត្តផ្សេងទៀត៕
© រក្សាសិទ្ធិដោយ thmeythmey.com
