ជាតិ
លោក យ៉ង សាំងកុមារ ឈរឈ្មោះជាបេក្ខជនប្រធានបក្សមូលដ្ឋាន លោក យ៉េង វីរៈ នៅខាងឆ្វេង លោក យ៉ង សាំងកុមារ នៅខាងស្តាំ។ រូបពីហ្វេសប៊ុកបក្សមូលដ្ឋាន
× គណបក្សប្រជាធិបតេយ្យមូលដ្ឋាន នឹងធ្វើសមាជជាតិលើកទី ១ នៅថ្ងៃទី ២៧ ខែសីហា ឆ្នាំ ២០១៧ ដើម្បីបោះឆ្នោតជ្រើសរើសថ្នាក់ដឹកនាំកំពូលៗគណបក្សនេះ។ លោក យ៉ង សាំងកុមារ បណ្ឌិតផ្នែកកសិកម្ម ក៏ឈរឈ្មោះជាប្រធានគណបក្សឲ្យអង្គសមាជបោះឆ្នោតដែរ។
គោលបំណងនៃការធ្វើសមាជរបស់គណបក្សប្រជាធិបតេយ្យមូលដ្ឋាន ដើម្បីបោះឆ្នោតជ្រើសប្រធានគណបក្ស ប្រធានគណៈកម្មាធិការនាយកទី ១ និងប្រធានគណៈកម្មាធិការដោះស្រាយវិវាទ និងវិន័យ របស់គណបក្ស។ ទន្ទឹមនឹងនេះ សមាជនេះ ក៏ដើម្បីបោះឆ្នោតគាំទ្រលក្ខន្តិកៈថ្មីគណបក្ស និងសមាភាពគណៈកម្មការនាយកទី ១ ផងដែរ។ នេះបើតាមសេចក្តីជូនដំណឹងរបស់គណបក្សប្រជាធិបតេយ្យមូលដ្ឋាននៅថ្ងៃទី ២៣ ខែសីហា។
លោក សាម អុីន អ្នកនាំពាក្យគណបក្សប្រជាធិបតេយ្យមូលដ្ឋាន បញ្ជាក់ប្រាប់សារព័ត៌មានថ្មីៗថា បេក្ខជនដែលឈរឈ្មោះឲ្យអង្គសមាជបោះឆ្នោតរើសធ្វើជាប្រធានបក្សនោះ មាន ៤ រូប។ លោកថា ទី ១ គឺលោក យ៉ង សាំងកុមារ ដែលបច្ចុប្បន្ន ជាមន្ត្រីពង្រឹងសមត្ថភាពយុវជនគណបក្សប្រជាធិបតេយ្យមូលដ្ឋាន ទី ២ លោក យ៉េង វីរៈ បច្ចុប្បន្នជាប្រធានគណបក្ស និងជាអតីតនាយកមជ្ឈមណ្ឌលអប់រំច្បាប់ សម្រាប់សហគមន៍ និងទី ៣ គឺលោកស្រី ឡឹក រដ្ឋា អតីតជាអ្នកធ្វើការនៅក្រុមហ៊ុនឯកជន ព្រមទាំងទី ៤ គឺលោកស្រី ប្រុក វណ្ណី ជាអតីតមន្ត្រីអង្គការសង្គមស៊ីវិល។
អ្នកនាំពាក្យគណបក្សខាងលើ ពន្យល់ថា មូលហេតុដែលគណបក្សប្រជាធិបតេយ្យមូលដ្ឋានធ្វើសមាជរើសថ្នាក់ដឹកនាំកំពូលៗបក្សនៅពេលនេះ ដោយសារការតែងតាំងសមាសភាពថ្នាក់ដឹកនាំគណបក្សប្រជាធិបតេយ្យបក្សមូលដ្ឋានកន្លងមក ធ្វើឡើងជាបណ្ណោះអាសន្នប៉ុណ្ណោះ។« ពេលនេះយើងទើបធ្វើសមាជត្រឹមត្រូវ ដើម្បីបោះឆ្នោតជ្រើសរើសជាផ្លូវការតែម្តង»។ នេះជាការបន្ថែមរបស់លោក សាម អុីន ដែលជាបេក្ខជនគណៈកម្មាធិការនាយកទី ១។
បើតាមសេចក្តីប្រកាសដដែល សមាជនេះ នឹងធ្វើឡើងនៅព្រឹកថ្ងៃទី ២៧ ខែសីហា ឆ្នាំ ២០១៧ នៅភូមិពោងពាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដោយមានអ្នកចូលរួមដែលជាតំណាងសមាជិកគណបក្សប្រមាណ ១៥០ នាក់។
Tag:
យ៉ង សាំងកុមារ
សាម អ៊ីន
បក្សមូលដ្ឋាន
© រក្សាសិទ្ធិដោយ thmeythmey.com