ក្រសួងមហាផ្ទៃ ព្រមានចាត់វិធានការលើបក្សចំនួន១១ បើមិនបំពេញកាតព្វកិច្ចឲ្យបានត្រឹមត្រូវ

ជាតិ

ក្រសួងមហាផ្ទៃ ព្រមានចាត់វិធានការលើបក្សចំនួន១១ បើមិនបំពេញកាតព្វកិច្ចឲ្យបានត្រឹមត្រូវ

31, Aug 2017 , 9:33 am

រូបភាព

ដោយ: ម៉ៅ សុផា

ភ្នំពេញ៖ គណបក្សចំនួន១១ ដែលមិនទាន់បានបំពេញកាតព្វកិច្ចឲ្យបានត្រឹមត្រូវ តាមច្បាប់ស្តីពីគណបក្សនយោបាយនោះ នឹងត្រូវប្រឈមមុខតាមផ្លូវច្បាប់។ នេះជាការព្រមានរបស់ក្រសួងមហាផ្ទៃ ។

ក្រសួងមហាផ្ទៃ បានផ្ញើលិខិតទៅកាន់គណបក្សចំនួន១១ ដើម្បីឲ្យបំពេញកាព្វកិច្ច ឲ្យស្របទៅតាមច្បាប់ស្តីពីគណបក្សនយោបាយ។ គណបក្សទាំង១១នោះ ដែលក្រសួងមហាផ្ទៃព្រមានចាត់វិធានការនោះ រួមមានគណបក្ស សម រង្ស៊ី គណបក្សហ្វ៊ុនស៊ិនប៉ិច គណបក្សអំណាចខ្មែរ គណបក្សសំបុកឃ្មុំសង្គមប្រជាធិបតេយ្យ គណបក្សខ្មែរអង្គរ គណបក្សប្រជាធិបតេយ្យខ្មែរ គណបក្សសង្គមប្រជាធិបតេយ្យ គណបក្សមហានគរ គណបក្សរណសិរ្សសង្គមជាតិនិយម គណបក្សកសាងជាតិ និងគណបក្សប្រជាធិបតេយ្យសេរីសង្គ្រោះជាតិ។

លិខិតដែលចុះហត្ថលេខាដោយសម្តេច ស ខេង រដ្ឋមន្ត្រីក្រសួងមហាផ្ទៃ នៅថ្ងៃទី២៩ ខែសីហា ឆ្នាំ២0១៧ បានតម្រូវឲ្យគណបក្ស សម រង្ស៊ី ផ្តូរឈ្មោះចេញ។ ចំណែក គណបក្សហ្វ៊ុនស៊ិនប៉ិច ក្រសួងមហាផ្ទៃ តម្រូវឲ្យផ្លាស់ប្តូរសញ្ញាសម្គាល់ (LOGO)។ បច្ចុប្បន្ន សញ្ញាសម្គាល់របស់គណបក្សសហ្វ៊ុនស៊ិនប៉ិច មានរូបរបស់ព្រះអង្គម្ចាស់ នរោត្តម រណឫទ្ធិ។
ក្រសួងមហាផ្ទៃលើកហេតុផលថា ច្បាប់ស្តីពីគណបក្សនយោបាយ មិនអនុញ្ញាតឲ្យគណបក្ស យកឈ្មោះរបស់បុគ្គល ទៅធ្វើជាឈ្មោះរបស់គណបក្សនោះទេ ហើយក៏មិនអនុញ្ញាតឲ្យយករូបរបស់បុគ្គល ទៅធ្វើជាសញ្ញាសម្គាល់របស់គណបក្សដែរ។

បើតាមលិខិតក្រសួងមហាផ្ទៃ គណបក្ស សម រង្ស៊ី និងគណបក្សសហ្វ៊ុនស៊ិនប៉ិច មានរយៈពេល៩0ថ្ងៃ ក្នុងការបំពេញកាតព្វកិច្ចឲ្យបានត្រឹមត្រូវ ។

ដោយឡែក គណបក្សចំនួន៩ទៀត គឺស្ថិតក្នុងចង្កោមតែមួយ ដែលមិនបានបំពេញកាតព្វកិច្ច ឲ្យបានត្រឹមត្រូវតាមមាត្រា២៦ និងមាត្រា៤៨ នៃច្បាប់ស្តីពីគណបក្សនយោបាយ។ គណបក្សទាំង៩នោះ មានរយៈពេលតែ១៥ថ្ងៃប៉ុណ្ណោះ ដើម្បីបំពេញកាតព្វកិច្ចឲ្យបានត្រឹមត្រូវ តាមមាត្រាខាងលើនៃច្បាប់ស្តីពីគណបក្សនយោបាយ បើពុំដូច្នោះទេ អាចនឹងត្រូវប្រឈមផ្លូវច្បាប់។

តាមរយៈលិខិតក្រសួងមហាផ្ទៃ បានព្រមានថា៖«ក្នុងករណីខកខានមិនបានបំពេញកាព្វកិច្ចជាថ្មីទៀត ក្រសួងមហាផ្ទៃ នឹងសម្រេចចាត់វិធានការតាមផ្លូវច្បាប់ជាធរមាន»។

មាត្រា២៦ នៃច្បាប់ស្តីពីគណបក្សនយោបាយ ចែងថា៖«គណបក្សនយោបាយ ដែលបានចុះបញ្ជីរួចហើយ ត្រូវបញ្ជូនទៅក្រសួងមហាផ្ទៃ នូវបញ្ជីឈ្មោះប្រធាននិងអនុប្រធានគណបក្ស ក្នុងករណីដែលមានសមាសភាពនៃគណៈកម្មាធិការនាយក ឬគណៈកម្មាធិការអចិន្ត្រៃយ៍ ឬអង្គការសមមូល។ ចំណែកការផ្លាស់ប្តូរប្រធាន ឬអនុប្រធានគណបក្ស ,សមាសភាពនៃគណៈកម្មាធិការនាយក ឬគណៈកម្មាធិការអចិន្ត្រៃយ៍ ឬអង្គការសមមូល ត្រូវជូនដំណឹងទៅក្រសួងមហាផ្ទៃ។ ក្នុងករណីប្តូរឈ្មោះសញ្ញាសម្គាល់ទីស្នាក់ការ កែប្រែគោលនយោបាយ និងកម្មវិធីនយោបាយ ឬធ្វើវិសោធនកម្មលើលក្ខន្តិកៈ គណបក្សត្រូវជូនដំណឹងទៅក្រសួងមហាផ្ទៃ។

រីឯមាត្រា៤៨ នៃច្បាប់ស្តីពីគណបក្សនយោបាយដដែល ចែងថា៖«គណបក្ស ដែលត្រូវបង្កើតនិងចុះបញ្ជីត្រឹមត្រូវនៅក្រសួងមហាផ្ទៃ ត្រូវបំពេញសំណុំបែបបទធ្វើនិយ័តកម្មស្របតាមបទបញ្ញត្តិនៃច្បាប់ស្តីពីគណបក្សនយោបាយ ក្នុងរយៈពេល៩0ថ្ងៃយ៉ាងយូរ»។

សូមបញ្ជាក់ថា មានគណបក្ស៩ហើយ ដែលត្រូវបានក្រសួងមហាផ្ទៃ ប្តឹងទៅតុលាការកំពូល នៅថ្ងៃទី២៩ ខែសីហា ឆ្នាំ២0១៧ ដើម្បីសុំឲ្យរំលាយចោល។ មូលហេតុ គឺដោយសារតែគណបក្សទាំង៩នោះ មិនបានអនុវត្តឲ្យបានត្រឹមត្រូវតាមច្បាប់ស្តីពីគណបក្សនយោបាយ៕