ជាតិ
កម្ពុជា-ឡាវ នឹងស្នើសុំផែនទីខ្នាត ១លើ៥០.០០០ ពីបារាំង ដើម្បីយកមកដោះស្រាយបញ្ហាព្រំដែន ការធ្វើសន្និសីទកាសែតរួមគ្នារវាងនាយករដ្ឋមន្រ្តីកម្ពុជា (នៅខាងស្តាំដៃ) និងនាយករដ្ឋមន្រ្តីឡាវ (នៅខាងឆ្វេងដៃ) នៅវិមានសន្តិភាព នាថ្ងៃទី១ ខែកញ្ញា ឆ្នាំ២0១៧។
× ភ្នំពេញ៖ សម្តេច ហ៊ុន សែន នាយករដ្ឋមន្ត្រីកម្ពុជា និងលោក ថោងលន់ ស៊ីសូលីត នាយករដ្ឋមន្ត្រីឡាវ បានឯកភាពជាមួយគ្នា ថានឹងសរសេរលិខិត ជូនលោក អេម៉ានុយអែល ម៉ាក្រុង ប្រធានាធិបតីបារាំង ដើម្បីឲ្យជួយផ្ទេរផែនទីពីខ្នាត១លើ១០០.០០០ មកផែនទីខ្នាត ១លើ៥០.០០០។ សម្តេច ហ៊ុន សែន បានថ្លែងយ៉ាងដូច្នេះ នៅពេលធ្វើសន្និសីទសារព័ត៌មាន ជាមួយលោក ថោងលន់ ស៊ីសូលីត នៅវិមានសន្តិភាព នាព្រឹកថ្ងៃទី១ ខែកញ្ញា ឆ្នាំ២០១៧នេះ។
សម្តេច ហ៊ុន សែន បានបញ្ជាក់ថា ការស្នើឲ្យបារាំង ផ្ទេរផែនទីពីខ្នាត ១លើ១០០.០០០ មកផែនទីខ្នាត ១លើ៥០.០០០ គឺដើម្បីយកមកដោះស្រាយបញ្ហាព្រំដែនកម្ពុជា-ឡាវ។ ប្រមុខរដ្ឋាភិបាលកម្ពុជារូបនេះ បានសង្កត់ធ្ងន់ថា៖«មូលដ្ឋានដែលបារាំងផ្តល់ឲ្យ គឺផែនទីខ្នាត ១លើ១០០.០០០។ ប៉ុន្តែ ការធ្វើខ្សែព្រំដែន មិនអាចប្រើនូវខ្នាត ១លើ១០០.០០០ បានទេ ត្រូវប្រើខ្នាត១លើ៥០.០០០។ ដូច្នេះ វិធីដែលល្អជាងគេ គឺសូមអ្នកបច្ចេកទេសរបស់បារាំង មកជួយផ្ទេរផែនទី ពីខ្នាត ១លើ១០០.០០០ មកខ្នាត ១លើ៥០.០០០ ដែលជាផែនទីដើមរបស់បារាំង»។
បើតាមសម្តេច ហ៊ុន សែន កម្ពុជា-ឡាវ ក៏នឹងស្នើសុំពីបារាំង នូវឯកសារផ្សេងៗទៀតដែរ ដែលទាក់ទងនឹងបញ្ហាព្រំដែន។ សម្តេច អះអាងថា បារាំង ដែលធ្លាប់ដាក់អាណានិគមលើកម្ពុជា-ឡាវ បានបន្សល់ទុកមរតកនេះ ដូច្នេះត្រូវតែចូលរួមដោះស្រាយ។
លោក ថោងលន់ ស៊ីសូលីន បានថ្លែងក្នុងសន្និសីទសារព័ត៌មានថា ការដោះស្រាយបញ្ហាព្រំដែននេះ គឺឈរលើមូលដ្ឋានមិត្តភាពនិងស្មើភាព ដោយគ្មានភាគីណាខាត ឬភាគីណា ចំណេញ នោះទេ។ នាយករដ្ឋមន្ត្រីឡាវរូបនេះ បាននិយាយយ៉ាងដូច្នេះ៖«យើង ក៏បានឯកភាពគ្នាដែរថា ពួកយើងនឹងព្យាយាមរក្សាឲ្យមានសន្តិសុខ និងសន្តិភាពនៅតាមព្រំដែន ដែលមិនទាន់បានដោះស្រាយហើយ ព្រោះបញ្ហានេះ គឺសំខាន់ខ្លាំងណាស់ ដើម្បីឲ្យតំបត់តាមព្រំដែនមានសន្តិភាព»។
សូមបញ្ជាក់ថា កាលពីខែសីហា ឆ្នាំ២០១៧ កន្លងទៅ កម្ពុជា មានបញ្ហាព្រំដែនជាមួយឡាវ។ ការបណ្តាលឲ្យមានបញ្ហាព្រំដែននេះ កើតឡើង គឺដោយសារតែកងទ័ពឡាវ បានចូលមកឈរជើងក្នុងតំបន់ក្បែរអូរអាឡៃ និងតំបន់អូរតាង៉ាវ ស្ថិតក្នុងខេត្តស្ទឹងត្រែង។ ប៉ុន្តែកងទ័ពទាំងនោះ សម្រេចដកចេញវិញ ក្រោយការចរចារវាងនាយករដ្ឋមន្ត្រីកម្ពុជា និងនាយករដ្ឋមន្ត្រីឡាវ៕
Tag:
ហ៊ុន សែន
ថោងលន់ ស៊ីសូលីត
© រក្សាសិទ្ធិដោយ thmeythmey.com