អាមេរិកព្រមានមីយ៉ាន់ម៉ាកុំវាយប្រហារជនស៊ីវិល ខណៈជនជាតិរ៉ូហ៊ីងយ៉ា១៧នាក់លង់ទឹកស្លាប់ពេលភៀសខ្លួន

អន្តរជាតិ

នយោបាយអន្តរជាតិ

អាមេរិកព្រមានមីយ៉ាន់ម៉ាកុំវាយប្រហារជនស៊ីវិល ខណៈជនជាតិរ៉ូហ៊ីងយ៉ា១៧នាក់លង់ទឹកស្លាប់ពេលភៀសខ្លួន

02, Sep 2017 , 7:39 pm

រូបភាព

ដោយ:

អាមេរិកបានប្រាប់មីយ៉ាន់ម៉ាឲ្យឈប់វាយប្រហារលើជនជាតិរ៉ូហ៊ីងយ៉ា និងក្រុមជួយសង្គ្រោះមនុស្សធម៌ក្រោយពេលការប៉ះទង្គិចរវាងកងទ័ពមីយ៉ាន់ម៉ា និងក្រុមប្រដាប់អាវុធរ៉ូហ៊ីងយ៉ាបង្កឲ្យជនជាតិរ៉ូហ៊ីងយ៉ាមួយចំនួនភៀសខ្លួនទៅបង់ក្លាដែស ។ គ្រាន់តែថ្ងៃសុក្រទី ៣១ខែសីហា គេរកឃើញប្រជាជនរ៉ូហ៊ីងយ៉ា ១៧នាក់លង់ទឹកស្លាប់ផងដែរ ខណៈជិត ៤០០ផ្សេងទៀតស្លាប់ក្នុងប្រយុទ្ធគ្នា។

ឯកអគ្គរដ្ឋទូតអាមេរិកប្រចាំអង្គការសហប្រជាជាតិអ្នកស្រី Nikki Haley បានរិះគន់ការប៉ះទង្គិចរវាងកងសន្តិសុខមីយ៉ាន់ម៉ា និងក្រុមសកម្មប្រយុទ្ធជនជាតិរ៉ូហ៊ីងយ៉ា។ ការប៉ះទង្គិចនេះបានបង្ខំឲ្យជនជាតិរ៉ូហ៊ីងយ៉ាច្រើនពាន់នាក់រត់ភៀសខ្លួនទៅបង់ក្លាដែស ហើយគេប្រទះឃើញជនជាតិរ៉ូហ៊ីងយ៉ានេះ ១៧ នាក់លង់ទឹកស្លាប់នៅថ្ងៃព្រហស្បតិ៍ទី ៣១ ខែសីហា។

តំណាងសហរដ្ឋអាមេរិកប្រចាំអង្គការសហប្រជាជាតិរូបនេះបានអះអាងថា ខណៈពេលដែលកងសន្តិសុខមីយ៉ាន់ម៉ាបានព្យាយាមទប់ស្កាត់ការកើតមានអំពើហិង្សាធ្ងន់ធ្ងរ រដ្ឋាភិបាលមីយ៉ាន់ម៉ាគោរពតាមច្បាប់មនុស្សធម៌អន្តរជាតិដូចជាមិនវាយប្រហារជនស៊ីវិលក៏ដូចជាក្រុមបម្រើការងារមនុស្សធម៌ និងធានាឲ្យបានថាជំនួយត្រូវផ្ដល់ឲ្យដល់ប្រជាជនដែលខ្វះខាត។

មន្ត្រីបង់ក្លាដែសបានប្រាប់ទីភ្នាក់ងារព័ត៌មាន AFP ថា ប្រជាជនរ៉ូហ៊ីងយ៉ាបានព្យាយាមឆ្លងចូលមកបង់ក្លាដែសតាមទន្លេ Naf ដោយជិះទូកដែលវាគ្រោះថ្នាក់ខ្លាំង។ ប្រជាជនទាំងនោះប្រហែល ១៨៥០០ នាក់បានឆ្លងដែនមកបង់ក្លាដែស។ រឿងដែលអាណោចអាធមបំផុតគឺ ឆ្មាំសមុទ្របង់ក្លាដែសក៏បានបានប្រទះឃើញសាកសពជនជាតិរ៉ូហ៊ីងយ៉ា១៧ នាក់ដែលភាគច្រើនជាក្មេងបានលង់ទឹកស្លាប់ដោយសារការក្រឡាប់ទូកនៅពេលដែលពួកគេរត់ភៀសខ្លួនដេរ។

អ្នករួចផុតជីវិតពីការក្រឡាប់ទូកម្នាក់ឈ្មោះ Shah Karim បានរៀបរាប់ប្រាប់អ្នកសារព័ត៌មានថា ទូកតូចចង្អៀតដែលគេបានជិះត្រូវរលកធំៗវាយឡើងផ្អៀងនៅពេលដែលមកដល់ទន្លេNaf។ គេបន្តថា អ្នករត់ភៀសខ្លួនទាំងអស់ភ័យខ្លាំងណាស់ ព្រោះគ្មាននរណាម្នាក់ដឹងថាគួរធ្វើបែបណានោះទេ នៅពេលដែលរលកធំៗបានវាយមកលើទូក។

សូមជម្រាបផងដែរថា បង់ក្លាដែសកន្លងមកបានទទួលជនភៀសខ្លួនរ៉ូហ៊ីងយ៉ាជាង៤០ម៉ឺននាក់ហើយនៅជំរំជនភៀសខ្លួន Kutupalong។ប៉ុន្តែអាជ្ញាធរបង់ក្លាដែសបានបង្ហាញយ៉ាងច្បាស់ថា ខ្លួនមិនចង់ទទួលយកជនភៀសខ្លួនទៀតឡើយ៕