អ្នកនាំពាក្យទូតអាមេរិក៖ យើងបារម្ភយ៉ាងខ្លាំងចំពោះការចាប់ខ្លួនឯ.ឧ កឹម សុខា ដែលជាមេដឹកនាំប្រឆាំងគួរឲ្យគោរព

ជាតិ

នយោបាយជាតិ

អ្នកនាំពាក្យទូតអាមេរិក៖ យើងបារម្ភយ៉ាងខ្លាំងចំពោះការចាប់ខ្លួនឯ.ឧ កឹម សុខា ដែលជាមេដឹកនាំប្រឆាំងគួរឲ្យគោរព

03, Sep 2017 , 4:42 pm

រូបភាព

លោក Arend Zwartjes និងស្លាកស្ថានទូតអាមេរិក

ដោយ:

អ្នកនាំពាក្យស្ថានទូតអាមេរិកប្រចាំនៅកម្ពុជា បានបង្ហាញក្តីបារម្ភយ៉ាងខ្លាំង ក្រោយពីរដ្ឋាភិបាលកម្ពុជា បានចាប់ខ្លួនឯកឧត្តម កឹម សុខា ប្រធានស្តីទីគណបក្សសង្គ្រោះជាតិ។

លោក Arend Zwartjes អ្នកនាំពាក្យស្ថានទូតអាមេរិកប្រចាំនៅកម្ពុជា បញ្ជាក់ប្រាប់សារព័ត៌មានថ្មីៗ តាមសារអេឡិចត្រនិកយ៉ាងខ្លីបែបនេះថា៖« យើងបានកត់សម្គាល់ដោយក្តីបារម្ភយ៉ាងខ្លាំងដែលរដ្ឋាភិបាលកម្ពុជា ចាប់ខ្លួនឯកឧត្តម កឹម សុខា ដែលជាមេដឹកនាំប្រឆាំងដ៏គួរឲ្យគោរព ជុំវិញការចោទប្រកាន់ជាច្រើន ដែលយើងមើលឃើញថា ជារឿងនយោបាយ»។

អ្នកនាំពាក្យទីស្តីគណៈរដ្ឋមន្ត្រី លោក ផៃ ស៊ីផាន បានប្រាប់សារព័ត៌មានថ្មីៗថា ការចាប់ខ្លួនឯកឧត្តម កឹម សុខា គឺរដ្ឋាភិបាលមានភស្តុតាងគ្រប់គ្រាន់ ដែលបញ្ជាក់ថា ឯកឧត្តមពិតជាបានប្រព្រឹត្តកំហុស។ លោក ស៊ីផាន ក៏ថ្លែងការពាររដ្ឋាភិបាលទៀតថា រដ្ឋាភិបាលកម្ពុជា ធ្វើបែបនេះ ដើម្បីការពារអធិបតេយ្យ និងសន្តិភាព ដោយមិនឲ្យបរទេសជ្រៀតជ្រែកចូលក្នុងកិច្ចការផ្ទៃក្នុងកម្ពុជា។

ជាមួយគ្នានេះ លោក ផៃ ស៊ីផាន ហាក់មានសុទិដ្ឋិនិយមថា ការចាប់ខ្លួនឯកឧត្តម កឹម សុខា នេះ នឹងមិនប៉ះពាល់ដល់ទំនាក់ទំនងកម្ពុជា និងអាមេរិកនោះទេ។ « ខ្ញុំុយល់ថា វាមិនមែនជាគោលនយោបាយរបស់លោកប្រធានាធិបតីអាមេរិកទេ ដែលលូកដៃចូលក្នុងកិច្ចការផ្ទៃក្នុងកម្ពុជា។ តែវាជារឿងរបស់ក្រុមសម្ងាត់ ឬអង្គការចាត់តាំងណាមួយនៅអាមេរិក ដែលជួយ ឯកឧត្តម កឹម សុខា ដើម្បីផ្តួលរំលំរដ្ឋាភិបាលកម្ពុជា»។ នេះជាការបញ្ជាក់របស់លោក ផៃ ស៊ីផាន។

សូមបញ្ជាក់ថា សមត្ថកិច្ចបានចាប់ខ្លួនឯកឧត្តម កឹម សុខា នៅពាក់កណ្តាលអធ្រាត្រថ្ងៃទី២ ចូលថ្ងៃទី៣ ខែកញ្ញា ឆ្នាំ២០១៧នេះ នៅផ្ទះរបស់លោកនៅសង្កាត់បឹងកក់ ២ ខណ្ឌទួលគោក។

ក្រោយចាប់ខ្លួនប្រធានគណបក្សសង្គ្រោះជាតិ សម្តេចនាយករដ្ឋមន្ត្រី ហ៊ុន សែន បានបកស្រាយដោយចោទប្រកាន់ឯកឧត្តម កឹម សុខា ថា ជាជនក្បត់ជាតិ ដែលស្តាប់បញ្ជាអាមេរិក ដើម្បីធ្វើផែនការផ្តួលរំលំរដ្ឋាភិបាល។ សម្តេចលើកឡើងដូច្នេះ ដោយសម្តេចយោងទៅលើសារនយោបាយរបស់ឯកឧត្តម កឹម សុខា កាលពីឆ្នាំ ២០១៣ នៅប្រទេសអូស្ត្រាលី នៅក្នុងវីដេអូឃ្លីប ដែលត្រូវបានផ្សាយដោយបណ្តាញមួយ ឈ្មោះ CBN (Cambodian Broadcasting Network)។