សភា នឹងប្រជុំវិសាមញ្ញជាបន្ទាន់ ដើម្បីសម្រេចថា ឲ្យតុលាការផ្អាកចំណាត់ការលើឯកឧត្តម កឹម សុខា ឬបន្ត

ជាតិ

នយោបាយជាតិ

សភា នឹងប្រជុំវិសាមញ្ញជាបន្ទាន់ ដើម្បីសម្រេចថា ឲ្យតុលាការផ្អាកចំណាត់ការលើឯកឧត្តម កឹម សុខា ឬបន្ត

07, Sep 2017 , 12:33 pm

រូបភាព

លោក ឈាង វុន តំណាងរាស្ត្រនិងជាអ្នកនាំពាក្យរដ្ឋសភាពីគណបក្សប្រជាជនកម្ពុជា បកស្រាយប្រាប់ក្រុមអ្នកកាសែត នៅថ្ងៃទី៧ ខែកញ្ញា ឆ្នាំ២0១៧ អំពីំចំណាត់ការបស់តុលាការ ទៅលើឯកឧត្តម កឹម សុខា ប្រធានគណបក្សសង្គ្រោះជាតិ។

ដោយ: សារព័ត៌មានថ្មីៗ

ភ្នំពេញ៖ រដ្ឋសភា បានកំណត់យកថ្ងៃទី១១ ខែកញ្ញា ឆ្នាំ២0១៧ ដើម្បីបើកកិច្ចប្រជុំពេញអង្គវិសាមញ្ញ លើសំណុំរឿងរបស់ឯកឧត្តម កឹម សុខា ប្រធានគណបក្សសង្គ្រោះជាតិ ដែលត្រូវសមត្ថកិច្ចចាប់ខ្លួន នាពេលថ្មីៗនេះ។ នេះបើតាមលោក ឈាង វុន តំណាងរាស្ត្រនិងជាអ្នកនាំពាក្យរដ្ឋសភាពីគណបក្សប្រជាជនកម្ពុជា។

បើតាមលោក ឈាង វុន ការកំណត់កាលបរិច្ឆេទនៃកិច្ចប្រជុំពេញអង្គនៃរដ្ឋសភា គឺធ្វើឡើងតាមរយៈគណៈកម្មាធិការអចិន្ត្រៃយ៍ នៅព្រឹកថ្ងៃទី៧ ខែកញ្ញា ឆ្នាំ២0១៧នេះ។ ថ្លែងប្រាប់ក្រុមអ្នកកាសែតក្រោយកិច្ចប្រជុំនៃគណៈកម្មាធិការអចិន្ត្រៃយ៍ លោក ឈាង វុន បានបញ្ជាក់យ៉ាងដូច្នេះថា៖«កិច្ចប្រជុំពេញអង្គនៃរដ្ឋសភា នាពេលខាងមុខ នឹងសម្រេចថា តើឲ្យតុលាការផ្អាកចំណាត់ការលើឯកឧត្តម កឹម សុខា ឬក៏បន្ត។ រឿងដកអភ័យឯកសិទ្ធិឬមិនដក យើងមិននិយាយទៀតទេ ព្រោះនេះជាបទល្មើសជាក់ស្តែង»។

សូមបញ្ជាក់ថា ចៅក្រមស៊ើបសួរនៃសាលាដំបូងរាជធានីភ្នំពេញ សម្រេចឃុំឯកឧត្តម កឹម សុខា ជាបណ្តោះអាសន្ន ក្រោមបទចោទ «សន្ទិដ្ឋិភាពជាមួយបរទេស» ដែលបទល្មើសនេះ ស្ថិតក្នុងអំពើក្បត់ជាតិ៕