បក្សប្រឆាំង មិនទាន់គិតគូររើសប្រធានស្តីទី ដឹកនាំជំនួសឯកឧត្តម កឹម សុខា

ជាតិ

បក្សប្រឆាំង មិនទាន់គិតគូររើសប្រធានស្តីទី ដឹកនាំជំនួសឯកឧត្តម កឹម សុខា

08, Sep 2017 , 5:48 pm

រូបភាព

លោកស្រី មួរ សុខហួរ អនុប្រធានគណបក្សសង្គ្រោះជាតិ

ដោយ: ម៉ៅ សុផា

ភ្នំពេញ៖ បក្សប្រឆាំង នៅតែរក្សាតំណែងជាប្រធាន ឲ្យឯកឧត្តម កឹម សុខា ទោះស្ថិតក្នុងពន្ធនាគារក៏ដោយ។ មកដល់ពេលនេះ មិនមានការលេចឮដំណឹងសូម្បីតែបន្តិច ថាបក្សប្រឆាំង ចង់រើសមេដឹកនាំថ្មី ជំនួសឯកឧត្តម កឹម សុខា។

បើគិតទៅប្រហែលមួយសប្តាហ៍ហើយ ដែលគណបក្សសង្គ្រោះជាតិ មិនមានមេដឹកនាំកំពូលរបស់ខ្លួន គឺឯកឧត្តម កឹម សុខា។ ហើយមន្ត្រីក្នុងបក្សប្រឆាំងដ៏ធំមួយនេះ ក៏មិនទាន់មានគម្រោងដែរ ថានឹងជ្រើសរើសប្រធានស្តីទី ដើម្បីដឹកនាំគណបក្សជាបណ្តោះអាសន្ន ជំនួសឯកឧត្តម កឹម សុខា ដែលកំពុងជាប់ពន្ធនាគារ។

លោកស្រី មួរ សុខហួរ អនុប្រធានមួយរូប នៃគណបក្សសង្គ្រោះជាតិ មិនចង់ឆ្លើយឬបកស្រាយអ្វីទាំងអស់ ទាក់ទងនឹងសំណួរ ដែលសួរថា «តើរហូតមកដល់ពេលនេះ គណបក្សសង្គ្រោះជាតិ បានគិតគូរហើយឬនៅ ចំពោះការរើសមេដឹកនាំថ្មី ជំនួសឯកឧត្តម កឹម សុខា?»។ ចំពោះសំណួរនេះ លោកស្រី បានត្រឹមតែឆ្លើយយ៉ាងខ្លីប៉ុណ្ណោះថា «[ការរើសមេដឹកនាំថ្មី] គឺអត់ទេ។ ពួកយើង យល់ច្បាស់ណាស់ ថាត្រូវធ្វើយ៉ាងម៉េច»។

ចំណែក សំណួរ ដែលសួរថា «ចុះបើមិនរើសប្រធានថ្មីឬប្រធានស្តីទី ដើម្បីដឹកនាំជាបណ្តោះអាសន្ន ក្នុងកាលៈទេសៈដែលអវត្តមានរបស់ឯកឧត្តម កឹម សុខា បែបនេះ តើបញ្ហាផ្ទៃក្នុងនៅក្នុងគណបក្ស អាចនឹងមានការរង្គោះរង្គើដែរឬទេ?» ត្រូវបានលោកស្រី មួរ សុខហួរ ឆ្លើយដូចខាងលើដដែលថា «អត់ទេ»។ លោកស្រី ទំនងជាចង់បញ្ជាក់ថា ទោះគ្មានប្រធានក៏ដោយ ក៏គណបក្សសង្គ្រោះជាតិ មិនព្រួយរម្ភចំពោះបញ្ហាផ្ទៃក្នុងដែរ។

ការចាប់ខ្លួនឯកឧត្តម កឹម សុខា គឺធ្វើឡើងក្រោយពីវីដេអូឃ្លីបមួយ ដែលផលិតដោយបណ្តាញផ្សព្វផ្សាយឈ្មោះ CBN (Cambodian Broadcasting Network) ត្រូវបានបង្ហោះជាបន្តបន្ទាប់នៅលើបណ្តាញសង្គមនានា។ នៅក្នុងវីដេអូឃ្លីបនេះ ឯកឧត្តម កឹម សុខា បាននិយាយថា ឯកឧត្តម មានអ្នកជំនាញជាជនបរទេស នៅពីក្រោយ ដើម្បីជួយណែនាំ ក្នុងការផ្លាស់ប្តូរមេដឹកនាំនៅកម្ពុជា។ តាមរយៈសារនៅក្នុងវីដេអូឃ្លីបនោះ សមត្ថកិច្ច បានចាត់ទុកថា ឯកឧត្តម កឹម សុខា បានឃុបឃិតជាមួយបរទេស ដែលធ្វើឲ្យប៉ះពាល់ដល់ប្រទេសជាតិ។ សម្រាប់សមត្ថកិច្ច និងតុលាការ រួមទាំងរដ្ឋាភិបាលផងនោះ ការឃុបឃិតជាមួយបរទេសដោយសម្ងាត់ ដើម្បីរៀបចំផែនការបែបនេះ គឺជាអំពើក្បត់ជាតិ។ បច្ចុប្បន្ន ឯកឧត្តម កឹម សុខា ត្រូវបានឃុំខ្លួនក្នុងពន្ធនាគារត្រពាំងថ្លុង ក្នុងខេត្តត្បូងឃ្មុំ ក្រោមបទចោទ «សន្ទិដ្ឋិភាពជាមួយបរទេស»។

ក្រុមតំណាងរាស្ត្រគណបក្សសង្គ្រោះជាតិ បានចេញសេចក្តីថ្លែងការណ៍ ដោយចាត់ទុកការចាប់ខ្លួនឯកឧត្តម កឹម សុខា ថាជាការរំលោភរដ្ឋធម្មនុញ្ញកម្ពុជា។ ក្រុមតំណាងរាស្ត្រគណបក្សសង្គ្រោះជាតិ បានស្នើឲ្យតុលាការទម្លាក់ការចោទប្រកាន់ ហើយដោះលែងឯកឧត្តម កឹម សុខា ឲ្យមានសេរីភាពឡើងវិញ។ គណបក្សសង្គ្រោះជាតិ ក៏បានអំពាវនាវទៅកាន់សហគមន៍អន្តរជាតិនានា ឲ្យជួយធ្វើអន្តរាគមន៍ផងដែរ ចំពោះការចាប់ខ្លួនឯកឧត្តម កឹម សុខា។

យ៉ាងណាក៏ដោយចុះ ចំណាត់ការរបស់សមត្ថកិច្ចនិងតុលាការ ទៅលើឯកឧត្តម កឹម សុខា បានទទួលការសាទរយ៉ាងខ្លាំងពីស្ថាប័ននានា នៅក្នុងប្រទេស។ សូម្បីតែគណៈកម្មាធិការអចិន្ត្រៃយ៍រដ្ឋសភា ក៏ចាត់ទុករបាយការណ៍របស់តុលាការ ស្តីពីចំណាត់ការលើឯកឧត្តម កឹម សុខា ថាត្រឹមត្រូវទៅតាមច្បាប់ដែរ៕