កីឡាជាតិ
ជាតិ
លីកកំពូលកម្ពុជា៖ ទ័ពប៉ះណាហ្គាវើលបន្ទាប់ពីថាយហ្គឹរជួបអាស៊ីអឺរ៉ុប និងគីរីវង់ស្វាគមន៍ភ្នំពេញក្រោន
× ក្រុមក្រសួងការពារជាតិ(ទ័ព)ជួបប្រកួតជាមួយក្រុមណាហ្គាវើលក្នុងសប្តាហ៍ទី១៥នៃពានរង្វាន់ក្របខណ្ឌមិត្តហ្វូនខេមបូឌានលីកប្រចាំឆ្នាំ២០១៧ នាវេលាម៉ោង៦ល្ងាចថ្ងៃទី៩ កញ្ញានេះ នៅកីឡដ្ឋានស្តាតចាស់។ មុនជំនួបរវាងក្រុមទាំងពីរ ខេមបូឌានថាយហ្គឺរបើកទ្វារកីឡដ្ឋានខេត្តសៀមរាបស្វាគមន៍អាស៊ីអឺរ៉ុប ខណៈម្ចាស់ផ្ទះគីរីវង់សុខសែនជ័យស្វាគមន៍ភ្នំពេញក្រោននាវេលាម៉ោង៣:៣០នាទីរសៀលដូចគ្នា។
ក្រោយសម្រាកអស់រយៈពេលជាង១ខែ ការប្រកួតបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីកឆ្នាំ២០១៧ នឹងបន្តការប្រកួតសប្តាហ៍ទី១៥នៅសៅរ៍ថ្ងៃទី៩ ខែកញ្ញានេះ។ ក្នុងនោះក្រុមឈរលេខរៀងទី២ទ័ព ត្រូវប្រជែងជាមួយក្រុមឈរលេខរៀងទី៤ណាហ្គាវើល នៅកីឡដ្ឋានស្តាតចាស់ម៉ោងនាវេលាម៉ោង៦ល្ងាចនេះ។ សម្រាប់ការប្រកួតក្នុងសប្តាហ៍ទី១៤កន្លងទៅ ទ័ពបានចាញ់ម្ចាស់ផ្ទះព្រះខ័នរាជស្វាយរៀង ៣-២ ខណៈណាហ្គាវើលស្មើ ១-១ ជាមួយបឹងកេត។
បើមើលពីប្រវត្តិជួបគ្នា៣លើករវាងក្រុមទាំងពីរក្នុងក្របខណ្ឌលីកកំពូលកន្លងមកណាហ្គាវើលមិនដែលយកឈ្នះទ័ពនោះឡើយ។ សម្រាប់ការប្រកួតជើងទី១កាលពីខែមិថុនា ឆ្នាំ២០១៧ ក្រុមទាំងពីរបានបញ្ចប់ត្រឹមលទ្ធផលស្មើ ១-១ នៅពហុកីឡដ្ឋានជាតិ។ នៅឆ្នាំ២០១៦ ក្នុងក្របខណ្ឌដដែលក្រុមទ័ពបានយកឈ្នះណាហ្គាវើលទាំងពីរជើងក្នុងលទ្ធផល ១-០ ដូចគ្នា។
ក្រៅពីជំនួបដ៏ជក់ចិត្តខាងលើ ខណៈក្រុមខេមបូឌានថាយហ្គឺរជួបអាស៊ីអឺរ៉ុបនៅកីឡដ្ឋានខេត្តស្វាយរៀងនាម៉ោង៣:៣០នាទី ក្រុមគីរីសុខសែនជ័យស្វាគមន៍ក្រុមឈរលេខរៀងទី៣ភ្នំពេញក្រោននៅកីឡដ្ឋានគីរីវង់លើទឹកដីរបស់ខ្លួន៕
Tag:
បាល់ទាត់
Cambodian League 2017
© រក្សាសិទ្ធិដោយ thmeythmey.com