ជាតិ
នយោបាយជាតិ
បោះឆ្នោត២០១៨៖ សង្គ្រោះជាតិ អាចពហិកា បើមេរបស់ខ្លួនមិនត្រូវបានដោះលែង
× ភ្នំពេញ៖ ការមិនដោះលែងឯកឧត្តម កឹម សុខា គឺជាកត្តាមួយ ក្នុងចំណោមកត្តាផ្សេងទៀត ដែលអាចនាំឲ្យបក្សប្រឆាំង បោះបង់ការបោះឆ្នោត ក្នុងឆ្នាំ២០១៨។ ប៉ុន្តែ ប្រធានបក្សកាន់អំណាច បានប្រកាសថា អវត្តមានបក្សប្រឆាំង មិនប៉ះពាល់ដល់ដំណើរការនៃការបោះឆ្នោតទាំងមូល នោះទេ។
សម្រាប់គណបក្សសង្គ្រោះជាតិ ការឃុំខ្លួនឯកឧត្តម កឹម សុខា គឺជាសម្ពាធមួយ ដែលធ្វើឲ្យស្ថានការណ៍នយោបាយ មានភាពអាប់អួ ហើយអាចនាំឲ្យការបោះឆ្នោតថ្នាក់ជាតិ នាអាណត្តិទី៦ ក្នុងឆ្នាំ២0១៨ ព្រឹត្តទៅដោយមិនសេរីនិងយុត្តិធម៌។ ប្រសិនបើឯកឧត្តម កឹម សុខា មិនត្រូវបានដោះលែងនោះទេ គណបក្សសង្គ្រោះជាតិ អាចនឹងមិនមានវត្តមាននៅក្នុងការបោះឆ្នោត នាពេលខាងមុខ។
លោកស្រី មូរ សុខហួរ តំណាងរាស្ត្រនិងជាអនុប្រធានមួយរូបនៃគណបក្សសង្គ្រោះជាតិ បានអះអាងថា ការឃុំខ្លួនឯកឧត្តម កឹម សុខា គឺជាលក្ខខណ្ឌអវិជ្ជាមានមួយ ក្នុងចំណោមលក្ខខណ្ឌអវិជ្ជាមានផ្សេងទៀត ដែលអាចនាំឲ្យគណបក្សសង្គ្រោះជាតិ សម្រេចចិត្តបោះបង់ការបោះឆ្នោតថ្នាក់ជាតិ នាអាណត្តិទី៦នេះ។ ចំពោះលោកស្រី មូរ សុខហួរ ការបោះឆ្នោតថ្នាក់ជាតិ នាអាណត្តិទី៦ មិនអាចប្រព្រឹត្តទៅដោយសេរីនិងយុត្តិធម៌ឡើយ ប្រសិនបើឯកឧត្តម កឹម សុខា នៅតែជាប់ឃុំក្នុងពន្ធនាគារ។
អនុប្រធានគណបក្សសង្គ្រោះជាតិរូបនេះ បញ្ជាក់យ៉ាងដូច្នេះថា៖«យើងត្រូវការការបោះឆ្នោតមួយ ដោយសេរី ត្រឹមត្រូវ និងយុត្តិធម៌។ បើ លោកប្រធាន កឹម សុខា មិនមានការដោះលែង មិនបានមកចូលរួមនៅក្នុងការបោះឆ្នោតខាងមុខ [ហើយបើ] កត្តានិងលក្ខខណ្ឌដទៃទៀត ដែលធ្វើឲ្យការបោះឆ្នោតដោយសេរីនិងយុត្តិធម៌ [ក៏មិនមានដែរនោះ] យើង មិនអាចចូលរួមនៅក្នុងការបោះឆ្នោតឡើយ។ [យើង មិនអាចចូលរួមនៅក្នុងការបោះឆ្នោតមួយ] ដែលមិនសេរី និងមិនយុត្តិធម៌ទេ ពីព្រោះ [ចំណុចនេះ] គឺធ្វើខុសពីឆន្ទៈនៃប្រជារាស្ត្រយើង»។
លោកស្រី មូរ សុខហួរ ថ្លែងដូច្នេះ ទៅកាន់ក្រុមអ្នកកាសែត នៅមុខពន្ធនាគារត្រពាំងផ្លុង ក្នុងខេត្តត្បូងឃ្មុំ នាព្រឹកថ្ងៃទី១១ ខែកញ្ញា ឆ្នាំ២0១៧។ ក្រុមតំណាងរាស្ត្រគណបក្សសង្គ្រោះជាតិ បាននាំគ្នា ធ្វើដំណើរទៅកាន់ពន្ធនាគារត្រពាំងផ្លុង ដើម្បីសុំឲ្យដោះលែងឯកឧត្តម កឹម សុខា។ ក្រុមតំណាងរាស្ត្រគណបក្សសង្គ្រោះជាតិ ក៏សុំចួលជួបឯកឧត្តម កឹម សុខា ដែលកំពុងជាប់ឃុំក្នុងពន្ធនាគារត្រពាំងផ្លុង ផងដែរ។ ប៉ុន្តែ សមត្ថកិច្ច ពុំអនុញ្ញាតឲ្យក្រុមតំណាងរាស្ត្រ ចូលជួបឯកឧត្តម កឹម សុខា នោះទេ។
ការធ្វើដំណើររបស់ក្រុមតំណាងរាស្ត្រគណបក្សសង្គ្រោះជាតិ ទៅកាន់ពន្ធនាគារត្រពាំងផ្លុង ស្របពេលដែលរដ្ឋសភា បើកកិច្ចប្រជុំវិសាមញ្ញ ពាក់ព័ន្ធនឹងករណីរបស់ឯកឧត្តម កឹម សុខា។ កិច្ចប្រជុំពេញអង្គនៃរដ្ឋសភា ដែលមានតែក្រុមតំណាងរាស្ត្រគណបក្សប្រជាជនកម្ពុជាចំនួន៦៧រូប ចូលរួម បានអនុម័តឲ្យតុលាការបន្តនីតិវិធីលើឯកឧត្តម កឹម សុខា។
ទោះជាមិនមានគណបក្សសង្គ្រោះជាតិ ក៏ដោយ ក៏ការបោះឆ្នោតថ្នាក់ជាតិ នាពេលខាងមុខ នៅតែអាចដំណើរការជាធម្មតាដែរ។ នេះជាការប្រកាសរបស់សម្តេច ហ៊ុន សែន ប្រធានគណបក្សប្រជាជនកម្ពុជា នៅក្នុងពិធីចែកសញ្ញាបត្រដល់និស្សិតនៃសាកលវិទ្យាល័យវិទ្យាសាស្ត្រសុខាភិបាល នៅព្រឹកថ្ងៃទី១១ ខែកញ្ញា ឆ្នាំ២0១៧។
បើតាមសម្តេច ហ៊ុន សែន ក្រៅពីគណបក្សសង្គ្រោះជាតិ នៅមានគណបក្សផ្សេងទៀត ដែលនឹងចូលរួមក្នុងការបោះឆ្នោត។ ប្រធានគណបក្សប្រជាជនកម្ពុជារូបនេះ ថែមទាំងព្រមានទៀតថា គណបក្សសង្គ្រោះជាតិ អាននឹងត្រូវបានរំលាយចោលតែម្តង ប្រសិនបើជាប់ពាក់ព័ន្ធនឹងអំពើក្បត់ជាតិ។
សូមរម្លឹកថា ក្រោយវីដេអូឃ្លីមមួយ ដែលផលិតដោយប្រព័ន្ធផ្សព្វផ្សាយឈ្មោះ CBN (Cambodian Broadcasting Network) ត្រូវបានបែកធ្លាយ នៅលើបណ្តាញសង្គមហ្វេសប៊ុក ឯកឧត្តម កឹម សុខា ក៏ត្រូវបានចាប់ខ្លួន ទាំងពាក់កណ្តាលអធ្រាត្រ នៅថ្ងៃទី២ ឈានចូលថ្ងៃទី៣ ខែកញ្ញា ឆ្នាំ២0១៧។ នៅក្នុងវីដេអូឃ្លីបនោះ ឯកឧត្តម កឹម សុខា និយាយថា ឯកឧត្តម មានជនបរទេសនៅពីក្រោយខ្នង ដើម្បីជួយណែនាំ ក្នុងការផ្លាស់ប្តូរមេដឹកនាំនៅកម្ពុជា។ តាមរយៈខ្លឹមសារនៅក្នុងវីដេអូឃ្លីបនោះ សមត្ថកិច្ចនិងតុលាការ រួមទាំងរដ្ឋាភិបាល បានអះអាងថា ឯកឧត្តម កឹម សុខា បានឃុបឃិតជាមួយជនបរទេសដោយសម្ងាត់ ដែលអាចធ្វើឲ្យប៉ះពាល់ដល់ប្រទេសជាតិ។ នៅទីបំផុត ឯកឧត្តម កឹម សុខា ត្រូវបានចោទពីបទ «សន្ទិដ្ឋិភាពជាមួយបរទេស» ដែលបទល្មើសនេះ ស្ថិតក្នុងអំពើក្បត់ជាតិ៕
© រក្សាសិទ្ធិដោយ thmeythmey.com