អន្តរជាតិ
ទណ្ឌកម្មថ្មីលើកូរ៉េខាងជើងចេញជារូបរាង តែគ្មានការបង្កកទ្រព្យលោក គីម ជុងអ៊ុន កិច្ចប្រជុំក្រុមប្រឹក្សាសន្តិសុខស្ដីពីការដាក់ទណ្ឌកម្មលើកូរ៉េខាងជើង (រូបភាពពីគេហទំព័រអង្គការសហប្រជាជាតិ)
× ដូចការគ្រោងទុក ក្រុមប្រឹក្សាសន្តិសុខអង្គការសហប្រជាជាតិ បានអនុម័តទណ្ឌកម្មថ្មីទៀតលើកូរ៉េខាងជើង ចំពោះការសាកល្បងគ្រាប់នុយក្លេអ៊ែរកាលពីថ្ងៃទី៣ ខែកញ្ញា។ ទណ្ឌកម្មលើកនេះផ្ដោតសំខាន់លើការរឹតត្បិតការនាំចូលប្រេងទៅកាន់កូរ៉េខាងជើង និងការហាមឃាត់ការនាំចេញផលិតផលវាយនភណ្ឌកូរ៉េខាងជើងទៅបរទេស។ ឯចិន និងរុស្ស៊ី ក៏បានគាំទ្រសំណើរបស់អាមេរិកដែរ ទោះជាធ្លាប់បង្ហាញជំហរប្រឆាំងការដាក់ទណ្ឌកម្មក្ដី។
ក្រុមប្រឹក្សាសន្តិសុខអង្គការសហប្រជាជាតិ នៅថ្ងៃទី១១ ខែកញ្ញា បានបោះឆ្នោតជាឯកច្ឆន្ទគាំទ្រសំណើ ដាក់ទណ្ឌកម្មលើកូរ៉េខាងជើង ដែលរៀបរៀងដោយអាមេរិក។ ដោយមានការគាំទ្រពីសំណាក់ចិន និងរុស្ស៊ី ទណ្ឌកម្មប្រឆាំងកូរ៉េខាងជើងលើកនេះ គឺជាទណ្ឌកម្មលើកទី៩ ចាប់តាំងពីឆ្នាំ២០០៦ មក។ ទណ្ឌកម្មពេលនេះរួមបញ្ចូលការហាមឃាត់ការនាំចេញផលិតវាយនភណ្ឌ និងការរឹតបន្តឹតការនាំចូលប្រភពថាមពល។
តាមពិតទៅ ទណ្ឌកម្មដែលទើបអនុម័តនេះ គឺជាសេចក្ដីព្រាងថ្មីមួយ ដែលមិនបានបញ្ចូលជំហររបស់អាមេរិកដែលចង់បង្កកទ្រព្យសម្បត្តិរបស់មេដឹកនាំកូរ៉េខាងជើង គីម ជុងអ៊ុន ឡើយ។ អាមេរិកទំនងជាបានដកចំណុចនេះចេញ ព្រោះចិន និងរុស្ស៊ី អាចប្រើសិទ្ធិវ៉េតូប្រឆាំងសំណើដាក់ទណ្ឌកម្មទាំងមូលមិនខាន។ នេះក៏ព្រោះតែចិន និងរុស្ស៊ី បានប្រកាសទុកមុនរួចហើយពីការមិនពេញចិត្តលើវិធានការចុងក្រោយនេះ។
បើតាមទណ្ឌកម្មថ្មីនេះ កូរ៉េខាងជើងត្រូវហាមឃាត់ពីការនាំចូលឧស្ម័នធម្មជាតិគ្រប់ប្រភេទទាំងផលិតផលរាវ ទាំងផលិតផលកំណកក។ លើសពីនោះ ការនាំចូលប្រេងឆៅក៏ត្រូវបានហាមឃាត់ ហើយកូរ៉េខាងជើងអាចនាំចូលប្រេងចម្រាញ់រួចហើយបានត្រឹមតែពីរលានបារ៉ែលប៉ុណ្ណោះក្នុងមួយឆ្នាំ។ ក្រៅពីបម្រាមនាំចូលផលិតផលវាយនភណ្ឌពីកូរ៉េខាងជើង សមាជិកអង្គការសហប្រជាជាតិក៏មិនត្រូវអនុញ្ញាតច្បាប់ការងារឲ្យជនជាតិកូរ៉េខាងជើងដែរ។
ក្នុងកិច្ចក្រុមប្រឹក្សាសន្តិសុខ អគ្គរដ្ឋទូតអាមេរិក Nikki Haley និយាយថា ទណ្ឌកម្មនេះ នឹងកាត់បន្ថយលំហូរហិរញ្ញវត្ថុចូលទៅកាន់កូរ៉េខាងជើង ហើយយ៉ាងហោចណាស់កូរ៉េខាងជើងត្រូវខាតបង់ប្រាក់ចំណូល១.៣ពាន់លានដុល្លារដែរ។ តំណាងអាមេរិករូបនេះ នៅតែបញ្ជាក់ជំហរថា អាមេរិកមិនចង់ធ្វើសង្គ្រាមជាមួយកូរ៉េខាងជើង ហើយកូរ៉េខាងជើងក៏មិនទាន់ដើរដល់ចំណុចដែលបកក្រោយលែងបានដែរ។
អ្វីគួរឲ្យចាប់អារម្មណ៍នោះ ទណ្ឌកម្មលើកូរ៉េខាងជើង គឺចេញជារូបរាងលឿនខុសពីធម្មតា។ ជាទម្លាប់ អាមេរិកតែងពិភាក្សាជាមួយចិនជាមុនសិនលើសំណើដាក់ទណ្ឌកម្ម មុននឹងជជែកជាមួយសមាជិកអចិន្ត្រៃយ៍ផ្សេងទៀត រួចទើបយកទៅអនុម័តតាមក្រោយ។ ប៉ុន្តែក្រោយការសាកល្បងចុងក្រោយនេះ អាមេរិកបានព្យាយាមរកផ្លូវដាក់ទណ្ឌកម្មឲ្យបានឆាប់ ហើយក៏បានបញ្ចុះបញ្ចូលចិន និងរុស្ស៊ីឲ្យយល់ព្រមតាមខ្លួនដែរ៕
Tag:
UN
អាមេរិក
កូរ៉េខាងជើង
នុយក្លេអ៊ែរ
ទណ្ឌកម្ម
© រក្សាសិទ្ធិដោយ thmeythmey.com