ជាតិ
សេដ្ឋកិច្ច
ភ្ជុំបិណ្ឌ៖ លោក ថោង ខុន ព្រមានចាត់ការ លើម្ចាស់អាជីវកម្មទេសចរណ៍ដែលដំឡើងថ្លៃសេវា រូបភាពពីហ្វេសប៊ុកក្រសួងទេសចរណ៍
× ក្រសួងទេសចរណ៍បានចេញសារាចរណែនាំ ដល់មន្ទីរទេសចរណរ៍រាជធានី-ខេត្ត អាជ្ញាធរពាក់ព័ន្ធ និងប្រតិបត្តិករទេសចរណ៍ អំពីការពង្រីកគុណភាពផលិតភាព និងសេវាកម្មទេសចរណ៍ ក្នុងឱកាសបុណ្យភ្ជុំបិណ្ឌ ដែលប្រព្រឹត្តទៅនៅថ្ងៃទី ១៩ដល់ថ្ងៃទី២១ ខែកញ្ញានេះ។ ក្រសួងទេសចរណ៍ ក៏បានគូសបញ្ជាក់ ឲ្យម្ចាស់អាជីវកម្មទេសចរណ៍ កំណត់តម្លៃសេវា និងផលិតផលរបស់ខ្លួន និងប្រាប់ឲ្យភ្ញៀវបានដឹង។ ក្រសួង ក៏ហាមម្ចាស់អាជីវកម្មទេសចរណ៍ ដំឡើងថ្លៃសេវាកម្ម ឬផលិតផលរបស់ខ្លួនដែរ ក្នុងករណីមិនអនុវត្តតាមតារាងតម្លៃនដែលកំណត់ និងបិទផ្សាយ ម្ចាស់អាជីវកម្ម ឬសេវាកម្ម នឹងទទួលខុសត្រូវមុខច្បាប់។
ក្នុងឱកាសបុណ្យភ្ជុំបិណ្ឌនេះ ក្រសួងទេសចរណ៍ បានណែនាំឲ្យម្ចាស់អាជីវកម្មទេសចរណ៍ទាំងអស់ កំណត់ និងបិទផ្សាយតម្លៃសេវា និងផលិតផលរបស់ខ្លួនឲ្យភ្ញៀវបានដឹង និងមិនត្រូវយកថ្លៃលើសតម្លៃដែលកំណត់ឡើយ។ ក្នុងករណីមិនអនុវត្តតាមតារាងតម្លៃនដែលកំណត់ និងបិទផ្សាយ ម្ចាស់អាជីវកម្ម ឬសេវាកម្ម នឹងទទួលខុសត្រូវមុខច្បាប់។ នេះបើយោងតាម សារាចរណែនាំ ដែលចុះហត្ថលេខាដោយ លោក ថោង ខុន រដ្ឋមន្ត្រីក្រសួងទេសចរណ៍ នៅថ្ងៃទី១១ ខែកញ្ញា ដែលសរសេរបញ្ជាក់ដូច្នេះ៖«ករណីម្ចាស់អាជីវកម្មទេសចរណ៍ មិនអនុវត្តតាមតារាងតម្លៃដែលបានកំណត់ និងបិទផ្សាយ ម្ចាស់មូលដ្ឋានអាជីវកម្ម ឬសេវាកម្មត្រូវទទួលខុសត្រូវចំពោះមុខច្បាប់ជាធរមាន»។
ក្រៅពីនេះ ក្រសួង ក៏បានណែនាំដល់ប្រធានមន្ទីរទេសចរណ៍ទាំងអស់ត្រូវរៀបចំទីចំណតជូនភ្ញៀវទេសចរឲ្យបានល្អប្រសើរ នៅតាមគោលដៅទេសចរណ៍ និងរមណីយដ្ឋានទេសចរណ៍នានា ព្រមទាំងសហការជាមួយសាលារាជធានី-ខេត្ត និងអាជ្ញាធរគ្រប់លំដាប់ថ្នាក់ ដើម្បីធានាពីសន្តិសុខ សុវត្ថិភាព រក្សាសណ្ដាប់ធ្នាប់សាធារណៈ។
មន្ទីរទេសចរណ៍គ្រប់រាជធានី-ខេត្ត ក៏ត្រូវសហការជាមួយមន្ទីរ និងផ្នែកពាក់ព័ន្ធនានា ក្នុងការអប់រំម្ចាស់មូលដ្ឋានអាជីវកម្ម សេវាកម្មទេសចរណ៍ ពិសេសភោជនីយដ្ឋាន អាហារដ្ឋានទេសចរណ៍ ពីបរិស្ថាន ភាពស្អាត អនាម័យ និងសុវត្ថិភាព ដោយកុំចោលសំរាម និងកាកសំណល់ផ្សេងៗ។ ម្យ៉ាងទៀត ត្រូវធានាភាពស្អាតនៃអនាម័យបង្គន់សាធារណៈ ភោជនីយដ្ឋាន អាហារដ្ឋាន និងរមណីយដ្ឋានទេសចរណ៍ ការស្លៀកពាក់ឯកសណ្ឋានសមរម្យរបស់បុគ្គលិកបម្រើការងារ និងផ្ដល់បដិសណ្ឋារកិច្ចល្អ ចំពោះភ្ញៀវទេសចរ។ ជាមួយគ្នានេះដែរ មន្ទីរទេសចរណ៍រាជធានី-ខេត្ត ក៏ត្រូវសហការជាមួយសាលារាជធានី-ខេត្ត និងប្រព័ន្ធផ្សព្វផ្សាយ វិទ្យុ និងទូរទស្សន៍ជាដើម ដើម្បីផ្សាយស្ប៉តអប់រំទេសចរណ៍ និងចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» ឲ្យកាន់តែទូលាយផងដែរ៕
Tag:
ថោង ខុន
ទេសចរណ៍
ភ្ជុំបិណ្ឌ
© រក្សាសិទ្ធិដោយ thmeythmey.com