លោក កែវ រ៉េមី ប្រាប់កីឡាករដែលចូលរួមប្រកួតនៅកូរ៉េខាងជើង ត្រូវមានទំទុកចិត្តខ្ពស់ និងមើលដៃគូឲ្យតូច

កីឡាជាតិ

ជាតិ

លោក កែវ រ៉េមី ប្រាប់កីឡាករដែលចូលរួមប្រកួតនៅកូរ៉េខាងជើង ត្រូវមានទំទុកចិត្តខ្ពស់ និងមើលដៃគូឲ្យតូច

16, Sep 2017 , 11:32 am

រូបភាព

ដោយ:

ប្រធានសហព័ន្ធកីឡាតេក្វាន់ដូ ITF កម្ពុជា លោក កែវ រ៉េមី ប្រាប់ឲ្យកីឡាករដែលចូលរួមប្រកួតជើងឯកពិភពលោក នៅប្រទេសកូរ៉េខាងជើង កុំមានអារម្មណ៍ភិតភ័យ និងតក់ស្លុត ពេលជួបជាមួយម្ចាស់ក្បាច់គុន។ លើសពីនេះ លោក ជំរុញឲ្យកីឡាករ ត្រូវមើលដៃគូប្រជែងឲ្យតូចជាងខ្លួនជានិច្ច។ ការជំរុញនេះ ដោយសារលោកយល់ថា ការមានទំនុកចិត្តលើខ្លួនឯង ជាកត្តាកំណត់ភាពជោគជ័យ។

នៅក្នុងពិធីជួបសំណេះសំណាល ជាមួយថ្នាក់ដឹកនាំ គ្រូបង្វឹក និងអត្តពលិក មុនថ្ងៃចេញដំណើរ កាលពីពេលថ្មីៗនេះ លោក កែវ រ៉េមី ប្រាប់ឲ្យកីឡាករដែលចូលរួមប្រកួតជើងឯកពិភពលោកនៅប្រទេសកូរ៉េខាងជើង ត្រូវដាក់គោលដៅឲ្យខ្ពស់ និងមានទំនុកចិត្តលើខ្លួនឯង។ ការជំរុញបែបនេះ ដោយសារលោកយល់ថា ទំនុកចិត្តជាកត្តាចម្បងជាងគេក្នុងការកំណត់ភាពជោគជ័យ។

ជាមួយគ្នានេះ ប្រធានសហព័ន្ធកីឡាតេក្វាន់ដូ ITF កម្ពុជារូបនេះ បានជំរុញឲ្យកីឡាករទាំងអស់ ត្រូវតាំងចិត្ត និងផ្តោតសំខាន់លើការប្រកួត ដោយដាក់គោលដៅត្រូវយកឈ្នះលើគូប្រកួត ពោលគឺកុំបាក់ទឹកចិត្ត ឬតក់ស្លុត ពេលជួបជាមួយម្ចាស់ក្បាច់គុន ឬជើងខ្លាំងណាក៏ដោយ។ ប្រធានសហព័ន្ធរូបនេះផ្តាំឲ្យកីឡាករទាំងអស់ ប្រឹងប្រែងប្រកួតឲ្យអស់ពីសមត្ថភាព ហើយជៀងវាងការប្រើប្រាស់សារធាតុហាមឃាត់ និងកលល្បិច ដើម្បីយកឈ្នះដៃគូ ដែលនាំឲ្យប៉ះពាល់ដល់កិត្តិយសប្រទេសជាតិ។ «កីឡាករទាំងអស់កុំបាក់ទឹកចិត្ត និងតក់ស្លុតឲ្យសោះ ពេលប៉ះម្ចាស់ក្បាច់គុន ឬជើងខ្លាំង ពោលគឺត្រូវតាំងចិត្តយកឈ្នះឲ្យបាន ដើម្បីកិត្តិយសខ្លួនឯង និងប្រទេសជាតិ។ ពេលប្រកួតយើងត្រូវផ្តោតអារម្មណ៍ ជឿជាក់លើខ្លួនឯង អត់រំភើប អត់ខឹង ហើយត្រូវមើលដៃគូ ទោះធំយ៉ាងណា មើលឲ្យតូចដូចចៃ»។ នេះជាការជំរុញរបស់ លោក កែវ រ៉េមី។

លោក កែវ រ៉េមី ប្រធានសហព័ន្ធកីឡាតេក្វាន់ដូ ITF បានដឹកនាំប្រតិភូ គ្រូបង្វឹក និងអត្តពលិកដោយផ្ទាល់ ដើម្បីចូលរួមប្រកួតជើងឯកពិភពលោក 20th ITF World Champions 2017 នៅទីក្រុងព្យុងយ៉ាងប្រទេសកូរ៉េខាងជើង។ ការប្រកួតនេះរៀបចំឡើងចន្លោះពីថ្ងៃទី១៥ ដល់ថ្ងៃទី២២ ខែកញ្ញា ខណៈប្រតិភូកីឡាកម្ពុជា បានចាកចេញពីមាតុប្រទេសកាលពីថ្ងៃទី១៤ ខែកញ្ញា៕