តំបន់ទេសចរថ្មី ពាម-ស្រេះ ក្នុងស្រុកព្រះនេត្រព្រះ ទាក់ទាញទេសចរទៅកម្សាន្តក្នុងរដូវភ្ជុំបិណ្ឌ

ជាតិ

តំបន់ទេសចរថ្មី ពាម-ស្រេះ ក្នុងស្រុកព្រះនេត្រព្រះ ទាក់ទាញទេសចរទៅកម្សាន្តក្នុងរដូវភ្ជុំបិណ្ឌ

20, Sep 2017 , 12:19 pm

រូបភាព

ដោយ: ញឹក ស្រីល័ក្ខ (Nhek Sreyleak)

បន្ទាយមានជ័យ៖ តំបន់ទេសចរកកើតថ្មី ក្នុងទឹកដីស្រុកព្រះនេត្រព្រះ ខេត្តបន្ទាយមានជ័យ គឺ «ពាម-ស្រេះ ឬស្ពាន ៧៥» ជាតំបន់ដែលទាក់ទាញភ្ញៀវទេសចរយ៉ាងច្រើនកុះករមកលេងកម្សាន្ត។ តំបន់ពាម-ស្រេះ ស្ថិតនៅលើផ្លូវថ្មី ដែលទើបស្ថាបនារូចរាល់ ចេញពីស្រុកព្រះនេត្រព្រះ ឆ្ពោះទៅរង្វង់មូល យាយជី ស្រុកមង្គលបុរី។ ប្រជាពលរដ្ឋ និងអ្នកដំណើរឆ្លងកាត់ផ្លូវនេះ បានឈប់សម្រាក ដើម្បីគយគន់ទេសភាពវាលស្រែ ,ហែលទឹកលេង និងទទួលអាហារនៅទីនោះផងដែរ។

នៅលើផ្លូវថ្មីសន្លាង មើលទៅជាតំបន់ធម្មតា ដែលមានផ្លូវ និងស្ពានទើបសាងសង់ថ្មី ប៉ុន្តែសម្រាប់អ្នកស្រុកព្រះនេត្រព្រះ ឬពលរដ្ឋក្នុងខេត្តបន្ទាយមានជ័យ តំបន់នោះ ជាតំបន់ទេសចរថ្មី។ តំបន់ «ពាម-ស្រេះ ឬស្ពាន ៧៥» ស្ថិតនៅជាប់ភូមិពាម និងភូមិស្រេះ ឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យ។

នៅថ្ងៃចុងសប្ដាហ៍ និងថ្ងៃបុណ្យទាន ប្រជាពលរដ្ឋ និងអ្នកធ្វើដំណើរឆ្លងកាត់ផ្លូវនេះ បានឈប់សម្រាកនៅតំបន់ ពាម-ស្រេះ នេះ ដើម្បីមើលទេសភាពដ៏ស្រស់ស្អាត ឬអ្នកខ្លះមកហែលទឹក នៅក្រោមស្ពាន និងអ្នកខ្លះទៀត មកជួបជុំក្រុមគ្រួសារទទួលទានអាហារនៅតាមតូប ក្នុងតំបន់នោះផងដែរ។ តំបន់នេះ មានវាលស្រែខៀវខ្ចីអមសងខាងផ្លូវ បានលើកសម្រស់ទេសភាពយ៉ាងស្រស់ស្អាត។

លោក លី សុវណ្ណរឹទ្ធ អភិបាលស្រុកព្រះនេត្រព្រះ បានប្រាប់សារព័ត៌មានថ្មីៗ តាមទូរសព្ទថា តំបន់ដែលប្រជាពលរដ្ឋ ទៅលេងកម្សាន្តនេះ ជាតំបន់ទេសចរថ្មី ដែលគេហៅថា «ស្ពាន៧៥ ឬពាម-ស្រេះ»។ តំបន់នេះ ទើបតែកើតឡើង ក្រោយការដ្ឋានស្ថាបនាផ្លូវ និងស្ពាននៅតំបន់នោះ។ លោកអភិបាលស្រុករូបនេះ បញ្ជាក់ថា តំបន់នេះ បានទាក់ទាញភ្ញៀវទេសចរក្នុងខេត្តនេះ និងអ្នកធ្វើដំណើរឆ្លងកាត់ផ្សេងៗជាច្រើន មកកម្សាន្តជាប្រចាំនៅថ្ងៃចុងសប្ដាហ៍ ជាពិសេសរដូវភ្ជុំបិណ្ឌនេះ។

លោក លី សុវណ្ណរឹទ្ធ អះអាងថា ខណៈដែលប្រជាពលរដ្ឋមកកម្សាន្តនៅទីនេះច្រើន អាជ្ញាធរ និងប្រជាការពារ បានចុះទៅថែរក្សាសុវត្ថិភាព និងសន្តិសុខជូនពលរដ្ឋផងដែរ។ ទន្ទឹមនឹងនេះ លោកអភិបាលស្រុករូបនេះ ក៏បានចុះណែនាំដល់អាជីវករដែលលក់ដូរនៅតំបន់នេះ ឲ្យចេះថែរក្សាអនាម័យ និងគ្រប់គ្រងកាកសំណល់ឲ្យបានត្រឹមត្រូវផងដែរ។

ជាកសិកររស់នៅក្នុងឃុំព្រះនេត្រព្រះ លោក ណាក់ សុឃួន បានប្រាប់ឲ្យដឹងថា តំបន់ ពាម-ស្រេះ នេះ សម្បូរមនុស្សមកលេងជាប្រចាំនៅថ្ងៃចុងសប្ដាហ៍ និងថ្ងៃបុណ្យទាន។ កសិករូបនេះ បន្ថែមថា ពីមុនមិនមានអ្នកមកកម្សាន្តនៅទីនេះទេ ប៉ុន្តែក្រោយពីសាងសង់ស្ពាន និងផ្លូវស្អាតរួចមក ពលរដ្ឋក្នុងខេត្តនេះ ជាច្រើនបានសម្រុកមកលេងជាហូរហែ។ លោក ណាក់ សុឃួន បញ្ជាក់ថា ប្រជាពលរដ្ឋនៅតំបន់នេះ អាចរកប្រាក់ចំណូលបន្ថែម ដោយសារមានភ្ញៀវទេសចរមកលេងច្រើន។

ចំណែកអ្នកលក់ប្រហិតវិញ លោក ឡឹក ប៊ុនរឹទ្ធ បានលើកឡើងថា លោក បានមកលក់នៅតំបន់នេះ ដោយសារលឺតាមគេ ថា តំបន់នេះ សម្បូរមនុស្សមកលេងច្រើន។ លោក ឡឹក ប៊ុនរឹទ្ធ ជាអ្នកស្រុកមង្គលបុរី បានមកលក់ប្រហិតតាមរទេះ នៅតំបន់នេះ ជាប្រចាំនៅរៀងរាល់ថ្ងៃ ចាប់ពីម៉ោង ៣រសៀល ដល់ ម៉ោង ៧យប់។ អ្នកលក់ប្រហិតរូបនេះ និយាយថា លោកអាចរកចំណូលបានច្រើន ព្រោះនៅទីនេះលក់ដាច់ណាស់ ដោយសារមនុស្សមកលេងច្រើន។ លោក ឡឹក ប៊ុនរឹទ្ធ ប្រាប់ថា អ្នកមកលេងនៅទីនេះ មានគ្រប់វ័យ មានអ្នកមកលេងជាលក្ខណៈក្រុមគ្រួសារ និងជាក្រុមផងដែរ។

សូមបញ្ជាក់ថា តំបន់ «ពាម-ស្រេះ ឬស្ពាន ៧៥»នេះ ស្ថិតនៅជាប់ភូមិពាម និងភូមិស្រេះ ឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យ។ ផ្លូវថ្មីសន្លាងនេះ ស្ថាបនាចេញពីស្រុកព្រះនេត្រព្រះ ឆ្ពោះទៅរង្វង់មូល យាយជី ស្រុកមង្គលបុរី ខេត្តបន្ទាយមានជ័យ៕