ភ្ជុំបិណ្ឌ៖ ទេសចរជាតិសម្រុកមកលេងខេត្តសៀមរាបច្រើនគួរឲ្យកត់សម្គាល់

ជាតិ

សេដ្ឋកិច្ច

ភ្ជុំបិណ្ឌ៖ ទេសចរជាតិសម្រុកមកលេងខេត្តសៀមរាបច្រើនគួរឲ្យកត់សម្គាល់

22, Sep 2017 , 12:34 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ដូចរាល់ឆ្នាំ ឲ្យតែមានបុណ្យទានសំខាន់ៗ ដូចជាភ្ជុំបិណ្ឌ ឬបុណ្យចូលឆ្នាំ ប្រជាពលរដ្ឋតាមបណ្តាខេត្តនានា តែងធ្វើដំណើរមកកម្សាន្តនៅខេត្តសៀមរាប។ ដោយសារ សម្បូរទាំងប្រាង្គប្រាសាទ និងរមណីយដ្ឋានទេសចរណ៍ធម្មជាតិ (ភ្នំគូលែន) ខេត្តសៀមរាប បានក្លាយជាគោលដៅទេសចរណ៍មួយ ដែលតែងទាក់ទាញភ្ញៀវទេសចរជាតិ និងអន្តរជាតិ ឲ្យចូលមកទស្សនា ហើយក្នុងពិធីបុណ្យភ្ជុំបិណ្ឌនេះ គេសង្កេតឃើញថា មានទេសចរជាតិជា ច្រើន បានសម្រុកមកកម្សាន្តក្នុងខេត្តមួយនេះ។

បើតាមភ្នាក់ងារទេសចរណ៍ប្រចាំប្រាសាទអង្គរវត្ត ក្នុងរយៈពេលប៉ុន្មានថ្ងៃក្នុងពិធីបុណ្យភ្ជុំបិណ្ឌនេះ គឺមានប្រជាពលរដ្ឋខ្មែរជាច្រើន បានចូលមកកម្សាន្ត។ ពួកគេទាំងនោះ ជាអ្នកមកពីបណ្តាខេត្តនានា ដោយធ្វើដំណើរតាមរថយន្តជាលក្ខណៈគ្រួសារ និងមានការ រៀបចំអាហារដាក់តាមខ្លួនផងដែរ។

ក្រៅពីតំបន់ប្រាសាទ នៅតំបន់កម្សាន្តមួយចំនួន ក៏សម្បូរភ្ញៀវទៅផងដែរ ក្នុងនោះរួមមាន រមណីយដ្ឋានភ្នំគូលែន តំបន់ផាប់ស្ទ្រីតដ៏ពេញនិយមសម្រាប់ភ្ញៀវជាតិ និងអន្តរជាតិ រមណីយដ្ឋានត្រាវកុដិ កំពង់ភ្លក់ និងភ្នំក្រោមជាដើម។ល។

របាយការណ៍ពីក្រសួងទេសចរណ៍ ភ្ញៀវទេសចរមកកម្សាន្តនៅខេត្តសៀមរាប អំឡុងពេលបិណ្យភ្ជុំបិណ្ឌឆ្នាំនេះ សរុបមានចំនួន ១៤៣,៦៩៣នាក់ កើនឡើង ៤.៨១% ក្នុងនោះ ភ្ញៀវជាតិមានចំនួន ១២៦,០០០នាក់ កើនឡើង ៥% ភ្ញៀវអន្តរជាតិមានចំនួន ១៧,៦៩៣នាក់ កើនឡើង ៣.៥២%៕

ខាងក្រោមនេះជាទិដ្ឋភាពខ្លះៗ ដែលទេសចរជាតិដើរកម្សាន្តនៅប្រាសាទអង្គរវត្ត នាថ្ងៃទី២១ កញ្ញា ឆ្នាំ២០១៧