ជាតិ
នយោបាយជាតិ
បក្សប្រឆាំង ស្នើឲ្យមេពន្ធនាគារ ដឹកឯកឧត្តម កឹម សុខា ពីត្បូងឃ្មុំ ទៅចូលសវនាការនៅភ្នំពេញ រូបភាព៖ ឯកឧត្តម កឹម សុខា ប្រធានគណបក្សសង្គ្រោះជាតិ ត្រូវបានចាប់ខ្លួនដល់គេហដ្ឋាន ទាំងកណ្តាលអធ្រាត្រ នៅម៉ោងប្រហែលជា ១២ និង៣0នាទី នាថ្ងៃទី២ ឈានចូលថ្ងៃទៅ៣ ខែកញ្ញា ឆ្នាំ២0១៧។
× ភ្នំពេញ៖ បក្សប្រឆាំង អះអាងថា ការបើកសវនាការនៃសាលាឧទ្ធរណ៍ នាពេលខាងមុខ នឹងមិនមានភាពត្រឹមត្រូវតាមច្បាប់ឡើយ បើអវត្តមានរបស់ឯកឧត្តម កឹម សុខា ដែលជាជនត្រូវចោទ។ ដូច្នេះ បក្សប្រឆាំង ក៏ស្នើទៅមេពន្ធនាគារ ដើម្បីសុំឲ្យបញ្ជូនឯកឧត្តម កឹម សុខា ពីពន្ធនាគារក្នុងខេត្តត្បូវឃ្មុំ ទៅចូលរួមសវនាការនៃសាលាឧទ្ធរណ៍ ក្នុងរាជធានីភ្នំពេញ។
គណបក្សសង្គ្រោះជាតិ បានចេញសេចក្តីថ្លែងការណ៍មួយ ដោយស្នើឲ្យអគ្គនាយកដ្ឋានពន្ធនាគារ ដឹកឯកឧត្តម កឹម សុខា ពីពន្ធនាគារត្រពាំងផ្លុង ក្នុងខេត្តត្បូងឃ្មុំ ទៅចូលរួមសវនាការនៃសាលាឧទ្ធរណ៍ ក្នុងរាជធានីភ្នំពេញ តាមកាលកំណត់ ដែលនឹងប្រព្រឹត្តទៅនៅថ្ងៃទី២៦ ខែកញ្ញា ឆ្នាំ២0១៧។ លោកស្រី មូរ សុខហួរ អនុប្រធានគណបក្សសង្គ្រោះជាតិ បានបញ្ជាក់ប្រាប់សារព័ត៌មានថ្មីៗថា គណបក្សសង្គ្រោះជាតិ ពិតជាបានចេញសេចក្តីថ្លែងការណ៍ខាងលើមែន។
សំណើរបស់គណបក្សសង្គ្រោះជាតិ តាមរយៈសេចក្តីថ្លែងការណ៍ ដែលចុះនៅថ្ងៃទី២៣ ខែកញ្ញា ឆ្នាំ២0១៧ គឺធ្វើឡើងបន្ទាប់ពីអគ្គនាយកដ្ឋានពន្ធនាគារ បានបង្ហាញក្តីបារម្ភពីសន្តិសុខនិងសុវត្ថិភានៅតាមផ្លូវ ប្រសិនបើបញ្ជូនឯកឧត្តម កឹម សុខា ពីពន្ធនាគារត្រពាំងផ្លុង ក្នុងខេត្តត្បូងឃ្មុំ ទៅចូលរួមសវនាការនៃសាលាឧទ្ធរណ៍ ក្នុងរាជធានីភ្នំពេញ។ ដោយក្តីបារម្ភពីសន្តិសុខនិងសុវត្ថិភាពរបស់ឯកឧត្តម កឹម សុខា អគ្គនាយដ្ឋានពន្ធនាគារ ក៏បានផ្ញើលិខិតមួយច្បាប់ ទៅកាន់អគ្គព្រះរាជអាជ្ញានៃសាលាឧទ្ធរណ៍ ដើម្បីសុំឲ្យពិចារណា អំពីរឿងនេះ។
នៅក្នុងសេចក្តីថ្លែងការណ៍ គណបក្សសង្គ្រោះជាតិ បានចាត់ទុក ហេតុផលរបស់អគ្គនាយកដ្ឋានពន្ធនាគារខាងលើ ថាជាលេស ដើម្បីឲ្យឯកឧត្តម កឹម សុខា អវត្តមានពីសវនាការនៃសាលាឧទ្ធរណ៍។ តាមរយៈសេចក្តីថ្លែងការណ៍ គណបក្សសង្គ្រោះជាតិ មិនត្រឹមតែស្នើទៅអគ្គនាយកដ្ឋានពន្ធនាគារនោះទេ តែក៏បានស្នើឲ្យសាលាឧទ្ធរណ៍ គោរពនីតិវិធីផងដែរ ដើម្បីធានានិងការពារសិទ្ធិរបស់ឯកឧត្តម កឹម សុខា ក្នុងការទទួលបានយុត្តិធម៌។
គណបក្សសង្គ្រោះជាតិ បានសរសេរក្នុងសេចក្តីថ្លែងការណ៍នោះ យ៉ាងដូច្នេះ៖«មេធាវីការពារក្តីបានបញ្ជាក់ថា ឯកឧត្តម កឹម សុខា មានបំណងយ៉ាងមុតមាំក្នុងការចូលរួមសវនាការ។ [….] ការមិនអនុញ្ញាតឲ្យឯកឧត្តម កឹម សុខា ចូលរួមសវនាការ នឹងធ្វើឲ្យលទ្ធផលនៃការជំនុំជម្រះ មិនត្រឹមត្រូវ តាមច្បាប់»។
គម្រោងនៃការបើកសវនាការ នៅថ្ងៃទី២៦ ខែកញ្ញា ឆ្នាំ២0១៧ នេះ គឺធ្វើឡើងតាមសំណើរបស់ក្រុមមេធាវី ដែលការពារក្តីឲ្យឯកឧត្តម កឹម សុខា។ ក្រុមមេធាវី បានប្តឹងទៅកាន់សាលាឧទ្ធរណ៍ ដើម្បីសុំប្រឆាំងនឹងដីការបស់សាលាដំបូងរាជធានីភ្នំពេញ ក្នុងឃុំខ្លួនឯកឧត្តម កឹម សុខា។ សម្រាប់ក្រុមមេធាវី ការឃុំខ្លួនឯកឧត្តម កឹម សុខា គឺមិនស្របតាមនីតិវិធីនោះទេ។
លោក សំ សុគង់ មេធាវីមួយរូបក្នុងចំណោមមេធាវីទាំងប្រាំរូបរបស់ឯកឧត្តម កឹម សុខា ធ្លាប់បកស្រាយថា ការចាប់ខ្លួនឯកឧត្តម កឹម សុខា ទាំងពាក់កណ្តាលអធ្រាត្រ គឺជាប្រការ ដែលច្បាប់ហាមឃាត់។ លោក បន្ថែមថា ម្យ៉ាងទៀត ឯកឧត្តម កឹម សុខា មិនបានប្រព្រឹត្តបទល្មើសជាក់ស្តែងនោះទេ ដូច្នេះការចោទប្រកាន់ឬការចាប់ខ្លួនឯកឧត្តម កឹម សុខា តម្រូវឲ្យមានការដកអភ័យឯកសិទ្ធិសភាជាមុនសិន។ ផ្អែកលើហេតុផលទាំងនេះ ហើយដែលក្រុមមេធាវីបានប្តឹងទៅសាលាឧទ្ធរណ៍ ប្រឆាំងនឹងសាលាដំបូងរាជធានីភ្នំពេញ ក្នុងការឃាត់និងឃុំខ្លួនឯកឧត្តម កឹម សុខា។
ទោះជាក្រុមមេធាវីយល់យ៉ាងនេះក្តី ប៉ុន្តែសម្រាប់សមត្ថកិច្ចនិងតុលាការ ឯកឧត្តម កឹម សុខា បានប្រព្រឹត្តបទល្មើសជាក់ស្តែង ដោយផ្អែកលើវីដេអូឃ្លីបមួយ ដែលផលិតដោយប្រព័ន្ធផ្សព្វផ្សាយឈ្មោះ CBN ហើយត្រូវបានបង្ហោះលើបណ្តាញសង្គមហេ្វសប៊ុក។ នៅក្នុងវីដេអូឃ្លីបនោះ ឯកឧត្តម កឹម សុខា បាននិយាយថា ឯកឧត្តម មានអ្នកជំនាញជាជនបរទេស នៅពីក្រោយខ្នង ដើម្បីជួយណែនាំ ក្នុងការផ្លាស់ប្តូរមេដឹកនាំនៅកម្ពុជា។
ក្រោយវីដេអូឃ្លីបនោះ បានបែកធ្លាយ សមត្ថកិច្ច បានទៅចាប់ឯកឧត្តម កឹម សុខា ដល់គេហដ្ឋាន ទាំងពាក់កណ្តាលអធ្រាត្រ ម៉ោងប្រហែល១២ និង៣0នាទី ថ្ងៃទី២ ឈានចូលថ្ងៃទី៣
ខែកញ្ញា ឆ្នាំ២0១៧។ បច្ចុប្បន្ន ឯកឧត្តម កឹម សុខា កំពុងជាប់ឃុំក្នុងពន្ធនាគារត្រពាំងផ្លុង ខេត្តត្បូងឃ្មុំ ដោយរងបទចោទ «សន្ទិដ្ឋិភាពជាមួយបរទេស» ដែលបទល្មើសនេះ ស្ថិតក្នុងអំពើក្បត់ជាតិ៕
© រក្សាសិទ្ធិដោយ thmeythmey.com