ជាតិ
ក្រសួងពាណិជ្ជកម្ម អនុញ្ញាតឲ្យប្ដូរឈ្មោះក្រុមហ៊ុនសុខា មិនមែនប្តូរឈ្មោះរមណីយដ្ឋានបូកគោទេ
× ភ្នំពេញ៖ ក្រសួងពាណិជ្ជកម្ម បានចេញសេចក្ដីជូនដំណឹងជុំវិញការចុះហត្ថលេខា លើលិខិតប្ដូរនាមករណ៍របស់ក្រុមហ៊ុនសុខាអូតែល ពីសាខាក្រុមហ៊ុនសុខាអូតែល «ឋានសួគ៌បូកគោ» ទៅជា សាខាក្រុមហ៊ុន សុខាអូតែល «សុខាឋានសួគ៌»។ ក្រសួងពាណិជ្ជកម្ម បញ្ជាក់ថា ការប្ដូរនាមករណ៍នេះ ក្នុងគោលបំណងបញ្ជាក់ថា ក្រុមហ៊ុនសុខាអូតែល មានសាខាធ្វើអាជីវកម្មតាមខេត្តតែប៉ុណ្ណោះ។ នេះបើតាមសេចក្ដីជូនរបស់ក្រសួងពាណិជ្ជកម្ម នៅព្រឹកថ្ងៃទី ២៤ ខែកញ្ញា ឆ្នាំ២០១៧នេះ។
បើតាមសេចក្ដីជូនដំណឹងរបស់ក្រសួងពាណិជ្ជកម្ម ជុំវិញការចុះហត្ថលេខាលើលិខិតប្ដូរនាមករណ៍របស់សាខាក្រុមហ៊ុនសុខាអូតែល ពីសាខាក្រុមហ៊ុនសុខាអូតែល «ឋានសួគ៌បូកគោ» ទៅជា សាខាក្រុមហ៊ុន សុខាអូតែល «សុខាឋានសួគ៌» ក្នុងគោលបំណងបញ្ជាក់ថា ក្រុមហ៊ុនសុខាអូតែល មានសាខាធ្វើអាជីវកម្មតាមខេត្តតែប៉ុណ្ណោះ។
ជាមួយគ្នានេះ ក្រសួងពាណិជ្ជកម្ម លើកឡើងថា ចំពោះការលើកស្លាកគឺត្រូវលើកនៅលើអគារទីស្នាក់ការសាខាក្រុមហ៊ុនរបស់ខ្លួនតែប៉ុណ្ណោះ ក្នុងការបង្កលក្ខណៈងាយស្រួលដល់អាជ្ញាធរ បំពេញបែបបទពន្ធដារ និងនីតិវិធីនានា ស្របតាមច្បាប់កំណត់។
ក្នុងសេចក្ដីជូនដំណឹងដដែល ក្រសួងពាណិជ្ជកម្ម អះអាងថា ការអនុញ្ញាតដោយក្រសួងពាណិជ្ជកម្ម កាលពីថ្ងៃទី ០១ ខែកញ្ញា ឆ្នាំ២០១៧ គឺជាការអនុញ្ញាតឲ្យប្ដូរនាមករណ៍ របស់សាខាក្រុមហ៊ុនសុខាអូតែលតែប៉ុណ្ណោះ មិនមែនប្តូរឈ្មោះរមណីយដ្ឋានបូកគោទេ។ ទន្ទឹមនឹងនេះ ក្រសួងពាណិជ្ជកម្ម បញ្ជាក់ថា ក្រសួង ពុំមានសិទ្ធិឲ្យក្រុមហ៊ុន សុខាអូតែល ប្ដូរឈ្មោះរមណីយដ្ឋានប្រវត្តិសាស្ត្រ ដែលបានកំណត់ដោយព្រះរាជក្រឹត្យនោះឡើយ។
សូមបញ្ជាក់ថា ជុំវិញបញ្ហាផ្លាស់ប្ដូរនេះ ត្រូវបាន សម្តេច ហ៊ុន សែន បញ្ជាឲ្យអាជ្ញាធរខេត្តកំពត ទម្លាក់ស្លាកសញ្ញា និងឈ្មោះថ្មីរបស់រមណីយដ្ឋានបូកគោ ទៅឈ្មោះដើមវិញឲ្យបានមុនម៉ោង១១ នៃថ្ងៃទី២៣ ខែកញ្ញា៕
© រក្សាសិទ្ធិដោយ thmeythmey.com