ជាតិ
នយោបាយជាតិ
មន្ត្រីពន្ធនាគារ ខ្លាចមានបាតុកម្ម បើដឹកឯកឧត្តម កឹម សុខា ពីត្បូងឃ្មុំ ទៅកាន់សវនាការនៅភ្នំពេញ ឯកឧត្តម កឹម សុខា ប្រធានគណបក្សសង្គ្រោះជាតិ ថ្លែងទៅកាន់អ្នកគាំទ្រនៅខេត្តកំពង់ចាម កាលពីខែសីហា ឆ្នាំ ២០១៧។ (រូបពីងហ្វេសប៊ុកឯកឧត្តម កឹម សុខា)
× ភ្នំពេញ៖ មន្ត្រីពន្ធនាគារ ព្រួយបារម្ភថា បាតុកម្ម អាចនឹងកើតឡើង បើដឹកឯកឧត្តម កឹម សុខា ប្រធានគណបក្សសង្គ្រោះជាតិ ពីពន្ធនាគារក្នុងខេត្តត្បូងឃ្មុំ ទៅកាន់សវនាការនៃសាលាឧទ្ធរណ៍ ក្នុងរាជធានីភ្នំពេញ។ ប៉ុន្តែ គណបក្សសង្គ្រោះជាតិ រួមទាំងក្រុមមេធាវីការពារក្តី ចង់ឲ្យមន្ត្រីពន្ធនាគារ ដឹកឯកឧត្តម កឹម សុខា ទៅចូលរួមសវនាការ។
ការបញ្ជូនខ្លួនឯកឧត្តម កឹម សុខា ពីពន្ធនាគារត្រពាំងផ្លុង ក្នុងខេត្តត្បូងឃ្មុំ ទៅចូលរួមសវនាការនៃសាលាឧទ្ធរណ៍ ក្នុងរាជធានីភ្នំពេញ កំពុងតែបង្កឲ្យមានការយល់ឃើញផ្ទុយគ្នា រវាងមន្ត្រីរដ្ឋាភិបាល និងគណបក្សសង្គ្រោះជាតិ។
លោក នុត សាវនា អ្នកនាំពាក្យនៃអគ្គនាយកដ្ឋានពន្ធនាគារ ប្រាប់សារព័ត៌មានថ្មីៗថា ឯកឧត្តម កឹម សុខា គឺជាបុគ្គលសាធារណៈ និងជាអ្នកនយោបាយ ដែលមនុស្សទូទៅស្គាល់ ហើយក្នុងនោះ ក៏មានអ្នកខ្លះគាំទ្រ និងអ្នកខ្លះទៀត មិនគាំទ្រ។ អ្នកនាំពាក្យនៃអគ្គនាយកដ្ឋានពន្ធនាគាររូបនេះ ព្រួយបារម្ភថា ភាពចលាចល អាចនឹងកើតឡើង ដោយការតវ៉ារបស់ក្រុមណាមួយ នៅពេលបញ្ជូនឯកឧត្តម កឹម សុខា ទៅកាន់សវនាការក្នុងរាជធានីភ្នំពេញ។
លោក សង្កត់ធ្ងន់យ៉ាងដូច្នេះថា៖«យើងដឹងហើយ រឿងគាត់ [ឯកឧត្តម កឹម សុខា] គឺជារឿងធ្ងន់ធ្ងរ ដែលយើង ត្រូវព្រួយបារម្ភពីសុវត្ថិភាព។ គេ អាចបង្កើតសេណារីយូថ្មី ដូចជាការធ្វើបាតុកម្ម និងអំពើហិង្សា ជាដើម។ យើង មិនចង់ឲ្យមានរឿងបែបនេះ កើតឡើងទេ។ កាលណាមានករណីធំៗ [ដូចជាករណីរបស់ឯកឧត្តម កឹម សុខា] គឺយើង ពិបាកគ្រប់គ្រងស្ថានការណ៍»។
លោក នុត សាវនា មិននិយាយនោះទេ ថាសមត្ថកិច្ច នឹងដឹកឯកឧត្តម កឹម សុខា ទៅកាន់សវនាការនៅរាជធានីភ្នំពេញ ឬយ៉ាងណា។ លោក បញ្ជាក់ថា ការដឹកឯកឧត្តម កឹម សុខា ទៅចូលរួមសវនាការនៅរាជធានីភ្នំពេញ ឬក៏មិនដឹកនោះ គឺអាស្រ័យលើសាលាឧទ្ធរណ៍ ជាអ្នកសម្រេច។ ប៉ុន្តែ លោក បានទទួលដំណឹងក្រៅផ្លូវការថា សវនាការនេះ អាចដំណើរការបាន ទោះជាគ្មានវត្តមានរបស់ឯកឧត្តម កឹម សុខា ក៏ដោយ។
ជុំវិញបញ្ហានេះសារព័ត៌មានថ្មីៗ មិនអាចសុំការបញ្ជាក់ពីអ្នកនាំពាក្យសាលាឧទ្ធរណ៍បានទេ ដោយសារតែហៅទូរសព្ទចូលដែរ តែគ្មានការទទួល។
ប៉ុន្មានថ្ងៃមុន លោក ចាន់ គីមសេង អគ្គនាយកពន្ធនាគារនៃក្រសួងមហាផ្ទៃ បានផ្ញើលិខិតមួយច្បាប់ ទៅកាន់អគ្គព្រះរាជអាជ្ញានៃសាលាឧទ្ធរណ៍ ដើម្បីសុំឲ្យពិចារណា ពីដឹកឯកឧត្តម កឹម សុខា ទៅចួលរួមសវនាការ។ នៅក្នុងលិខិតនោះ អគ្គនាយកពន្ធនាគារ បានបង្ហាញក្តីបារម្ភពីសន្តិសុខនិងសុវត្ថិភាពនៅតាមផ្លួវ ក្នុងការនាំខ្លួនឯកឧត្តម កឹម សុខា។
ហេតុផលរបស់មន្ត្រីខាងពន្ធនាគារខាងលើ មិនអាចទទួលយកបាននោះទេ សម្រាប់គណបក្សសង្គ្រោះជាតិ។ គណបក្សសង្គ្រោះជាតិ បានចេញសេចក្តីថ្លែងការណ៍មួយ នៅថ្ងៃទី២៣ ខែកញ្ញា ឆ្នាំ២0១៧ ដោយចាត់ទុកហេតុផលខាងពន្ធនាគារ ថាជាលេស ដើម្បីឲ្យឯកឧត្តម កឹម សុខា មិនមានវត្តមានក្នុងសវនាការនៃសាលាឧទ្ធរណ៍។
តាមរយៈសេចក្តីថ្លែងការណ៍ គណបក្សសង្គ្រោះជាតិ បានស្នើឲ្យមន្ត្រីខាងពន្ធនាគារ ដឹកឯកឧត្តម កឹម សុខា ទៅចូលរួមសវនាការតាមកាលកំណត់ ដែលនឹងប្រព្រឹត្តទៅនៅថ្ងៃទី២៦ ខែកញ្ញា ឆ្នាំ២0១៧។ ក្នុងសេចក្តីថ្លែងការណ៍នោះ គណបក្សសង្គ្រោះជាតិ ក៏បានស្នើឲ្យសាលាឧទ្ធរណ៍ គោរពនីតិវិធីផងដែរ ដើម្បីធានានិងគោរពសិទ្ធិរបស់ឯកឧត្តម កឹម សុខា ក្នុងការទទួលបានយុត្តិធម៌។ គណបក្សសង្គ្រោះជាតិ បានបញ្ជាក់ក្នុងសេចក្តីថ្លែងការណ៍ថា សវនាការ នឹងមិនមានភាពត្រឹមត្រូវតាមច្បាប់ឡើយ បើឯកឧត្តម កឹម សុខា មិនបានចូលរួម។
គម្រោងនៃការបើកសវនាការខាងលើ គឺធ្វើឡើងតាមសំណើរបស់ក្រុមមេធាវី ដែលការពារក្តីឲ្យឯកឧត្តម កឹម សុខា។ សំណើរបស់ក្រុមមេធាវី ដែលដាក់ទៅកាន់សាលាឧទ្ធរណ៍ គឺដើម្បីសុំប្រឆាំងនឹងដីកានៃសាលាដំបូងរាជធានីភ្នំពេញ ក្នុងការឃុំខ្លួនឯកឧត្តម កឹម សុខា។ សម្រាប់ក្រុមមេធាវី ការឃាត់ខ្លួនឯកឧត្តម កឹម សុខា ដែលជាតំណាងរាស្ដ្រ ទាំងពាក់កណ្តាលអធ្រាត្រ ហើយយកទៅឃុំ ទាំងមានអភ័យឯកសិទ្ធិសភាបែបនេះ គឺមិនត្រឹមត្រូវតាមនីតិវិធីឡើយ។
ទោះជាក្រុមមេធាវី រួមទាំងគណបក្សសង្គ្រោះជាតិ យល់យ៉ាងនេះក្តី តែចំពោះសមត្ថកិច្ចនិងតុលាការ ឯកឧត្តម កឹម សុខា បានប្រព្រឹត្តបទល្មើសជាក់ស្តែង ដូច្នេះការឃាត់និងការឃុំខ្លួន មិនចាំបាច់គិតពីអភ័យឯកសិទ្ធិនោះទេ។
សូមបញ្ជាក់ថា ក្រោយឃាត់ខ្លួន សមត្ថកិច្ច បានដឹកឯកឧត្តម កឹម សុខា ពីរាជធានីភ្នំពេញ យកទៅឃុំនៅពន្ធនាគារត្រពាំងផ្លុង ក្នុងខេត្តត្បូងឃុំ។ ឯកឧត្តម កឹម សុខា បានរងបទចោទ «សន្ទិដ្ឋិភាពជាមួយបរទេស» ដែលស្ថិតក្នុងអំពើក្បត់ជាតិ៕
© រក្សាសិទ្ធិដោយ thmeythmey.com