ជាតិ
ព័ត៍មានសុខភាព
រយៈពេល១ខែ មន្ទីរពេទ្យគន្ធបុប្ផាភ្នំពេញ និងសៀមរាប ពិនិត្យព្យាបាលកុមារ និងស្ត្រី ជាង ១សែននាក់ រូបពីហ្វេសប៊ុកលោក បេអាត រិចឆ្នឺរ
× រយៈពេល១ខែ ចាប់ពីថ្ងៃទី ២១ ខែសីហា ដល់ថ្ងៃទី ២០ ខែកញ្ញា មន្ទីរពេទ្យគន្ធបុប្ផាភ្នំពេញ និងខេត្តសៀមរាប បានទទួលកុមារ និងស្ដ្រីមានផ្ទៃពោះ ចំនួន ១១៥, ៤៥៥នាក់ សម្រាប់ការពិនិត្យ និងសម្រាកព្យាបាល។ នេះបើតាមតួលេខរបស់មន្ទីរពេទ្យគន្ធបុប្ផា ដែលបានផ្សព្វផ្សាយនៅលើហ្វេសប៊ុករបស់លោក បេអាត រិចឆ្នឺរ នៅថ្ងៃទី២៤ កញ្ញានេះ។
តួលេខរបស់មន្ទីរពេទ្យគន្ធបុប្ផាភ្នំពេញ និងខេត្តសៀមរាប បានបង្ហាញថា រយៈពេល១ខែ ចាប់ពីថ្ងៃទី ២១ ខែសីហា ដល់ថ្ងៃទី ២០ ខែកញ្ញា កុមារនិងស្ដ្រីមានផ្ទៃពោះ ចំនួន ១១៥, ៤៥៥នាក់ បានទៅពិនិត្យ និងសម្រាកព្យាបាលជំងឺនៅទីនោះ។ របាយការណ៍ខាងលើបានលម្អិត ចំនួនកុមារមានជំងឺធ្ងន់ធ្ងរ រួមទាំងកុមារទទួលការវះកាត់ និងស្ត្រីមានផ្ទៃពោះផងដែរ។
បើតាមតួលេខខាងលើ មន្ទីរពេទ្យគន្ធបុប្ផាភ្នំពេញ កុមារមានជំងឺចំនួន ៥២,៨៧៥នាក់ ត្រូវបានព្យាបាលនៅក្នុងផ្នែកពិគ្រោះជំងឺក្រៅ។ បន្ថែមលើនេះ កុមារចំនួន ៨១៩៣នាក់ មានជំងឺធ្ងន់ធ្ងរ ត្រូវបានដាក់ឲ្យសម្រាកព្យាបាលក្នុងមន្ទីរពេទ្យ និងកុមារចំនួន ១,១០២នាក់ ត្រូវបានវះកាត់។ ជាមួយគ្នានេះ កុមារចំនួន ២៩២នាក់ មានជំងឺគ្រុនឈាមធ្ងន់ធ្ងរ និងកុមារចំនួន ២៨នាក់ផ្សេងទៀត មានជំងឺរលាកខួរក្បាលធ្ងន់ធ្ងរផងដែរ។
ចំណែកឯមន្ទីរពេទ្យជ័យវរ្ម័នទី៧ (គន្ធបុប្ផាទី៣ សៀមរាប)វិញ កុមារមានជំងឺចំនួន ២៩,០១០នាក់ ត្រូវបានព្យាបាលនៅក្នុងផ្នែកពិគ្រោះជំងឺក្រៅ។ ទន្ទឹមនឹងនេះ កុមារចំនួន ៦,៨២៩នាក់ មានជំងឺធ្ងន់ធ្ងរ ត្រូវបានដាក់ឲ្យសម្រាកព្យាបាលក្នុងមន្ទីរពេទ្យ និងកុមារចំនួន ១,១១៥នាក់ ត្រូវបានវះកាត់បេះដូង និងភ្ជិតប្រហោងបេះដូង ចំនួន ៤៩នាក់ផងដែរ។ ម្យ៉ាងទៀត កុមារចំនួន ២៣៥នាក់ មានជំងឺគ្រុនឈាមធ្ងន់ធ្ងរ និងកុមារចំនួន ១៦៨នាក់ផ្សេងទៀត មានជំងឺរលាកខួរក្បាលធ្ងន់ធ្ងរ។
បើតាមទំព័រហ្វេសប៊ុកផ្លូវការរបស់លោក បេអាត រិចឆ្នឺរ ក្រៅពីពិនិត្យព្យាបាលកុមារ មន្ទីរពេទ្យគន្ធបុប្ផាក៏បានពិនិត្យ និងព្យាបាលជូនស្ត្រីមានផ្ទៃពោះចំនួន ១៣,២៥៨នាក់ នៅផ្នែកពិគ្រោះជំងឺក្រៅនៃមន្ទីរសម្ភព។ ដោយឡែក ក្នុងរយៈពេល១ខែនេះ មានស្ត្រីសម្រាលកូនបានចំនួន ២,៣០១នាក់ផងដែរ៕
© រក្សាសិទ្ធិដោយ thmeythmey.com