កីឡាជាតិ
ជាតិ
AFC U16៖ កម្ពុជាយកឈ្នះម៉ុងហ្គោលី ៣-២ ក្រោយចាញ់វៀតណាមនិងអូស្ត្រាលី ប្រធានក្រុម U16 កម្ពុជា គី រីណា ប្រជែងដណ្តើមបាល់ជាមួយកីឡាករម៉ុងហ្គោលី
× ក្រុមកីឡាជម្រើសជាតិអាយុក្រោម១៦ឆ្នាំកម្ពុជា បានយកឈ្នះម្ចាស់ផ្ទះម៉ុងហ្គោលីក្នុងលទ្ធផល ៣-២ នាជំនួបចុងក្រោយនៃវគ្គជម្រុះពូល I ក្នុងព្រឹត្តិការណ៍ AFC U16 Championship 2018។ ប៉ុន្តែលទ្ធផលនេះមិនអាចជួយ U16 កម្ពុជាឡើងទៅវគ្គបន្ត នោះឡើយ។
សម្រាប់ការប្រកួតដែលរៀបចំនៅកីឡដ្ឋាន Football Centre MFF ក្នុងទីក្រុងអ៊ូឡង់បាទ័រប្រទេសម៉ុងហ្គោលីកីឡាករ គី រីណា បានរកគ្រាប់បាល់នាំមុខ ១-០ ឲ្យកម្ពុជានៅនាទីទី៧ មុនកីឡាករ មិត សាម៉ើល សម្រេចគ្រាប់បាល់ទី២ឲ្យកម្ពុជានៅនាទីទី១៨។
ការប្រកួតដំណើរការបាន៦នាទីខ្សែប្រយុទ្ធ Temuulen Erdenetsogt បានរកគ្រាប់បាល់តាមពីក្រោយ ២-១ ឲ្យម្ចាស់ផ្ទះម៉ុងហ្គោលី ក្រោយមកកីឡាករ ប៊ុនធឿន ប៊ុនណារ៉ុង សម្រេចគ្រាប់ទី៣ឲ្យកម្ពុជានាំមុខ ៣-១ នៅនាទីទី៣៤។
កីឡាករ ប៊ុនធឿន ប៊ុនណារ៉ុង ព្យាយាមរត់ទៅដណ្តើមបាល់ជាមួយកីឡាករម៉ុងហ្គោលី, រូបភាពពីហ្វេសប៊ុក FFC
ម្ចាស់ផ្ទះម៉ុងហ្គោលីបានប្តូរខ្សែការពារ Nasan-Erdene Bayaraa និង Enkhkhuslen Enkhbayar ជាបន្តបន្ទាប់ជំនួសដោយ Altagnerel Enkhsaikhan និង Temuujin Mendbayar នៅនាទីទី ៤២ និង៤៩។ ក្រោយមកខ្សែប្រយុទ្ធ Temuulen Erdenetsogt សម្រេចបានគ្រាប់ទី២របស់ខ្លួនឲ្យម្ចាស់ផ្ទះម៉ុងហ្គោលី ដើម្បីតាមពីក្រោយ ៣-២ នៅនាទី៥២។ ក្រុមទាំងពីរបានរក្សាលទ្ធផលនេះរហូតចប់ការប្រកួត ទោះបីមានការវាយសម្រុកគ្នាទៅវិញទៅមកក៏ដោយ។
តែយ៉ាងណា ជ័យជម្នះ ៣-២ លើម្ចាស់ផ្ទះម៉ុងហ្គោលីមិនអាចជួយឲ្យ U16 កម្ពុជាឡើងទៅវគ្គបន្តឡើយ ពោលគឺបានត្រឹមឈរចំណាត់ថ្នាក់លេខ៣ប្រចាំពូល I ដោយមាន ៣ពិន្ទុក្នុងចំណោម៤ប្រទេសតែប៉ុណ្ណោះ ព្រោះពីរប្រកួតកន្លងមក U16 កម្ពុជាបានចាញ់វៀតណាម ៥-២ និងអូស្ត្រាលី ៥-០។ U16 វៀតណាម និងអូស្ត្រាលីបានកៅអីឡើងទៅវគ្គបន្តតំណាងឲ្យពូល I៕
© រក្សាសិទ្ធិដោយ thmeythmey.com