ជាតិ
បក្សសំបុកឃ្មុំ និងបក្សខ្មែររួបរួមជាតិ ប្តូរប្រធានថ្មី
× ភ្នំពេញ៖ គណបក្សសំបុកឃ្មុំសង្គមប្រជាធិបតេយ្យ និង គណបក្សខ្មែររួបរួមជាតិ បានធ្វើសមាជវិសាមញ្ញ ចំថ្ងៃជាមួយគ្នា ដើម្បីជ្រើសរើសប្រធានថ្មី។ សម្រាប់គណបក្សសំបុកឃ្មុំសង្គមប្រជាជាធិបតេយ្យ លោកស្រី ហួន ផាន់ណារី បានក្លាយជាប្រធាន ចំណែកគណបក្សខ្មែររួបរួមជាតិ លោក សឹង្ហ គីរី បានក្លាយជាប្រធាន។
លោកស្រី ហួន ផាន់ណារី គឺជាប្រធានថ្មីនៃគណបក្សសំបុកឃ្មុំសង្គមប្រជាធិបតេយ្យ ជំនួសលោក ម៉ម សូណង់ដូ។ លោកស្រី ទទួលតំណែងជាប្រធានគណបក្សសំបុកឃ្មុំសង្គមប្រជាធិបតេយ្យ តាមរយៈការបោះឆ្នោតរបស់អង្គសមាជវិសាមញ្ញ ដែលរៀបចំឡើងនៅថ្ងៃទី២៤ ខែកញ្ញា ឆ្នាំ២0១៧។
លោកសី ហួន ផាន់ណារី គឺជាជំនួយការរបស់លោក ម៉ម សូណង់ កាលពីមិនទាន់បង្កើតគណបក្ស។ ក្រោយលោក ម៉ម សូណង់ដូ បង្កើតគណបក្ស និងដឹកនាំអស់មួយរយៈមក លោកស្រី ក៏ឡើងកាន់តំណែងជាអនុប្រធាន។
លោក ម៉ម សូណង់ដូ បានលាលែងពីតំណែងជាប្រធានគណបក្ស កាលដើមខែសីហា ឆ្នាំ២0១៧។ ការមិនទទួលបានលទ្ធផលបោះឆ្នោតតាមការរំពឹងទុក គឺជាហេតុផល ដែលលោក ម៉ម សូណង់ដូ សម្រេចចិត្តលាលែងពីតំណែង។
រីឯគណបក្សខ្មែររួបរួមជាតិ ដែលបង្កើតឡើង ហើយធ្លាប់ស្ថិតនៅក្រោមការដឹកនាំរបស់លោក ញឹក ប៊ុនឆៃ ក៏បានធ្វើសមាជវិសាមញ្ញ ដើម្បីបោះឆ្នោតជ្រើសរើសប្រធានថ្មីដែរ កាលពីថ្ងៃទី២៤ ខែកញ្ញា ឆ្នាំ២0១៧។ អ្នកដែលត្រូវអង្គសមាជ បោះឆ្នោតឲ្យធ្វើជាប្រធានគណបក្ស គឺលោក សឹង្ហ គិរី។
លោក សឹង្ហ គីរិ ដែលជាសមាជិកគណៈកម្មាធិការនាយកនៃគណបក្សខ្មែររួបរួមជាតិ គឺជាមនុស្សម្នាក់ ដែលស្និទ្ធនឹងលោក ញឹក ប៊ុនឆៃ។ ក្រោយអវត្តមានរបស់លោក ញឹក ប៊ុនឆៃ តំណែងជាប្រធានស្តីទី បានធ្លាក់ទៅលើលោក សឹង្ហ គិរី ដើម្បីដឹកនាំគណបក្ស។ លោក ក៏ជាអតីតមន្ត្រីជាន់ខ្ពស់ក្នុងជូររដ្ឋាភិបាលផងដែរ ដែលមានតំណែងជារដ្ឋលេខាធិការនៃក្រសួងធនធានទឹក។
ការជ្រើសរើសប្រធានថ្មីនេះ គឺធ្វើឡើងបន្ទាប់ពីលោក ញឹក ប៊ុនឆៃ ជាប់ពន្ធនាគារ។ លោក ញឹក ប៊ុនឆៃ ត្រូវបានសមត្ថកិច្ចឃាត់ខ្លួន ហើយយកទៅឃុំបណ្តោះអាសន្ន កាលពីដើមខែសីហា ឆ្នាំ២0១៧ ដោយសង្ស័យថាជាប់ពាក់ព័ន្ធនឹងការផលិតគ្រឿងញៀន។
លោក សួង សុភ័ណ្ឌ ប្រធានគណបក្សអំណាចខ្មែរ
ក្រៅពីគណបក្សទាំងពីរខាងលើ គណបក្សអំណាចខ្មែរ ក៏បានធ្វើសមាជវិសាមញ្ញ ដើម្បីជ្រើសរើសប្រធានថ្មីដែរ។ លោក សួង សុភ័ណ្ឌ អតីតបេក្ខជនតំណាងរាស្ត្រគណបក្សសង្គ្រោះជាតិ បានទៅចុះចូលជាមួយគណបក្សអំណាចខ្មែរ ហើយក្រោយមក បានក្លាយជាប្រធានតាមរយៈអង្គសមាជវិសាមញ្ញ ជំនួសលោក សួន សេរីរដ្ឋា។ លោក សួន សេរីរដ្ឋា ដែលជាអតីតប្រធាននិងជាស្ថាបនិកនៃគណបក្សអំណាចខ្មែរ ត្រូវបានតុលាការកាត់ទោស ឲ្យជាប់ពន្ធនាគាររយៈពេល៥ឆ្នាំ ពីបទញុះញង់កងទ័ពមិនឲ្យស្តាប់បទបញ្ជា៕
Tag:
បក្សសំបុកឃ្មុំ
បក្សខ្មែររួបរួមជាតិ
ប្រធានថ្មី
© រក្សាសិទ្ធិដោយ thmeythmey.com