ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
សវនាការលើរឿងក្តីឯ.ឧ កឹម សុខា ប្រព្រឹត្តទៅដោយមានតែក្រុមប្រឹក្សានៃអង្គជំនុំជម្រះ
26, Sep 2017 ,
3:02 pm
រូបភាព
×
ដោយ:
ម៉ៅ សុផា
&
ភ្នំពេញ៖ សវនាការនៃសាលាឧទ្ធរណ៍ ដែលដំណើការនៅព្រឹកថ្ងៃទី២៦ ខែកញ្ញ ឆ្នាំ២0១៧នេះ មិនមានវត្តមានឯកឧត្តម កឹម សុខា ប្រធានគណបក្សសង្គ្រោះជាតិ ដែលជាជនត្រូវចោទនោះ។ អវត្តមានរបស់ឯកឧត្តម កឹម សុខា បណ្តាលឲ្យក្រុមមេធាវី សម្រេចចិត្តដើរចេញពីបន្ទប់សវនាការ។ ចំណែកឯ ក្រុមតំណាងរាស្ត្របក្សប្រឆាំង ក៏មិនចូលរួមស្តាប់សវនាការដែរ។
«ដោះលែងលោក ប្រធាន កឹម សុខា»។ នេះជាការទាមទាររបស់សកម្មជនគណបក្សសង្គ្រោះជាតិប្រមាណ៣០០នាក់ នៅខាងក្រៅបរិវេណនៃសាលាឧទ្ធរណ៍ ខណៈសវនាការកំពុងដំណើរការ។ ពាក្យទាមទារនេះ ត្រូវបានសរសេរនៅលើបដា រីឯអ្នកខ្លះទៀតបានកាន់រូបថតរបស់ឯកឧត្តម កឹម សុខា ដោយមានពាក្យទាមទារឲ្យដោះលែងនេះ ដូចគ្នា។ ប៉ុន្តែ អ្នកគាំទ្រប្រធានគណបក្សសង្គ្រោះជាតិមិនត្រូវបានអនុញ្ញាត ឲ្យចូលក្នុងបរិវេណនៃសាលាឧទ្ធរណ៍ដាច់ខាត។
ការធ្វើដំណើរតាមផ្លូវ ដើម្បីឆ្លងកាត់សាលាឧទ្ធរណ៍ ត្រូវបានត្រួតពិនិត្យយ៉ាងតឹងរឹង ពីសំណាក់កម្លាំងសមត្ថកិច្ច មុននឹងទទួលបានការអនុញ្ញាត។ កម្លាំងសមត្ថកិច្ចមិនតិចជាង១00នាក់ ដែលភាគច្រើន មានមាឌធំៗ បានបង្ហាញឥរិយាបថ និងទឹកមុខមាំ ក្នុងការការពារសន្តិសុខ។ សូម្បីតែអ្នកកាសែត ក៏មិនត្រូវបានអនុញ្ញាត ឲ្យចូលក្នុងបរិវេណនៃសាលាឧទ្ធរណ៍ដែរ។
«តើមានលិខិតអញ្ជើញអត់?»។ សមត្ថកិច្ចម្នាក់ បានសួរបែបនេះ ទៅកាន់អ្នកកាសែត នៅពេលអ្នកកាសែតស្នើសុំ ឆ្លងកាត់របាំងការពារ ដើម្បីដើរទៅមុខសាលាឧទ្ធរណ៍។ បន្ទាប់មក សមត្ថកិច្ចរូបនេះ បាននិយាយដូច្នេះថា៖«បើអត់ មិនអាចចូលបានទេ។ ទាល់តែមានលិខិតអញ្ជើញទើបអាចចូលបាន»។
ក្រៅពីប្រជាពលរដ្ឋនិងអ្នកគាំទ្រគណបក្សសង្គ្រោះជាតិ គេក៏សង្កេតឃើញមន្ត្រីនៃអង្គការជាតិនិងអន្តរជាតិមួយចំនួន ដូចជាមន្ត្រីសិទ្ធិមនុស្សនៃអង្គការសហប្រជាជាតិប្រចាំកម្ពុជា ជាដើម បានចូលរួមតាមដានសវនាការ លើសំណុំរឿងរបស់ឯកឧត្តម កឹម សុខា ដែរ។
ដោយឡែក ក្រុមតំណាងរាស្ត្រ និងមន្ត្រីជាន់ខ្ពស់មួយចំនួន នៃគណបក្សសង្គ្រោះជាតិ ដូចជាលោកស្រី មូរ សុខហួរ លោក សុន ឆ័យ លោក ម៉ៅ មុន្នីវណ្ណ និងលោក រៀល ខេមរិន្ទ ជាដើម ក៏បាននាំគ្នា ទៅកាន់សាលាឧទ្ធរណ៍ដែរ។ លោក សុន ឆ័យ បានចំណាយពេលជិតមួយម៉ោង នៅក្រោមកម្តៅថ្ងៃ ដើម្បីផ្តល់បទសម្ភាសដល់ក្រុមអ្នកកាសែត មុនពេលក្រុមមេធាវី ដើរចេញពីសាលាឧទ្ធរណ៍។
លោក សុន ឆ័យ និយាយទុកជាមុនរួចហើយថា ប្រសិនបើ មិនមានវត្តមានរបស់ឯកឧត្តម កឹម សុខា មេធាវី មិនអាចបន្តនៅការពារក្តីនោះទេ ហើយក្រុមតំណាងរាស្ត្រ ក៏មិនចូលរួមស្តាប់សវនាការដែរ។ មន្ត្រីជាន់ខ្ពស់គណបក្សសង្គ្រោះជាតិរូបនេះ ប្រាប់អ្នកកាសែតថា សវនាការ មិនអាចដំណើរការទៅ ដោយគ្មានឯកឧត្តម កឹម សុខា នោះទេ។ លោក សង្កត់ធ្ងន់ថា សវនាការ នឹងមិនស្របតាមនីតិវិធីឡើយ ប្រសិនបើឯកឧត្តម កឹម សុខា មិនបានចូលរួម។
ក្រៅពីនិយាយរឿងសវនាការ លោក សុន ឆ័យ ក៏មិនភ្លេចលើកឡើងពីការទាមទារឲ្យដោះលែងឯកឧត្តម កឹម សុខា ដែរ។ សម្រាប់លោក ឯកឧត្តម កឹម សុខា នៅតែជាបុគ្គល ដែលគ្មានទោសកំហុស។
លោក សុន ឆ័យ អះអាងថា ការឃុំខ្លួនឯកឧត្តម កឹម សុខា នាំឲ្យលោក រួមទាំងក្រុមតំណាងរាស្ត្រផ្សេងទៀត ខាតពេលវេលាជាច្រើន ក្នុងការធ្វើកិច្ចការសម្រាប់ប្រជាពលរដ្ឋនិងប្រទេសជាតិ។ លោករៀបរាប់បែបនេះថា៖«បើគ្មានរឿងហ្នឹង យើងក៏មិនមកឈរហាលក្តៅដែរ។ បើគ្មាន រឿងហ្នឹង ពេលនេះ ប្រហែលជាយើង ត្រូវអង្គុយសរសេរលិខិតរដ្ឋបាលផ្សេងៗ និងរៀបចំគោលនយោបាយ សម្រាប់ជាប្រយោជន៍ប្រជាពលរដ្ឋ»។
លោក សុន ឆ័យ និងលោកស្រី មូរ សុខហួរ
ក្រោយមកបន្តិច បន្ទាប់ពីលោក សុន ឆ័យ បញ្ចប់បទសម្ភាសជាមួយអ្នកកាសែត ភាពឈូឆរ បានកើតឡើងភ្លាមៗ នៅខាងក្រៅបរិវេណនៃសាលាឧទ្ធរណ៍។ នោះគឺក្រុមអ្នកកាសែតជាតិនិងអន្តរជាតិជាច្រើន បានរត់ឆ្ពោះទៅកាន់សហមេធាវីទាំងប្រាំបីរូប របស់ឯកឧត្តម កឹម សុខា ដើម្បីសួរពួកគាត់ ក្រោយចាកចេញពីបន្ទប់សវនាការ ហើយដើរមកខាងក្រៅនៃសាលាឧទ្ធរណ៍។
ចម្លើយដំបូងទៅកាន់ក្រុមអ្នកកាសែត គឺសហមេធាវី សម្រេចចិត្តធ្វើពហិកាមិនចូលរួមសវនាការនៃសាលាឧទ្ធរណ៍ ជាមួយនឹងក្រុមប្រឹក្សានៃអង្គជំនុំជម្រះឡើយ។ មូលហេតុ ដែលក្រុមមេធាវី បោះបង់សវនាការនោះ គឺដោយសារតែសវនាការ មិនមានវត្តមានឯកឧត្តម កឹម សុខា ដែលជាកូនក្តីរបស់ពួកគាត់។
ក្រុមមេធាវី ដើរចេញពីសាលាឧទ្ធរណ៍
សម្រាប់សហមេធាវី សវនាការ ដែលមិនមានវត្តមាន ឯកឧត្តម កឹម សុខា គឺមិនត្រូវតាមនីតិវិធីនោះទេ។ សហមេធាវី បកស្រាយថា តាមគោលការណ៍ព្រហ្មទណ្ឌ សវនាការត្រូវធ្វើឡើងចំពោះមុខជនត្រូវចោទ។
«ពួកខ្ញុំ ជាមេធាវី យល់ថា សវនាការនេះ មិនអាចទទួលយកបាន ព្រោះមិនមានវត្តមានឯកឧត្តម កឹម សុខា។ វា មិនយុត្តិធម៌ សម្រាប់កូនក្តីរបស់ពួកខ្ញុំ។ ដូច្នេះពួកខ្ញុំ សុខចិត្តមិនចូលរួម»។ នេះជាប្រសាសន៍របស់លោក សំ សុគង់ មេធាវីមួយរូប ក្នុងចំណោមមេធាវីទាំងប្រាំបីរូប ដែលរួមគ្នា ការពារក្តីឲ្យឯកឧត្តម កឹម សុខា។
លោកមេធាវី សំ សុគង់
ក្រៅពីលោក សំ សុគង់ មេធាវីផ្សេងទៀត ដូចជាលោក ជូង ជូងី លោក ហែម សុជាតិ និងលោកស្រី ម៉េង សុភារី ជាដើម បានបែងចែកគ្នា ទៅផ្តល់បទសម្ភាសដល់អ្នកកាសែតជាក្រុមៗ និងពន្យល់ដល់សកម្មជន រួមទាំងអ្នកគាំទ្រគណបក្សសង្គ្រោះជាតិ ដែលព្យាយាមសួរអំពីវសនាការនេះ។
លោកមេធាវី ជូង ជូងី ដែលកំពុងផ្តល់បទសម្ភាសដល់អ្នកកាសែតមួយក្រុមទៀត បានសង្កត់ធ្ងន់ យ៉ាងដូច្នេះ៖«ជំនុំជម្រះរឿងគាត់ [ឯកឧត្តម កឹម សុខា] តែបែរជាគ្មានគាត់។ អ៊ីចឹង តើម្តេចមានយុត្តិធម៌ សម្រាប់គាត់?»។
«តើក្រុមមេធាវី នឹងធ្វើអ្វីបន្តទៀត? មើលទៅ តើអាចនឹងប្តឹងទៅតុលាការកំពូលទេ?»។ នេះជាសំណួររបស់អ្នកកាសែតមា្នក់ ដែលសួរទៅកាន់មេធាវី ជូង ជូងី។ ចំពោះសំនួរនេះ លោកមេធាវី ដែលចោមរោមដោយអ្នកកាសែតនិងប្រជាពលរដ្ឋ បានឆ្លើយយ៉ាងខ្លីថា៖«យើង មិនទាន់ដឹងទេ។ ចាំមើល លទ្ធផលដែលសាលាឧទ្ធរណ៍ សម្រេចសិន។ ពេលសាលាឧទ្ធរណ៍ សម្រេចរួចហើយ យើង នឹងទៅពិភាក្សាជាមួយឯកឧត្តម កឹម សុខា ថាត្រូវធ្វើយ៉ាងម៉េច»។
លោកមេធាវី ជូង ជូងី
ការបារម្ភពីសន្តិសុខ និងសុវត្ថិភាពនៅតាមផ្លូវ គឺជាហេតុផលរបស់សាលាឧទ្ធរណ៍ ដែលសម្រេចមិនឲ្យដឹកឯកឧត្តម កឹម សុខា ពីពន្ធនាគារ ក្នុងខេត្តត្បូងឃ្មុំ មកកាន់សវនាការនៃសាលាឧទ្ធរណ៍ ក្នុងរាជធានីភ្នំពេញ។ ហេតុផលរបស់សាលាឧទ្ធរណ៍ខាងលើនេះ គឺលោកមេធាវី ហែម សុជាតិ ជាអ្នកយកមកប្រាប់ក្រុមអ្នកកាសែត។
បើតាមលោកមេធាវី ហែម សុជាតិ ដដែល ហេតុផលមួយទៀត របស់សាលាឧទ្ធរណ៍ គឺថាសវនាការនេះ អាចដំណើរទៅបាន ទោះគ្មានឯកឧត្តម កឹម សុខា ព្រោះស្ថិតក្នុងដំណាក់កាលនៃការស៊ើបសួរប៉ុណ្ណោះ ពោលគឺ មិនមែនជាសវនាការ ដើម្បីជំនុំជម្រះលើអង្គសេចក្តីនោះទេ។
លោកមេធាវី ហែម សុជាតិ
ការសម្រេចរបស់សាលាឧទ្ធរណ៍ ដែលមិននាំខ្លួនឯកឧត្តម កឹម សុខា មកកាន់សាលាឧទ្ធរណ៍ គឺស្របតាមសំណើរបស់អគ្គនាយកពន្ធនាគារនៃក្រសួងមហាផ្ទៃ។ មុននឹងបើកសវនាការលើសំណុំរឿងរបស់ឯកឧត្តម កឹម សុខា លោក ចាន់ គីមសេង អគ្គនាយកពន្ធនាគារ បានដាក់សំណើរមួយ ទៅជូនអគ្គព្រះរាជអាជ្ញានៃសាលាឧទ្ធរណ៍។ ក្នុងសំណើនោះ អគ្គនាយកពន្ធនាគារ បានសម្តែងការបារម្ភពីសន្តិសុខនិងសុវត្ថិភាពរបស់ឯកឧត្តម កឹម សុខា នៅតាមផ្លូវ ពេលដឹកមកកាន់សាលាឧទ្ធរណ៍។ ហេតុដូច្នេះលោកក៏សុំឲ្យអគ្គព្រះរាជអាជ្ញា ពិចារណាអំពីរឿងនេះ។
ការបើកសវនាការនៅថ្ងៃនេះ ធ្វើឡើងតាមសំណើរបស់ក្រុមមេធាវី។ ក្រុមមេធាវី បានស្នើទៅសាលាឧទ្ធរណ៍ ដើម្បីសុំប្រឆាំងនឹងដីការបស់សាលាដំបូងរាជធានីភ្នំពេញ ដែលសម្រេចឃុំខ្លួនឯកឧត្តម កឹម សុខា។ សម្រាប់ក្រុមមេធាវី ការឃាត់ខ្លួនឯកឧត្តម កឹម សុខា ដែលជាតំណាងរាស្ត្រ ទាំងពាក់កណ្តាលអធ្រាត្រ ហើយយកទៅឃុំទាំងមានអភ័យឯកសិទ្ធិសភាបែបនេះ គឺមិនត្រឹមត្រូវតាមនីតិវិធីនោះទេ។
ទោះជាក្រុមមេធាវីយល់យ៉ាងនេះក្តី ប៉ុន្តែសមត្ថកិច្ចនិងតុលាការ ចាត់ទុកថា ឯកឧត្តម កឹម សុខា បានប្រព្រឹត្តបទល្មើសជាក់ស្តែង ដូច្នេះការឃាត់និងការឃុំខ្លួន មិនចាំបាច់គិតពីអភ័យឯកសិទ្ធិឡើយ។ ការចោទប្រកាន់ឯកឧត្តម កឹម សុខា ថាបានប្រព្រឹត្តបទល្មើសជាក់ស្តែង គឺ តុលាការ បានពឹងផ្អែកលើវីដេអូឃ្លីបមួយ ដែលផលិតដោយប្រព័ន្ធផ្សព្វផ្សាយឈ្មោះ CBN ហើយត្រូវបានបង្ហោះលើបណ្តាញសង្គមហេ្វសប៊ុក។ នៅក្នុងវីដេអូឃ្លីបនោះ ឯកឧត្តម កឹម សុខា បាននិយាយថា ឯកឧត្តម មានអ្នកជំនាញជាជនបរទេស នៅពីក្រោយខ្នង ដើម្បីជួយណែនាំ ក្នុងការផ្លាស់ប្តូរមេដឹកនាំនៅកម្ពុជា។
ក្រោយវីដេអូឃ្លីបនោះ បានបែកធ្លាយ សមត្ថកិច្ចបានទៅចាប់ឯកឧត្តម កឹម សុខា ដល់គេហដ្ឋាន ទាំងពាក់កណ្តាលអធ្រាត្រ ម៉ោងប្រហែល១២ និង៣0នាទី ថ្ងៃទី២ ឈានចូលថ្ងៃទី៣ ខែកញ្ញា ឆ្នាំ២0១៧។ បច្ចុប្បន្ន ឯកឧត្តម កឹម សុខា កំពុងជាប់ឃុំក្នុងពន្ធនាគារត្រពាំងផ្លុង ខេត្តត្បូងឃ្មុំ ដោយរងបទចោទ «សន្ទិដ្ឋិភាពជាមួយបរទេស» ដែលបទល្មើសនេះ ស្ថិតក្នុងអំពើក្បត់ជាតិ៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
កឹម សុខា
សវនាការ
© រក្សាសិទ្ធិដោយ thmeythmey.com
អត្ថបទពេញនិយម
ថ្ងៃ១៧ មេសា កាល៤៩ឆ្នាំមុន កងទ័ពខ្មែរក្រហមដណ្តើមបានទីក្រុងភ្នំពេញ
3 ថ្ងៃ
តើពាក្យ«បច្ច័យ»មានន័យច្បាស់លាស់ដូចម្តេច?
4 ថ្ងៃ
សមត្ថកិច្ចខេត្តកែប ធ្វើកិច្ចសន្យាអាជីវករ២រូប ឱ្យឈប់ទារលុយពីភ្ញៀវទេសចរដែលអង្គុយតាមឆ្នេរ
1 សប្តាហ៍
សត្វជាង ៧០០ប្រភេទ ត្រូវបានរកឃើញក្នុងតំបន់ព្រៃកោងកាងខេត្តកោះកុង
2 ថ្ងៃ
«បុរាណ»និង«បូរាណ» មានអត្ថន័យដូចគ្នា
1 សប្តាហ៍
អត្ថបទពេញនិយមបន្ថែម