កីឡាជាតិ
ជាតិ
ជើងឯកពិភពលោក៖ ក្នុងចំណោម៧០ប្រទេស ITF កម្ពុជាឈរចំណាត់ថ្នាក់ទី១០ លោក កែវ រ៉េមី ពេលផ្តល់បទសម្ភាសដល់អ្នកសារព័ត៌មាននៅអាកាសយានដ្ឋានអន្តរជាតិភ្នំពេញក្រោយត្រឡប់ពីចូលរួមប្រកួតជើងឯកពិភពលោកនៅកូរ៉េខាងជើង
× ក្រុមអត្តពលិកកីឡាតេក្វាន់ដូ ITF កម្ពុជាដណ្តើមបានមេដាយប្រាក់១ និងសំរឹទ្ធ៤ពីការប្រកួតជើងឯកពិភពលោកលើកទី២០នៅទីក្រុងព្យុយ៉ាងប្រទេសកូរ៉េខាងជើង។ ជ័យជម្នះនេះ ជួយឲ្យកម្ពុជាឈរចំណាត់ថ្នាក់ទី១០ប្រចាំព្រឹត្តិការណ៍លំដាប់ពិភពលោក ដែលមាន៧០ប្រទេសចូលរួម។ ប្រធានសហព័ន្ធកីឡាតេក្វាន់ដូ ITF កម្ពុជាបានចាត់ទុកលទ្ធផលនេះថា ជាសមិទ្ធផលមួយដ៏ធំធេង និងជាមោទកភាពសម្រាប់កម្ពុជា។
ទោះបីអត្តពលិកកីឡាតេក្វាន់ដូ ITF កម្ពុជាមិនបានឈ្នះមេដាយមាស ប៉ុន្តែការទទួលបានមេដាយប្រាក់១ និងសំរឹទ្ធ៤ ត្រូវបានថ្នាក់ដឹកនាំសហព័ន្ធនេះវាយតម្លៃថា ជាមិទ្ធផលមួយដ៏កម្រ និងជាកំណត់ត្រាដ៏ល្អបំផុតសម្រាប់កីឡានេះ។ ការចាត់ទុកបែបនេះ ដោយសារការចូលរួមប្រកួតកន្លង ITF កម្ពុជាមិនធ្លាប់ទទួលបានជោគជ័យបែបនេះឡើយ ពោលគឺបានត្រឹមតែមេដាយសំរឺទ្ធតែប៉ុណ្ណោះ។
ប្រធានសហព័ន្ធកីឡាតេក្វាន់ដូ ITF កម្ពុជា លោក កែវ រ៉េមី បានចាត់ទុកការដណ្តើមបានមេដាយប្រាក់១ និងសំរឹទ្ធ៤របស់ក្រុមអត្តពលិកកម្ពុជាថា ជាមោទកភាពដ៏ត្រចះត្រចង់សម្រាប់កម្ពុជាក៏ដូចជាសហព័ន្ធទាំងមូល ព្រោះការប្រកួតមានភាពតានតឹងនិងស្វិតស្វាញបំផុត។ «ទោះបីយើងមិនបានមេដាយមាស ប៉ុន្តែយើងពិតជាមានមោទកភាពខ្លាំងណាស់ ព្រោះមេដាយប្រាក់១និងសំរឹទ្ធ៤ បានធ្វើឲ្យកម្ពុជាយើងជាប់ចំណាត់ថ្នាក់លេខ១០ក្នុងចំណោម៧០ប្រទេសចូលរួម។ អ្វីដែលអស្ចារ្យទៀតនោះ គឺយើងបានបង្ហោះទង់ជាតិរបស់កម្ពុជារៀងរាល់ក្រោយការប្រកួត»។ នេះជាការលើកឡើងរបស់លោក កែវ រ៉េមី ប្រធានប្រតិភូដែលបានដឹកនាំក្រុមអត្តពលិកតេក្វាន់ដូ ITF ចូលរួមដោយផ្ទាល់នៅប្រទេសកូរ៉េខាងជើង។
លោក ស៊ាន បូរ៉ាត ទទួលស្វាគមន៍ម្ចាស់ជ័យលាភីជើងឯកពិភពលោកកីឡាតេក្វាន់ដូ ITF នៅអាកាសយានដ្ឋានអន្តរជាតិភ្នំពេញ
គួរបញ្ជាក់ថា សម្រាប់ការប្រកួតកីឡាតេក្វាន់ដូ ITF ជ្រើសរើសជើងឯកពិភពលើកទី២០នៅទីក្រុងព្យុងយ៉ាងប្រទេសកូរ៉េខាងជើងដែលបានបញ្ចប់កាលពីពេលថ្មីៗ កម្ពុជាបានបញ្ជូនអត្តពលិកចំនួន១៥នាក់ឲ្យចូលរួម។ ជាលទ្ធផលកីឡាករ ប៉ាល់ ជីវ័ន ទទួលបានមេដាយប្រាក់លើការសម្តែងមេគុនកម្រិត៤ដាន់។ បន្ទាប់មក ជីវ័ន រួមជាមួយមិត្តរួមក្រុម តាំង សៀសុង, ជា ច័ន្ទឡា, ឃឿន ប៊ុនលាង, ឃឿន ប៊ុនឡុង និង សៀង អេងហ៊ុយ បានប្រកួតសម្តែងបច្ចេកទេសពិសេសឈ្នះមេដាយសំរឹទ្ធ១។ ចំណែកកីឡាការិនី ទូច ស្រីនិច បានឈ្នះមេដាយសំរឹទ្ធ២ លើការប្រកួតវាយបំបែកក្តារឯកត្តជន និងប្រកួតទម្ងន់៧៥គីឡូក្រាម ខណៈកីឡាករ ហ៊ វិចិត្រ បានឈ្នះមេដាយសំរឹទ្ធ១លើការប្រកួតទម្ងន់៥៧គីឡូក្រាម៕
Tag:
តេក្វាន់ដូ ITF
កែវ រ៉េមី
ប៉ាល់ ជីវ័ន
© រក្សាសិទ្ធិដោយ thmeythmey.com