ជាតិ
សម្តេច ហ៊ុន សែន ថា ការបាញ់សម្លាប់នៅអាមេរិក ហាក់ដូចជា ចំអកឲ្យឯកអគ្គរដ្ឋទូតអាមេរិក សម្តេច ហ៊ុន សែន នៅខាងឆ្វេង លោក William Heidt នៅខាងស្តាំ
× ប្រមុខរដ្ឋាភិបាលកម្ពុជា យល់ថា ការបាញ់សម្លាប់មនុស្សនៅអាមេរិកដ៏ឃោរឃៅ កាលពីយប់ថ្ងៃអាទិត្យ ហាក់ដូចជាការចំអកឲ្យលោក William Heidt ឯកអគ្គរដ្ឋទូតអាមេរិកប្រចាំនៅកម្ពុជា។ ទោះជាយ៉ាងណា សម្តេច ហ៊ុន សែន ក៏ចូលរួមសោកស្តាយជាមួយរដ្ឋាភិបាល និងប្រជាជនអាមេរិកចំពោះសោកនាដកម្មនេះដែរ។
ស្តាប់សឡេងសម្តេច ហ៊ុន សែន
ទំនងជានៅមិនទាន់ស្ងប់ចិត្តទាក់ទងនឹងសាររបស់ស្ថានទូតអាមេរិកប្រចាំកម្ពុជា កាលពីពាក់កណ្តាលខែកញ្ញា កន្លងទៅ ដែលអំពាវនាវឲ្យប្រជាជនអាមេរិកប្រុងប្រយ័ត្នចំពោះបញ្ហាអសន្តិសុខនៅកម្ពុជា ទើបនៅថ្ងៃនេះ សម្តេច ហ៊ុន សែន បានចាត់ទុកការបាញ់ប្រហារនៅអាមេរិកថា ជាការដើរផ្ទុយពីការលើកឡើងរបស់លោក William Heidt។ សម្តេចនាយករដ្ឋមន្ត្រី លើកឡើងថា ការបាញ់សម្លាប់ដ៏ឃោរឃៅ ដែលបណ្តាលឲ្យមនុស្ស ៥៨ នាក់ និងប្រជាជនអាមេរិករាប់រយនាក់រងរបួស កាលពីយប់ថ្ងៃអាទិត្យ ហាក់ដូចជាការចំអកឲ្យឯកអគ្គរដ្ឋទូតអាមេរិកប្រចាំនៅកម្ពុជា លោក William Heidt។
ក្នុងពិធីជួបជាមួយកម្មករ-កម្មការិនី ប្រមាណ ១ ម៉ឺននាក់ នៅរោងចក្រតំបន់កំបូល ប្រមុខរដ្ឋាភិបាល បញ្ជាក់យ៉ាងនេះថា៖ «វាជាការដើរផ្ទុយមួយនឹងការប្រកាសរបស់ឯកអគ្គរដ្ឋទូតអាមេរិកនៅភ្នំពេញ នៅមុនពេលភ្ជុំ ដែល(លោកទូត) បែរជាដាស់តឿនឲ្យប្រជាជនអាមេរិក ដែលមកប្រទេសកម្ពុជា សូមឲ្យមានការប្រុងប្រយ័ត្នសន្តិសុខ។ ប៉ុន្តែវាមិនបានកើតរឿងនេះនៅកម្ពុជាឯណា តែទៅកើតនៅអាមេរិកខ្លួនឯង។ វាហាក់ដូចជាការចំអកមួយចំពោះអគ្គរដ្ឋទូតអាមេរិកតែម្តង»។
ជាមួយគ្នានេះ សម្តេចនាយករដ្ឋមន្ត្រី ក៏ផ្តាំទៅលោកឯកអគ្គរដ្ឋទូតអាមេរិកប្រចាំនៅកម្ពុជា ដោយកុំឲ្យលោកទូតយល់ថា ការអត្ថាធិប្បាយរបស់សម្តេច ជាការចំអកឲ្យខ្លួនឲ្យសោះ។
ទោះជាសម្តេចមានប្រសាសន៍បែបនេះក្តី តែ សម្តេចនាយករដ្ឋមន្រ្តី ក៏សម្តែងការសោកស្តាយ និងចូលរួមរំលែកទុក្ខជាមួយក្រុមគ្រួសារជនរងគ្រោះ និងរដ្ឋាភិបាលអាមេរិកផងដែរ ហើយសម្តេច ក៏ថ្កោលទោសចំពោះអំពើឃាតកម្មដ៏សាហាវនេះ។
សូមបញ្ជាក់ថា ខ្មាន់កាំភ្លើងដែលបាញ់ប្រហារដ៏ឃោរឃៅទៅលើអ្នកទស្សនានៅក្នុងកម្មវិធីប្រគុំតន្ត្រីដ៏ធំមួយកាលពីយប់ថ្ងៃអាទិត្យ ដែលបានបណ្តាលឲ្យប្រជាជនអាមេរិក ៥៨ នាក់ស្លាប់ និងរាប់រយនាក់ទៀតរងរបួសនោះ ត្រូវបានសមត្ថិកិច្ចនៅក្នុងទីក្រុង Las Vegas កំណត់អត្តសញ្ញាណបាន។ ខ្មាន់កាំភ្លើងនោះ ឈ្មោះ Stephen Paddock អាយុ៦៤ឆ្នាំ មកពីក្រុង Mesquite រដ្ឋ Nevada ។ ឃាតករ Stephen Paddock ជាខ្មាន់កាំភ្លើងដែលបាញ់ប្រហាររង្គាលដ៏ប្រល័យបំផុតនៅក្នុងប្រវត្តិសាស្ត្រទំនើបរបស់អាមេរិក៕
Tag:
ហ៊ុន សែន
William Heidt
ទូតអាមេរិក
© រក្សាសិទ្ធិដោយ thmeythmey.com