នៅពេលមន្ត្រីប្រើអ្នកបួស រកលុយកខ្វក់ ឲ្យខ្លួន!

ជាតិ

នៅពេលមន្ត្រីប្រើអ្នកបួស រកលុយកខ្វក់ ឲ្យខ្លួន!

06, Oct 2017 , 5:32 pm

រូបភាព

លោក ហែម ចរិយា នៅខាងឆ្វេង អតីតព្រះសង្ឃ សេង សារី នៅខាងស្តាំ។

ដោយ:

សមត្ថកិច្ច កំពុងតាមចាប់ខ្លួន ជនត្រូវចោទ ហែម ចរិយា ដែលមានឪពុកជាឧត្តមសេនីយ៍ផ្កាយ ៣ និងជាទីប្រឹក្សាផ្ទាល់សម្តេច ស ខេង ពាក់ព័ន្ធសំណុំរឿងស៊ីដាច់លុយប្រជាពលរដ្ឋ ៣១ នាក់ ជាថ្នូរនឹងការសន្យាថា ជួយពួកគេឲ្យបានចូលធ្វើការក្នុងក្របខណ្ឌនគរបាលជាតិ។ ទឹកប្រាក់សរុបរបស់ពលរដ្ឋទាំង ៣១ នាក់នោះ មានចំនួនជាង ១៤ ម៉ឺនដុល្លារ ដែលលោក ហែម ចរិយា មានតួនាទីជាអនុប្រធាននាយកដ្ឋាននៃអគ្គនាយកដ្ឋានអន្តោប្រវេសន៍របស់ក្រសួងមហាផ្ទៃ បានប្រើអតីតគ្រូសូត្រឆ្វេងវត្តនគរបាជ័យ ឲ្យប្រមូលជូនខ្លួន។ ករណីនេះ មន្ត្រីអង្គការសង្គមស៊ីវិល ដែលធ្វើការទាក់ទងការប្រឆាំងអំពើពុករលួយ បានស្នើឲ្យអង្គភាពប្រឆាំងអំពើពុករលួយ( ACU) បើកការស៊ើបអង្កេត។ តែមកដល់ពេលនេះ ACU នៅមិនទាន់មានចំណាត់ការណាមួយជុំវិញសំណុំរឿងនេះឡើយ។

ប្រជាពលរដ្ឋចំនួន ៣១ នាក់ ក្នុងនោះ មានទាំងព្រះសង្ឃ កូនសិស្សលោកផងនោះ ខកចិត្តយ៉ាងខ្លាំង បន្ទាប់ពីបំណងរបស់ពួកគេ ត្រូវបរាជ័យ ហើយអស់លុយជាច្រើនថែមទៀត។ ពួកគេខកចិត្ត ដោយសារតែដំបូងឡើយរំពឹងថា បានចូលធ្វើការងារក្នុងក្របខណ្ឌនគរបាលជាតិ ទើបនាំគ្នាប្រមូលលុយអស់ពីខ្លួន និងខ្លះខ្ចីធនាគារ ហើយប្រគល់ឲ្យអតីតព្រះសង្ឃមួយអង្គឈ្មោះ សេង សារី (អន្តការី) ដើម្បីឲ្យបុគ្គលរូបនេះ ប្រគល់បន្តទៅលោក ហែម ចរិយា ជាថ្នូរនឹងការទទួលបានការងារនៅក្នុងស្ថាប័ននេះ។

ទឹកប្រាក់សរុបរបស់ប្រជាពលរដ្ឋទាំងអស់ដែលបានប្រគល់ឲ្យលោក ហែម ចរិយា មានចំនួន ១៤០,២៦៧ ដុល្លារ( ១៤ ម៉ឺន ២រយ ៦៧ ដុល្លារ) ដោយប្រជាពលរដ្ឋម្នាក់ បាត់បង់អស់ប្រាក់យ៉ាងតិចក៏ ១៨ លានរៀល ( ៤ ពាន់ ៥ រយ ដុល្លារ) ដែរ។ នេះបើតាមស្នងការរងនៃស្នងការដ្ឋាននគរបាលខេត្តកំពង់ចាម លោក ហេង វុទ្ធី។ លោកស្នងការរងបន្តប្រាប់សារព័ត៌មានថ្មីៗថា ប្រាក់ទាំងនោះ ត្រូវបានអតីតព្រះសង្ឃឈ្មោះ សេង សារី ប្រគល់ឲ្យលោក ហែម ចរិយា កាលពីខែមករា ឆ្នាំ ២០១៧ ហើយជាង ៧ ខែក្រោយមកទើបករណីនេះ បានផ្ទុះឡើងនៅចុងខែសីហា នៅពេលក្តីសង្ឃឹមរបស់អ្នកទាំង ៣១ នាក់ ដែលមានទីកំណើតនៅក្នុងខេត្តកំពង់ចាម និងត្បូងឃ្មុំ នោះ មិនបានដូចបំណង។

លោក ឯក ប៉ាន់ដន អធិការនគរបាលស្រុកកំពង់សៀម ប្រាប់សារព័ត៌មានថ្មីៗថា ថ្វីដ្បិតតែករណីនេះ លេចឡើងនៅក្នុងវត្តនគរបាជ័យ ស្ថិតនៅក្នុងស្រុកកំពង់សៀម មែន តែអ្នកទាំង ៣១ នាក់ ដែលខាតបង់លុយកាក់ក្នុងសំណុំរឿងនេះ មានតែម្នាក់ប៉ុណ្ណោះ ដែលរស់នៅក្នុងស្រុកកំពង់សៀម។ « ករណីនេះ មានប្រជាពលរដ្ឋរស់នៅក្នុងស្រុកកំពង់សៀមរបស់ខ្ញុំតែម្នាក់ប៉ុណ្ណោះ។ អ្នកខ្លះរស់នៅស្រុកកងមាស ខេត្តកំពង់ចាម និងខ្លះទៀត រស់នៅស្រុកតំបែរ ស្រុកអូរាំងឪ ក្នុងខេត្តត្បូងឃ្មុំ»។ លោកបញ្ជាក់យ៉ាងនេះហើយ ក៏បន្ថែមទៀតថា ចំណែកអតីតព្រះសង្ឃវ័យ ៣៦ ឆ្នាំ ឈ្មោះ សេង សារី ដែលប្រមូលលុយពីប្រជាពលរដ្ឋទៅឲ្យលោក ហែម ចរិយា វិញ មានស្រុកកំណើត នៅភូមិកំពង់ត្រំ ឃុំកោះមិត្ត ស្រុកកំពង់សៀម ខេត្តកំពង់ចាម ហើយមានតួនាទីជាគ្រូសូត្រឆ្វេងវត្តនគរបាជ័យ ក្នុងឃុំអំពិល ស្រុកកំពង់សៀម។

អ្នកស្រី ហាវ យ៉ា ប្រជាពលរដ្ឋរស់នៅភូមិទួល ៣ ឃុំរាយប៉ាយ ស្រុងកងមាស ខេត្តកំពង់ចាម ដែលអស់លុយ ៤,៥០០ ដុល្លារ (៤ ពាន់ ៥ រយដុល្លារ) ព្រោះតែចង់ឲ្យកូនបានចូលធ្វើការក្នុងក្របខណ្ឌនគរបាលជាតិ បានឲ្យដឹងថា អ្នកស្រី ទទួលបានព័ត៌មានស្តីពីអ្នកធានាឲ្យចូលធ្វើការក្នុងក្របខណ្ឌនេះ ពីកូនសិស្សលោកម្នាក់ ដែលរស់នៅក្នុងវត្តនគរបាជ័យ។ អ្នកស្រី ដំណាលប្រាប់សារព័ត៌មានថ្មីៗដូច្នេះថា៖«ដំបូងឡើយមានកូនសិស្សលោកម្នាក់ ដែលស្គាល់អតីតព្រះសង្ឃ សេង សារី រៀបការប្រពន្ធដែលធ្វើជាគ្រូពេទ្យ រស់នៅផ្ទះក្បែរខ្ញុំក្នុងភូមិទួល ៣ នេះ។ ប្រពន្ធកូនសិស្សលោកនោះ ជាកូនម្តាយក្មេកខ្ញុំ។ កូនសិស្សលោកដែលត្រូវជាប្អូនថ្លៃខ្ញុំផងនោះ បានប្រាប់ម៉ែក្មេកខ្ញុំថា ខ្លួនស្គាល់គ្រូសូត្រឆ្វេងនៅវត្តនគរបាជ័យ (ព្រះនាម សេង សារី) ដែលមានអ្នកធំម្នាក់ជួយឲ្យរកមនុស្ស ចូលបម្រើការងារនៅក្នុងក្របខណ្ឌនគរបាលជាតិបាន ដោយដាក់(សូក)លុយតែ ៤,៥០០ ដុល្លារ ដឹងតែបានចូលក្របខណ្ឌតែម្តង។ ម្តាយក្មេក ក៏យករឿងនេះមកប្រាប់ខ្ញុំត»។

អ្នកស្រី បន្តថា ពេលដែលឮដំណឹងនេះដំបូង ខ្លួនហាក់មិនទាន់ជឿខ្លាំងនោះទេ។ «តែពេលគេ(កូនសិស្សលោក) មកជួបខ្ញុំ ហើយប្រាប់ថា កន្លងមក មានអ្នកចូលធ្វើបាន ដោយអស់តែលុយប៉ុណ្ណឹង។ ម្យ៉ាងម៉ែក្មេក ចេះតែជំរុញខ្ញុំ ព្រោះទុកចិត្តព្រះសង្ឃ។ ខ្ញុំ និងប្តី ក៏ជឿ ហើយគិតថា ក្រែងកូនបានការងារល្អហ្នឹងគេផង ក៏យល់ព្រម»។ អ្នកស្រី ហាវ យ៉ា និងប្តី សម្រេចបែបនេះហើយ ក៏ទៅខ្ចីលុយធនាគារបាន ៤,៥០០ ដុល្លារ ដើម្បីប្រគល់ទៅឲ្យអតីតព្រះសង្ឃ ជាថ្នូរនឹងការសន្យាថា ឲ្យកូនប្រុសរបស់ខ្លួន បានការងារក្នុងក្របខណ្ឌនគរបាលជាតិ។ តែពីរខែក្រោយមក ពោលក្នុងអំឡុងខែ ២ ឆ្នាំ ២០១៧ ដែលជាខែកំណត់ថា កូនប្រុសរបស់អ្នកស្រីបានចូលធ្វើការនោះ មិនសម្រេចដូចការសន្យាឡើយ។ « បន្ទាប់មក ខ្ញុំ ត្រូវចាំរហូតដល់ខែ ៥ ទៀត តែនៅមិនបាន។ ខ្ញុំបានទៅជួបលោក(អតីតព្រះសង្ឃ សេង សារី) ផង និយាយតាមទូរសព្ទផង តែព្រះអង្គក៏ប្រាប់ថា អ្នកធំដែលយកលុយបន្ត (ហែម ចរិយា) នោះ នៅមិនទាន់អាចជួយបាន។ នៅខែ ៨ ( ខែសីហា ឆ្នាំ ២០១៧) ខ្ញុំនិងប្រជាពលរដ្ឋផ្សេងទៀតដែលអស់លុយក្នុងករណីនេះ ក៏បានដាក់ពាក្យប្តឹងទៅកាន់សមត្ថកិច្ចនៅក្នុងស្រុកកំពង់សៀមតែម្តង»។ នេះរៀបរាប់បន្ថែមរបស់ប្រជាពលរដ្ឋនៅក្នុងភូមិទូល ៣ ខាងលើ។

អ្នកស្រី យ៉ា ក៏ត្អូញត្អែរពីទុក្ខលំបាករបស់អ្នកស្រី និងគ្រួសារ បច្ចុប្បន្ន ដែលត្រូវរកលុយសងធនាគារវិញ។ ស្ត្រីរូបនេះ បន្ថែមយ៉ាងដូច្នេះថា៖«ខ្ញុំខំទៅខ្ចីធនាគារ ដោយគិតថា ពេលកូនបានធ្វើការងារទៅ យកលុយនោះមកសងធនាគារ តែពេលនេះវ័ណ្ឌកហើយគ្រួសារខ្ញុំ។ ពេលខ្លះពួកខ្ញុំរកលុយសងធនាគារមិនបាន ក៏លក់គោ សងគេ»។ បើតាមអ្នកស្រី ហាវ យ៉ា គ្រាន់តែនៅក្នុងភូមិទួល ៣ នេះ មានអ្នកភូមិចំនួន ៥ នាក់ ដែលបានអស់លុយកាក់ដោយសារករណីនេះ ដោយអ្នកទាំងនោះ ភាគច្រើនជាសាច់ញាតិរបស់អ្នកស្រី។

នៅពេលដែលសារព័ត៌មានថ្មីៗ សួរថា តើអ្នកស្រីបានគិតដល់ទេ ការសូកលុយ ដើម្បីបានចូលធ្វើការងាររដ្ឋបែបនេះ វាអាចជាប់ពាក់ព័ន្ធរឿងពុករលួយ? អ្នកស្រី ហាវ យ៉ា ឆ្លើយយ៉ាងខ្លីបែបនេះថា៖«ខ្ញុំមិនដឹងអ្វីទេលោកគ្រូ(អ្នកកាសែតសារព័ត៌មានថ្មីៗ) ខ្ញុំចេះតែធ្វើតាមៗគ្នាទៅ មិនដឹងថា វាពុករលួយ ឬមិនពុករលួយអ្វីទេ។ ពេលនេះ ខ្ញុំគ្រាន់តែសង្ឃឹមថា បានលុយមកវិញ ដើម្បីសងធនាគារ។ ខ្ញុំឈប់ជឿ នរណាទៀតហើយ ទោះបីជាអ្នកបួសក៏ដោយ»។

អតីតព្រះសង្ឃឈ្មោះ សេង សារី ដែលជាអ្នកប្រមូលលុយឲ្យលោក ហែម ចរិយា ត្រូវបានមន្ត្រីសង្ឃខេត្តកំពង់ចាម ចាប់ផ្សឹក កាលពីចុងខែសីហា នៅពេលដែលពលរដ្ឋ ព្រះសង្ឃ កូនសិស្សលោកទាំង ៣១ អង្គ/នាក់ ប្តឹងទៅសមត្ថកិច្ច ហើយបច្ចុប្បន្នអតីតសង្ឃអង្គនេះ កំពុងឃុំខ្លួននៅពន្ធនាគារខេត្តកំពង់ចាម ពាក់ព័ន្ធនឹងបទ សមគំនិតក្នុងការឆបោក។ នេះបើតាមលោក ហេង វុទ្ធី ស្នងការរងខេត្តកំពង់ចាម។

ចំណែកលោក ហែម ចរិយា អនុប្រធាននាយកដ្ឋាននៃអគ្គនាយកដ្ឋានអន្តោប្រវេសន៍របស់ក្រសួងមហាផ្ទៃ ត្រូវបានតំណាងអយ្យការអមសាលាដំបូងខេត្តកំពង់ចាម លោក ប្លង់ សុផល ចេញដីកា កាលពីថ្ងៃទី ២៥ ខែសីហា ឲ្យចូលខ្លួនទៅបំភ្លឺជុំវិញសំណុំរឿងឆបោកទឹកប្រាក់ចំនួន ១៤០,២៦៧ ដុល្លារនេះ ដោយទុករយៈពេលឲ្យមួយខែ។ ក៏ប៉ុន្តែជនសង្ស័យរូបនេះ មិនបានចូលខ្លួនទៅបំភ្លឺតាមការកោះហៅរបស់អយ្យការអមសាលាដំបូងខេត្តកំពង់ចាមនោះឡើយ។

ក្រោយពីលោក ហែម ចរិយា ដែលមានទីលំនៅបច្ចុប្បន្ន នៅក្នុងភូមិក្របី ឃុំគគរ ស្រុកកំពង់សៀម ខេត្តកំពង់ចាម បានគេចខ្លួន និងមិនបានចូលខ្លួនតាមការកោះហៅរបស់អយ្យការអមតុលាការដំបូង ចៅក្រមស៊ើបសួរនៃតុលាការនេះ បានសម្រេចចោទប្រកាន់លោកជាផ្លូវការពីបទឆបោក និងបង្គាប់សមត្ថកិច្ចតាមចាប់ខ្លួនជនត្រូវចោទរូបនេះ។ លោក ហួត វុទ្ធី អ្នកនាំពាក្យតុលាការដំបូងខេត្តកំពង់ចាម បានប្រាប់សារព័ត៌មានថ្មីៗថា នៅថ្ងៃទី ២៦ ខែ កញ្ញា លោកបានយកដីកាបង្គាប់ឲ្យចាប់ខ្លួនជនត្រូវចោទ ហែម ចរិយា ដល់សមត្ថកិច្ចរួចហើយ។ « ខ្ញុំនៅព្រឹកថ្ងៃទី ២៦ ខែកញ្ញា បានប្រគល់ដីការបស់ចៅក្រមស៊ើបសួរដល់សមត្ថកិច្ចហើយ ដើម្បីឲ្យតាមចាប់បានជនត្រូវចោទ»។ នេះជាការបន្ថែមរបស់អ្នកពាក្យតុលាការដំបូងខេត្តកំពង់ចាមខាងលើ។

លោក ហេង វុទ្ធី ស្នងការរងខេត្តកំពង់ចាម ទទួលបន្ទុកផ្នែកព្រហ្មទណ្ឌ បានថ្លែងថា បន្ទាប់ពីលោកទទួលបានដីការបស់ចៅក្រុមស៊ើបសួរ ឲ្យចាប់ខ្លួនជនត្រូវចោទ ហែម ចរិយា មានតួនាទីជាជំនួយការផ្ទាល់ឪពុក ដែលជាឧត្តមសេនីយ៍ឯកផ្កាយ ៣ និងជាអគ្គនាយករងនៃអគ្គនាយកដ្ឋានអន្តោប្រវេសន៍នោះ កងកម្លាំងរបស់លោកកំពុងតែញាប់ដៃជើង ដើម្បីចាប់ខ្លួនជនត្រូវចោទឲ្យបាន។ លោក អះអាងដូច្នេះថា៖« ពេលនេះ យើងបានសហការជាមួយស្នងការនគរបាលជាតិនៃក្រសួងមហាផ្ទៃ ដើម្បីចាប់ខ្លួនជនត្រូវចោទហើយ។ ខ្ញុំមិនអាចនិយាយបានថា ពេលនេះជនត្រូវចោទកំពុងគេចខ្លួននៅទីណាបានទេ សូមទុកឲ្យសមត្ថកិច្ចធ្វើការ។ ខ្ញុំគ្រាន់តែបញ្ជាក់ថា បុគ្គល ហែម ចរិយា មិនអាចរួចផុតពីសមត្ថកិច្ចបានឡើយ ទោះបីមានតួនាទីធំ ឬមានខ្នងក្រាស់ប៉ុណ្ណាក្តី»។

សារព័ត៌មានថ្មីៗ បានព្យាយាមទាក់ទងទៅលោក ហែម ថេង ឧត្តមសេនីយ៍ឯកផ្កាយ ៣ ដែលជាទីប្រឹក្សាផ្ទាល់សម្តេច សម្តេច ស ខេង និងជាឪពុករបស់ជនត្រូវចោទ ហែម ចរិយា ជាច្រើនថ្ងៃ ដើម្បីឲ្យលោកអត្ថាធិប្បាយជុំវិញទង្វើរបស់កូនប្រុស ដែលមានតួនាទីជាជំនួយការរបស់ខ្លួន តែលោកមិនលើកទូរសព្ទ។ ប៉ុន្តែ កាលពី ថ្ងៃទី ២៧ ខែកញ្ញា លោកឧត្តមសេនីយ៍ឯក ហែម ថេង ដែលជាឪពុករបស់ជនត្រូវចោទ ហែម ចរិយា បានចេញមុខបកស្រាយថា ករណីនេះមិនជាប់ពាក់ព័ន្ធរូបលោកឡើយ។ លោក ហែម ថេង ដែលមានតួនាទីជាអគ្គនាយករងនៃអគ្គនាយកដ្ឋានអន្តោប្រវេសន៍ផងនោះ បានប្រាប់សារព័ត៌មាន Fresh News ថា លោកសូមអំពាវនាវដល់កម្លាំងសមត្ថកិច្ចពាក់ព័ន្ធចាត់វិធានការតាមផ្លូវច្បាប់លើកូនប្រុសរបស់ខ្លួន ដោយគ្មានការលើកលែងនោះទេ។

លោកឧត្តមសេនីយ៍ឯក កែវ វណ្ណថន អគ្គនាយករងនៃអគ្គនាយកដ្ឋានអន្តោប្រវេសន៍របស់ក្រសួងមហាផ្ទៃ ច្រានចោលករណី លោក ហែម ចរិយា ថា មិនពាក់ព័ន្ធនឹងអគ្គនាយកដ្ឋានអន្តោប្រវេសន៍នោះឡើយ។ លោក បកស្រាយប្រាប់សារព័ត៌មានថ្មីៗ យ៉ាងនេះថា៖« វាជារឿងបុគ្គលទេ ហើយតុលាការអនុវត្តតាមច្បាប់ចំពោះអ្នកធ្វើខុស ទោះបីមន្ត្រីមានឋានៈខ្ពស់បែបណាក៏ដោយ។ បើតុលាការរកឃើញកំហុស ខាងយើង(អគ្គនាយកដ្ឋានអន្តោប្រវេសន៍)នឹងអនុវត្តតាមវិន័យ ០០៦ នៃនីតិវិធីកងកម្លាំងនគរបាលជាតិ ដូចជាការបណ្តេញ(ហែម ចរិយា) ចេញពីអង្គភាពជាដើម»។ ទន្ទឹមនឹងនេះ លោក កែវ វណ្ណថន ក៏សោកស្តាយ ដែលករណីនេះ បង្កឡើងដោយមន្ត្រីនៅអគ្គនាយកដ្ឋានអន្តោប្រវេសន៍។
លោកអគ្គនាយករងរូបនេះ ឲ្យដឹងទៀតថា បើទោះបីមានករណីលោក ហែម ចរិយា នេះជាមន្ត្រីក្នុងស្ថាប័នលោកក្តី ក៏អង្គភាពរបស់លោក មិនមានផែនការណាមួយ ដើម្បីស្រាវជ្រាវបន្ថែមរកអ្នកពាក់ព័ន្ធផ្សេងទៀត ឬស្រាវជ្រាវរកសកម្មភាពពីមុនរបស់លោកអនុប្រធាននាយកដ្ឋានអន្តោប្រវេសន៍ ហែម ចរិយា នោះដែរ។ « អង្គភាពយើងគ្មានផែនការស្រាវជ្រាវ ព្រោះកន្លងមកយើងមិនដែលទទួលព័ត៌មានថា លោក ហែម ចរិយា ទទួលលុយពីអ្នកសូក ដើម្បីបញ្ចូលបុគ្គលណាមួយ ចូលក្នុងមន្ត្រីក្របខណ្ឌនគរបាលជាតិ។ យើងមិនដែលដឹងទេ»។ នេះជាការបន្តលើកឡើងរបស់លោក វណ្ណថន។

លោក ព្រាប កុល នាយកប្រតិបត្តិអង្គការតម្លាភាពកម្ពុជា យល់ថា ករណីនេះ វាប៉ះពាល់ដល់មុខព្រះសាសនា និងមន្ត្រីជាន់ខ្ពស់របស់ក្រសួងមហាផ្ទៃ ដែលតុលាការត្រូវចាត់វិធានការតាមច្បាប់ឲ្យបានម៉ឺងម៉ាត់។ ទន្ទឹមនឹងនេះ ថ្វីដ្បិតតែពេលនេះ ចៅក្រមស៊ើបសួរតុលាការខេត្តកំពង់ចាម បានចោទប្រកាន់លោក ហែម ចរិយា ពីបទឆបោកក្តី តែលោកលើកឡើងថា រឿងនេះ អាចជាប់ពាក់ព័ន្ធនឹងអំពើពុករលួយដែរ ដោយលោកអំពាវនាវឲ្យអង្គភាពប្រឆាំងអំពើពុករលួយ( ACU) ត្រូវបើកការស៊ើបអង្កេតលើអង្គហេតុ និងអ្នកជាប់ទាក់ទង ព្រមទាំងពិនិត្យមើលទិដ្ឋភាពច្បាប់ឲ្យបានច្បាស់លាស់។ « ករណីនេះ វាអាចជាប់ពាក់ព័ន្ធនឹងរឿងពុករលួយ និងរឿងឆបោក យើងទាមទារឲ្យមានការស៊ើបអង្កេតបន្ថែម។ ព្រោះអាចមានអ្នកជាប់ទាក់ទងដទៃទៀត»។ នេះជាការបន្ថែមរបស់លោក ព្រាប កុល។

លោក នាយកប្រតិបត្តិអង្គការតម្លាភាពកម្ពុជាបន្តថា បើទោះបីជាករណីសូកលុយ ដើម្បីបានការងារក្នុងក្របខណ្ឌមន្ត្រីនគរបាលជាតិនេះ មិនបានសម្រេចក្តី តែវាជារឿងមួយដែលអាចឆ្លុះបញ្ចាំងពីទិដ្ឋភាពនៃការប្រព្រឹត្តអំពើពុករលួយនៅក្នុងប្រទេសកម្ពុជា តាមរយៈរូបភាពសូកលុយអ្នកមានអំណាច ជាថ្នូរនឹងការចូលបម្រើការងាររដ្ឋនេះ។ « រឿងពុករលួយបែបនេះ យើងសាកទៅសួរពលរដ្ឋ សុទ្ធតែធ្លាប់ឮ ធ្លាប់ដឹង ពីការសូកលុយ ដើម្បីបានការងាររដ្ឋ។ វាគ្រាន់តែយើងគ្មានភស្តុតាងច្បាស់លាស់ប៉ុណ្ណោះ។ វាជាជំងឺរ៉ាំរ៉ៃនៅក្នុងសង្គមយើង។ ហើយពេលរូបភាពបែបនេះ បានរាលដាលដល់ក្នុងវត្តអារាម ដែលជាទីសក្ការបូជារបស់ពុទ្ធបរិស័ទ វាជារឿងធ្ងន់ធ្ងរណាស់។ មន្ត្រីដែលប្រើព្រះសង្ឃឲ្យធ្វើរឿងនេះ ព្រោះយល់ថា ព្រះសង្ឃជាមនុស្សដែលប្រជាពលរដ្ឋគោរពប្រតិបត្តិ និងទុកចិត្ត»។ លោកថ្លែងដូច្នេះ ក៏បន្តនិយាយពីដំណោះស្រាយដែលអាជ្ញាធរ ជាពិសេសអង្គភាពប្រឆាំងអំពើពុករលួយត្រូវធ្វើ ដូចជាការពង្រឹងយន្តការច្បាប់ឲ្យបានរឹងមាំ ដើម្បីចាត់វិធានការលើជនប្រពឹត្តដោយគ្មានការលើកលែង និងការមានឆន្ទៈពិតប្រាកដក្នុងការប្រឆាំងអំពើពុករលួយជាដើម។

ទាក់ទងនឹងកិត្តិយសរបស់ព្រះពុទ្ធសាសនា លោក សេង សុមុនី អ្នកនាំពាក្យក្រសួងធម្មការ និងសាសនា ទទួលស្គាល់ថា ករណីនេះ បានប៉ះពាល់ដល់ព្រះពុទ្ធសាសនា ដែលជាសាសនារបស់រដ្ឋ។ លោកថា ករណីបែបនះ មិនគួរកើតមាននៅក្នុងទីរាមនោះឡើយ ហើយលោកអំពាវនាវឲ្យព្រះសង្ឃទូទាំងប្រទេស ប្រតិបត្តិធម៌វិន័យ និងច្បាប់រដ្ឋឲ្យបានខ្ជាប់ខ្ជួន។ ជាមួយគ្នានេះលោក ក៏អំពាវនាវកុំឲ្យគ្រហស្ថបបួល ឬលួងលោមព្រះសង្ឃឲ្យប្រព្រឹត្តអំពើពុករលួយ និងខុសច្បាប់រដ្ឋនានា។« សូមមេត្តាកុំនាំព្រះសង្ឃធ្វើខុសធម៌វិន័យ និងច្បាប់រដ្ឋ ។ យើងឃើញ កន្លងមកដោយមានការលួងលោម និងប្រើល្បិចឆបោក ព្រះសង្ឃខ្លះ ដែលមានចំណេះដឹងទាប ជឿភ្លាម ដូចជាករណីអតីតព្រះសង្ឃនៅវត្តនគរបាជ័យនេះជាដើម»។ នេះជាការអំពាវនាវរបស់លោក សេង សុមុនី អ្នកនាំពាក្យក្រសួងធម្មការ និងសាសនា។

លោក ហេង វុទ្ធី លើកឡើងថា កណីសូកលុយ ដើម្បីជាថ្នូរនឹងការងាររដ្ឋ ដែលមានពាក់ព័ន្ធនឹងព្រះសង្ឃដ៏ធំបែបនេះ មិនដែលកើតមាននៅខេត្តកំពង់ចាមនោះទេ។ «វាជ្រុលហួសហេតុតែម្តងហើយ ដល់ថ្នាក់ព្រះសង្ឃសហការជាមួយបុគ្គលមានឋានៈខ្ពស់នៅក្រសួង ដើម្បីបានតួនាទីបែបនេះ។ វាមិនគួរកើតមានទេ។ ខ្ញុំជាអាជ្ញាធរ ហួសចិត្តពេក»។ លោក ហេង វុទ្ធី លើកឡើងយ៉ាងនេះហើយ ក៏បន្តអំពាវនាវឲ្យប្រជាពលរដ្ឋទាំងអស់ មុននឹងជឿលើនរណាម្នាក់ ត្រូវសួរអ្នកដទៃ ជាពិសេសគឺសួរអាជ្ញាធរពាក់ព័ន្ធនៅមូលដ្ឋានរបស់ខ្លួនជាមុនសិន។

អធិការនគរបាលស្រុកកំពង់សៀម បានបង្ហើបឲ្យដឹងថា អតីតព្រះសង្ឃ ឈ្មោះ សេង សារី ដែលជាអ្នកខិតខំដើរប្រមូលលុយឲ្យលោក ហែម ចរិយា អនុប្រធាននាយកដ្ឋាននៃអគ្គនាយកដ្ឋានអន្តោប្រវេសន៍របស់ក្រសួងមហាផ្ទៃ ព្រោះមានបំណងចង់បានតួនាទីក្នុងការងាររដ្ឋ តាមរយៈលោក ហែម ចរិយា ដែរ។ លោកអធិការ បន្ថែមបែបនេះថា៖« អតីតព្រះសង្ឃ បានផលចំណេញពីការប្រមូលលុយឲ្យ ហែម ចរិយា។ តាមខ្ញុំដឹង សេង សារី នេះ ក៏បានសូកលុយលោក ហែម ចរិយា ២ ម៉ឺនដុល្លារ ដើម្បីបានការងារនៅទីស្តីការគណៈរដ្ឋមន្ត្រីផងដែរ»។

សូមរម្លឹកបន្តិចថា នៅមុនពេលមន្ត្រីសង្ឃនៃក្រសួងធម្មករ និងសាសនា ចាប់ផ្សឹក និងអាជ្ញាធរចាប់ខ្លួន អតីតព្រះគ្រូសូត្រឆ្វេង សេង សារី បានសរសេរសារនៅលើទំព័រហ្វេសប៊ុករបស់ខ្លួន ហើយភ្ជាប់(Tag) ចូលទំព័រ Facebook របស់សម្ដេច ហ៊ុន សែន ដើម្បីឲ្យសម្តេចជួយអន្តរាគមន៍។ សំណេរនោះ មានខ្លឹមសារសំខាន់បែបនេះថា៖ «អាត្មាសូមចម្រើនពរដល់សម្តេច មេត្តាជួយស្រោចស្រង់ជីវិតអាត្មាផង ព្រោះអត្មាភាពមានរឿងអយុត្តិធម៌ ដោយ លោក ហែម ចរិយា ដែលជាមន្ដ្រីនគរបាលជាតិផ្នែកអន្ដោប្រវេសន៍ និងជាកូនរបស់ឯកឧត្តម ហែម ថេង មកបោកប្រាស់អាត្មាភាពឲ្យរកមនុស្សចូលក្របខណ្ឌនគរបាលជាតិ ដោយយកតួនាទីខ្លួន និងតួនាទីរបស់ឪពុកមកអះអាង។ ទឹកប្រាក់ ដែលលោក ហែម ចរិយា បោកយកទៅចំនួន ១៤០,០០០ ដុល្លារ ក្នុងនោះមានទាំងព្រះសង្ឃ កូនសិស្សទាំងអស់៣១អង្គ/នាក់។ មនុស្ស ដែលអាត្មារកឲ្យលោក ហែម ចរិយា ឥឡូវនេះគេប្ដឹងអាត្មាភាព អាត្មាភាពមិនដឹងធ្វើយ៉ាងណាទេ»។

បន្ទាប់អតីតព្រះសង្ឃអង្គនេះ សរសេរសារ Tag ចូលហ្វេសប៊ុកផេក (Facebook Page) របស់សម្តេច ហ៊ុន សែន អ្នកប្រើប្រាស់បណ្តាញសង្គមហ្វេសប៊ុកមួយចំនួន បានថតយក (Capture) សំណេររបស់អតីតព្រះសង្ឃ សេង សារី មកបង្ហោះនៅលើទំព័រហ្វេសប៊ុករបស់ពួកគេ ដោយអមជាមួយសំណេររិះគន់ និងស្នើឲ្យអង្គភាពប្រឆាំងអំពើពុករលួយចាត់វិធានការ។

លោក សន ជ័យ អ្នកប្រើប្រាស់ហ្វេសប៊ុកដ៏សកម្មម្នាក់ ដែលមានតួនាទីជាប្រធានអង្គការសម្ព័ន្ធភាពគណនេយ្យភាពសង្គមកម្ពុជា ផងនោះ បានបង្ហោះសំណេររបស់អតីតព្រះសង្ឃ សេង សារី និងស្នើសុំទៅអង្គភាពប្រឆាំងអំពើពុករលួយយ៉ាងនេះថា៖«សង្ឃរត់ការ និងមន្ត្រី ទាក់ម៉ូយ (ចូល)ក្របខណ្ឌនគរបាលជាតិ។ នេះជាករណីពុករលួយហើយ ចាត់ការទៅ ACU»។

យ៉ាងណាក៏ដោយចុះ មកដល់ពេលនេះ អង្គភាពប្រឆាំងអំពើពុករលួយ នៅមិនទាន់បើកការស៊ើបអង្កេតក្នុងករណីនេះឡើយ។ នេះបើតាមលោក ឃាង សេង អនុប្រធានអង្គភាពប្រឆាំងអំពើពុករលួយ(ACU) ទន្ទឹមនឹងលោកពន្យល់ប្រាប់សារព័ត៌មានថ្មីៗថា ខាង ACU មិនបានទទួលពាក្យបណ្តឹង និងព័ត៌មានណាមួយជុំវិញសំណុំរឿងលោក ហែម ចរិយា ននិងរឿងអតីតព្រះសង្ឃ សេង សារី កន្លងមកនោះទេ។ លោក អនុប្រធានអង្គភាពប្រឆាំងអំពើពុករលួយរូបនេះ មានប្រសាសន៍ដូច្នេះថា៖« ខ្ញុំបានដឹងតែតាមរយៈលោក (អ្នកសារព័ត៌មាននៃសារព័ត៌មានថ្មីៗ) ប៉ុណ្ណឹង។ បើមានអ្នកប្តឹង យើងនឹងពិនិត្យមើលបណ្តឹងនោះ។ គេអាចប្តឹងមក ACU តាមវិធីបីយ៉ាង ដោយទី១ តាមរយៈសរសេរលិខិតដាក់ចូលក្នុងប្រអប់ស របស់ ACU ទី ២ តាមរយៈអ៊ីមែល និងទី ៣ តាមរយៈលេខទូរសព្ទ អ្នកទទួលពាក្យបណ្តឹងរបស់ ACU។ ខ្ញុំសូមបញ្ជាក់ម្តងទៀត មកដល់ពេលនេះ យើងនៅមិនទាន់ទទួលបានតម្រុយផ្លូវការណាមួយទេជុំវិញករណីនេះ។ ដូច្នេះខ្ញុំមិនអាចប្រាប់លោក ហួសពីនេះទៀត»។

ឆ្លើយតបនឹងការលើកឡើងរបស់លោក ព្រាប កុល ជុំវិញការសូកលុយ ដើម្បីជាថ្នូរចូលធ្វើធ្វើការរដ្ឋថា ជាជំងឺរ៉ាំរ៉ៃ នៅក្នុងសង្គមខ្មែរ លោក ឃាង សេង ចាត់ទុកការលើកឡើងនេះថា គ្រាន់តែជាការនិយាយចោល គ្មានភស្តុតាង មិនអាចយកការណ៍បាននោះទេ។ លោក ប្រៀបមតិរបស់លោក ព្រាប កុល ទៅហ្នឹងឧទាហរណ៍ បែបនេះថា៖« ឧទាហរណ៍ ដូចរឿងមួយ គេនិយាយថា ស្អែកបុគ្គល ក ទៅសម្លាប់គេ ឲ្យអាជ្ញាធរទៅចាប់ឲ្យហើយ។ រឿងគ្មានភស្តុតាងបែបនេះ មិនអាចយកជាការណ៍បានទេ»។

ព័ត៌មានចុងក្រោយជុំវិញការតាមចាប់ខ្លួនជនត្រូវចោទ ហែម ចរិយា ដោយគិតត្រឹមថ្ងៃទី ៦ ខែតុលា ឆ្នាំ ២០១៧ សមត្ថកិច្ចនៅមិនទាន់អាចចាប់ខ្លួន ជនត្រូវចោទ ហែម ចរិយា បាននោះទេ។ នេះបើតាមលោក ហេង វុទ្ធី ស្នងការរងនៃស្នងការដ្ឋាននគរបាលខេត្តកំពង់ចាម។លោក ប្រាប់សារព័ត៌មានថ្មីៗ នៅរសៀលថ្ងៃទី ៦ ខែតុលា យ៉ាងខ្លីបែបនេះថា៖«មកដល់ពេលនេះ សមត្ថកិច្ចនៅមិនទាន់ចាប់បានទេ តែពួកយើងខិតខំណាស់ មិនឲ្យជនត្រូវចោទរួចខ្លួនឡើយ»៕