ច្បាប់ថ្មី៖ ព្រឹទ្ធសភា និងមហាផ្ទៃ ថា កៅអីសមាជិកព្រឹទ្ធសភាបក្សប្រឆាំង មិនបាត់បង់ឡើយ

ជាតិ

ច្បាប់ថ្មី៖ ព្រឹទ្ធសភា និងមហាផ្ទៃ ថា កៅអីសមាជិកព្រឹទ្ធសភាបក្សប្រឆាំង មិនបាត់បង់ឡើយ

17, Oct 2017 , 9:39 pm

រូបភាព

ដោយ: ថ្មីៗ

ភ្នំពេញ៖ ព្រឹទ្ធសភា និងក្រសួងមហាផ្ទៃ ថាខ្លឹមសារច្បាប់ស្តីពីបោះឆ្នោតជ្រើសតាំងសមាជិកព្រឹទ្ធសភានិងច្បាប់ចំនួន៣ទៀត មិនប៉ះពាល់ដល់កៅអីសមាជិកព្រឹទ្ធសភាគណបក្សប្រឆាំងឡើយ។ ព្រឹទ្ធសភា កំពុងពិនិត្យសេចក្តីស្នើសុំឲ្យធ្វើវិសោធនកម្មច្បាប់ទាំង៤ ទាក់ទងនឹងការយកអាសនៈនៃគណបក្សមួយ ដែលត្រូវបានរំលាយ ឲ្យគណបក្សដទៃ។

ខ្លឹមសារច្បាប់ស្តីពីបោះឆ្នោតជ្រើសតាំងសមាជិកព្រឹទ្ធសភា ត្រូវបានក្រុមសមាជិកសភានៃគណបក្សប្រជាជនកម្ពុជា សម្រេចកែប្រែមាត្រា ចំនួន២ ដើម្បីស្របទៅនឹងការវិវត្តនយោបាយនាពេបច្ចុប្បន្ននេះ។ ចំពោះខ្លឹមសារនៃការកែប្រែមាត្រាច្បាប់នេះ ត្រូវបានលោក ម៉ម ប៊ុននាង អ្នកនាំពាក្យព្រឹទ្ធសភា បាននិយាយថា បើមើលលើខ្លឹមសារកែប្រែមាត្រាច្បាប់បោះឆ្នោតជ្រើសតាំងសមាជិកព្រឹទ្ធសភានេះ គឺមិនមានចំណុចណាដែលធ្វើឲ្យសមាជិកព្រឹទ្ធសភាមានការព្រួយបារម្ភឡើយ។ អ្នកពាក្យព្រឹទ្ធសភារូបនេះ បានបញ្ជាក់ដូច្នេះថា«ដោយសារតែយើងមើលឃើញភាពចន្លោះប្រហោង ទើបយើងកែប្រែ ដើម្បីឲ្យការអនុវត្តច្បាប់ កាន់តែមានសុពលភាព។ យើងត្រូវអនុវត្តលើគ្រប់គណបក្ស។ យើងមិនសំដៅតែទៅលើគណបក្សណាមួយ ថាត្រូវរំលាយឬមិនរំលាយទេ។

ចុះបើគណបក្សសង្គ្រោះជាតិរំលាយមែន តើវាអាចប៉ះពាល់ដល់កៅអីសមាជិកព្រឹទ្ធគណបក្សប្រឆាំង ក្នុងព្រឹទ្ធសភាដែរទេ? ត្រង់ចំណុចនេះអ្នកនាំពាក្យក្រសួងមហាផ្ទៃ លោក ខៀវ សុភ័គ បានពន្យល់ថា សមាជិកព្រឹទ្ធសភានៃគណបក្ស«ភ្លើងទៀន» នឹងមិនបាត់បង់តួនាទីក្នុងព្រឹទ្ធសភាឡើយ បើទោះជាគណបក្សសង្គ្រោះជាតិ ដែលប្រឈមនឹងការរំលាយបក្ស នាពេលខាងមុខក្តី។ ថ្លែងប្រាប់សារព័ត៌មានថ្មីៗ លោក ខៀវ សុភ័គ បានបញ្ជាក់ដូច្នេះថា៖«វាអត់មានបញ្ហាអ្វីប៉ះពាល់ដល់សមាជិកព្រឹទ្ធសភាគណបក្សភ្លើងទានទេ ព្រោះពួកគាត់បានធ្វើតាមសំណើរបស់ក្រសួងមហាផ្ទៃរួចរាល់ហើយ »។

គណបក្ស សម រង្ស៊ី ដែលបានប្ដូរឈ្មោះទៅជាគណបក្ស«ភ្លើងទៀន» វិញក្រោយពីមានការណែនាំពីក្រសួងមហាផ្ទៃ ដែលបង្គាប់ឲ្យមានការអនុវត្តឲ្យត្រឹមត្រូវ ស្របតាមច្បាប់ស្តីពីគណបក្សនយោបាយ។ ក្រោយប្ដូឈ្មោះរួច គណបក្ស«ភ្លើងទៀន» ក៏បានតម្កល់ឯកសារច្បាប់ នៅក្រសួងមហាផ្ទៃ។ គណបក្ស«ភ្លើងទៀន» ដែលមានឈ្មោះដើមថា គណបក្ស សម រង្ស៊ី នេះបានរួមបញ្ចូលគ្នាជាមួយគណបក្សសិទ្ធិមនុស្ស ដែលដឹកនាំដោយឯកឧត្តម កឹម សុខា ហើយបង្កើតមកជាគណបក្សសង្គ្រោះជាតិ កាលពីឆ្នាំ២០១៣ ។

សារព័ត៌មានថ្មីៗ មិនទាន់អាចទាក់ទងសុំការអត្ថាធិប្បាយពីសមាជិកគណបក្សភ្លើងទៀន បាននោះទេ។

តែយ៉ាងប្រធានគណបក្សភ្លើងទៀន លោក ទាវ វណ្ណុល បានប្រាប់កាសែតភ្នំពេញប៉ុស្តិ៍កន្លងមកថា គណបក្សលោកនឹងនៅតែ «បើក» ទោះបីគណបក្សសង្គ្រោះជាតិត្រូវបានរំលាយក៏ដោយ ហើយអាចនឹងចូលរួមប្រកួតប្រជែងក្នុងការបោះឆ្នោតព្រឹទ្ធសភា និងការបោះឆ្នោតជាតិនៅឆ្នាំក្រោយផងដែរ៕