ជាតិ
ក្រុមសិល្បៈ Jeong Ka Ah Hoe ប្រគំតន្ត្រីអបអរខួប២០ឆ្នាំទំនាក់ទំនាក់ការទូតឡើងវិញកម្ពុជា-កូរ៉េខាងត្បូង
×![]()
ស្ថានទូតកូរ៉េខាងត្បូងប្រចាំកម្ពុជា បានរៀបចំពិធីអបអរសាទរគម្រប់ខួប ២០ឆ្នាំនៃការបង្កើតទំនាក់ទំនងការទូតឡើងវិញ រវាងសាធារណរដ្ឋកូរ៉េ និងកម្ពុជា តាមរយៈការប្រគំតន្ត្រីនៅសាលសន្និសីទចតុមុខ កាលពីថ្ងៃទី១៩ ខែតុលា ដោយមានការអញ្ជើញចូលរួមពីសំណាក់លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ។ ក្នុងពិធីនោះ ក្រុមតន្ត្រីប្រពៃណីដ៏ល្បីល្បាញរបស់កូរ៉េខាងត្បូង គឺក្រុមចងកាអាក់ហូ (Jeong Ka Ak Hoe) បានផ្តល់នូវទស្សនីយភាពលន្លង់លន្លោច និងសប្បាយ លាយឡំគ្នា។
អ្នកចូលរួមប្រមាណ១៣០០នាក់ បានរីករាយអបអរក្នុងពិធីប្រគំតន្ត្រីរបស់ក្រុមតន្ត្រី ក្រុមចងកាអាក់ហូ (Jeong Ka Ak Hoe) នៅសាលសន្និសីទចតុមុខ។ ក្រុមដ៏ល្បីល្បាញរបស់កូរ៉េខាងត្បូង ដែលបង្កើតឡើងកាលពីឆ្នាំ២០០០មកនោះ បានប្រគំបទភ្លេង និងច្រៀងចម្រៀងជាច្រើនបទ ទាំងបទបែបលន្លង់លន្លោច និងបែបញាក់។
នាពិធីអបអរសាទរគម្រប់ខួប ២០ឆ្នាំនៃការបង្កើតទំនាក់ទំនងការទូតឡើងវិញ រវាងសាធារណរដ្ឋកូរ៉េ និងកម្ពុជា អ្នកចូលរួម បានស្លុងអារម្មណ៍ជាមួយបទចម្រៀង៤បទ ដ៏លន្លង់លន្លោច ក្នុងនោះមានបទ «អ៊ីយ៉ាងអុង» ដែលច្រៀងរៀបរាប់ពីសម្រស់របស់ធម្មជាតិ និងការរួមរស់របស់មនុស្សជាមួយធម្មជាតិ។ បទទី២ ដែលមានចំណងជើងថា «យ៉ម យ៉ាងឈូន» ឬ «និទាឃរដូវដ៏ស្រទន់» ត្រូវបានប្រគុំដោយឧបករណ៍ខ្យល់សូឡូជាមួយនឹងភ្លេងឡើងចុះ និងត្រង់ ប៉ុន្តែក្នុងការសំដែងនេះកំណែថ្មីជាលក្ខណៈប្រពៃណី។
បទទី៣ «អាល់លីអូ» អត្ថន័យគឺ តើអ្នកដឹងថាខ្ញុំមានអារម្មណ៍យ៉ាងដូចម្ដេច? ឬក៏«តើនរណាដឹងថាខ្ញុំមានអារម្មណ៍យ៉ាងណា»? ដូចជាពាក្យ ALio គឺ ជាការរៀបរាប់អំពីទុក្ខសោករបស់បុគ្គល ដោយគ្មាននរណាស្ដាប់ ឬឆ្លើយ។ បន្ទាប់មកបទទី៤ «ចម្រៀងបែកបាក់» ដែលមានរឿងរ៉ាវនៃការព្រាត់ប្រាស់របស់ជនជាតិកូរ៉េ រឿងរ៉ាវនៃការរសាត់អណ្ដែតរបស់ជនជាតិកូរ៉េ រឿងរ៉ាវដែលជនជាតិកូរ៉េ ត្រូវបានរសាត់អណ្ដែតនៅទីនោះ ទីនេះ ប្រជាជនដែលព្រាត់ប្រាស់នៅចំស្ថានភាពដ៏សម្បើមជាប្រវត្តិសាស្ត្រ។
នៅផ្នែកទីពីរនៃការប្រគំតន្ត្រី ក្រុមសិល្បៈ Jeong Ka Ah Hoe បានផ្លាស់ប្តូរអារម្មណ៍អ្នកចូលរួមជាមួយនឹងបទញាក់ដ៏សប្បាយរីករាយចំនួន៥បទ។ បទទី១មានចំណងជើងថា «យ៉ងចង់ខរី» ជាចម្រៀងដើមបង្កប់អារម្មណ៍រវើរវាយ និងឈឺចាប់រួមជាមួយសំឡេងគ្រូមន្តអាគមផ្សេងៗលាយឡំគ្នា។ ទោះបីជាវាជាបទចម្រៀងចាស់ៗពីមុនក៏ដោយ ប៉ុន្តែសាច់ភ្លេងបែបសម័យគួរឲ្យទាក់ទាញយ៉ាងខ្លាំង។
បទទី២ «សាជេយ៉ា» មានន័យថា ប្រសិនមានព្រះជាម្ចាស់ខ្លាំងដែលពោរពេញទៅដោយអំណាចក្នុងពិភពលោកនៃមនុស្ស នោះក៏ត្រូវមានព្រះជាម្ចាស់តូចតាចដែលនៅឆ្ងាយដាច់ពីគេដែរ។ Sajeya ជាចម្រៀងមួយសម្រាប់លួងលោមដល់ព្រះជាម្ចាស់តូចនោះផងដែរ។ បទទី៣ «ណាន់ផុងខា» អត្ថន័យគឺ អ្នកខ្លះចង់បានស្នេហាដែលពោរពេញដោយតណ្ហារំជើបរំជួល ចំណែកអ្នកខ្លះទៀតចង់បានស្នេហាដែលកក់ក្ដៅ។ ប៉ុន្តែដោយសារតែសេចក្ដីសង្ឃឹមទៅលើសេចក្ដីសេ្នហាវាធំពេក ទើបធ្វើឲ្យសេចក្ដីស្នេហាមិនអាចរ៉ូមេនទិចជានិច្ចកាលនោះទេ។
បទទី៤ «អល់សារ» អត្ថន័យគឺ នៅក្នុងអតីតកាល និងបច្ចុប្បន្នយើងតែងតែមានសង្ឃឹម។ ដោយសារតែម្នាក់ៗមានសេចក្ដី្តត្រូវការ តិច ឬច្រើនរៀងៗខ្លួនហេតុនេះហើយ យើងគិតថាកំពុងរស់នៅក្នុងជីវិតមួយ ទីកន្លែងតែមួយនៃជីវិតនេះ។ បទចុងក្រោយនេះមានចំណងជើងថា «អឆា» មានអត្ថន័យថា វាជាកម្លាំងជម្រុញចម្រៀងអ្នកចែវទូកនៅក្នុង Baeyeonshin Gut នៃឆ្នេរសមុទ្រខាងលិច។ វាជាចម្រៀងសម្រាប់មនុស្សគ្រប់គ្នាដែលបានប្រគុំតន្ត្រី Ak Dan Gwang Chil សង្ឃឹមចង់បានសេចក្ដីសុខ និងភាពសប្បាយរីករាយ ដូចជាការវិលត្រលប់មកវិញរបស់ទូកដែលផ្ទុកពោរពេញទៅដោយត្រីពេញទូកជាដើម។
គូសបញ្ជាក់ទំនាក់ទំនងការទូតរវាងប្រទេសកម្ពុជា និងប្រទេសកូរ៉េខាងត្បូងត្រូវបានបង្កើតឡើងជាលើកដំបូងនៅឆ្នាំ១៩៧០។ នៅឆ្នាំ១៩៧៥ ទំនាក់ទំនងការទូរវាងប្រទេសទាំងពីរត្រូវបានកាត់ផ្ដាច់ នៅសម័យកម្ពុជាប្រជាប្រជាធិបតេយ្យ(របបខ្មែរក្រហម)ដែលដឹកនាំប្រទេសបែបកុម្មុយនីស្ដ។ បន្ទាប់មកនៅឆ្នាំ១៩៧៩ ប្រទេសទាំងពីបានបង្កើតទំនាក់ទំនងការទូតជាមួយគ្នាជាថ្មីម្ដងទៀត ក្រោយពីមានការធ្វើទស្សនកិច្ចរបស់ សម្ដេចនាយករដ្ឋមន្ត្រី ហ៊ុន សែន នៅកូរ៉េខាងត្បូង។
ក្នុងទំនាក់ទំនងការទូតរវាងប្រទេសទាំងពីរ កូរ៉េបានផ្ដល់ជំនួយប្រាក់ឥតសំណងចំនួន៧៧ លានដុល្លា និងប្រាក់កម្ចីចំនួន២១៨ លានដុល្លារ ដើម្បីធ្វើការអភិវឌ្ឍន៍ដល់កម្ពុជា នៅក្នុងរយៈ៥ឆ្នាំចុងក្រោយ។ កូរ៉េខាងត្បូងជាម្ចាស់ជំនួយទ្វេភាគីធំទី៥ នៅកម្ពុជា ចាប់តាំងពីឆ្នាំ២១០៣មក។ កូរ៉េខាងត្បូងជាវិនិយោគកិនបរទេសដ៏ធំឈរនៅលំដាប់ទី២នៅកម្ពុជា ក្នុងនោះដោយមានចំនួនទឹកប្រាក់វិនិយោគប្រមាណ ២,៩ ពាន់ដុល្លារ។ ពាណិជ្ជកម្មរវាងប្រទេសទាំងពីរបានកើនឡើង៦ដងចាប់ពីឆ្នាំ១៩៩៧៕
© រក្សាសិទ្ធិដោយ thmeythmey.com
