ជាតិ
×![]()
ដោយ: ម៉ៅ សុផា
ភ្នំពេញ៖ ចាប់ពីថ្ងៃទី១ ខែកញ្ញា ដល់ថ្ងៃទី២០ ខែតុលា ឆ្នាំ២០១៧ ប្រជាពលរដ្ឋជាង ៤សែននាក់ (ចំនួនថ្មី) បានទៅចុះឈ្មោះបោះឆ្នោត ដោយគិតក្នុងចំណោមប្រជាពលរដ្ឋជាង ១.៦លាននាក់ ដែលមិនបានចុះឈ្មោះបោះឆ្នោត កាលពីឆ្នាំ២០១៦ កន្លងមក។ ដូច្នេះ នៅសល់ប្រជាពលរដ្ឋជាង ១លាននាក់ទៀត ដែលមិនទាន់ទៅចុះឈ្មោះបោះឆ្នោត ខណៈការចុះឈ្មោះបោះឆ្នោត នឹងត្រូវបញ្ចប់នៅថ្ងៃទី៩ ខែវិច្ឆិកា ឆ្នាំ២០១៧។
លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត ធ្លាប់អះអាងថា ក្នុងចំណោមប្រជាពលរដ្ឋជាង ១.៦លាននាក់នោះ ប្រជាពលរដ្ឋ ដែលកំពុងធ្វើការនិងរស់នៅឯក្រៅប្រទេស មានរហូតដល់ទៅជាង ១លាននាក់។ លោក ធ្លាប់និយាយទៀតថា ប្រជាពលរដ្ឋជាង១លាននាក់ ដែលមិនទាន់បានទៅចុះឈ្មោះបោះឆ្នោត ភាគច្រើនគឺប្រជាពលរដ្ឋនៅក្រៅប្រទេស។
កាលពីឆ្នាំ២០១៦ ប្រជាពលរដ្ឋជិត៧លាននាក់ (ចំនួនចាស់) បានទៅចុះឈ្មោះបោះឆ្នោត។ ប្រជាពលរដ្ឋទាំងនោះ នឹងមានសិទ្ធិទៅបោះឆ្នោតថ្នាក់ជាតិក្នុងឆ្នាំ២០១៨ តែម្តង ដោយមិនតម្រូវឲ្យចុះឈ្មោះម្តងទៀតទេ។ ប៉ុន្តែ ពួកគេ ក៏ត្រូវតែទៅពិនិត្យឈ្មោះរបស់ខ្លួនឡើងវិញដែរ ដែលត្រូវបានបិទផ្សាយនៅតាមឃុំ-សង្កាត់ ឬក៏ចូលទៅស្វែងរកក្នុងគេហទំព័រ http://www.voterlist.org.kh/ ។ ចំណែកឯប្រជាពលរដ្ឋ ដែលមិនទាន់មានឈ្មោះក្នុងបញ្ជីបោះឆ្នោត ត្រូវតែទៅចុះឈ្មោះបោះឆ្នោតនាពេលនេះ ដើម្បីមានសិទ្ធិបោះឆ្នោតក្នុងឆ្នាំ២០១៨។
បើបូកបញ្ជូល ចំនួនចាស់នៃប្រជាពលរដ្ឋ ដែលបានចុះឈ្មោះក្នុងឆ្នាំ២០១៦ និងចំនួនថ្មីនៃប្រជាពលរដ្ឋ ដែលទើបបានចុះឈ្មោះក្នុងឆ្នាំ២០១៧នេះ ប្រជាពលរដ្ឋជាង ៨.២សែននាក់ហើយ ដែលមានឈ្មោះក្នុងបញ្ជីបោះឆ្នោតនាពេលបច្ចុប្បន្ន៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
