ជាតិ
នយោបាយជាតិ
រូបភាព៖ លោក គង់ គាំ អ្នកនយោបាយជាន់ខ្ពស់នៃគណបក្សសង្គ្រោះជាតិ ថ្លែងក្នុងពិធីអបអរសាទរទិវារម្លឹកខួបលើកទី២៦ នៃកិច្ចព្រមព្រៀងសន្តិភាពទីក្រុងប៉ារីស ដែលរៀបចំនៅទីស្នាក់ការកណ្តាលរបស់គណបក្សសង្គ្រោះជាតិ នាថ្ងៃទី២៣ ខែតុលា ឆ្នាំ២0១៧
×![]()
ដោយ: ម៉ៅ សុផា
ភ្នំពេញ៖ បក្សប្រឆាំង ចាត់ទុកការចាកចេញរបស់មន្ត្រីខ្លួន ទៅចុះចូលជាមួយបក្សកាន់អំណាច ថាជាសិទ្ធិសេរីភាព ដោយមិនហាមឃាត់អ្វីឡើយ។ ឯបក្សកាន់អំណាច ប្រកាសស្វាគមន៍ជានិច្ច បើមន្ត្រីបក្សប្រឆាំង ទៅចូលរួមជាមួយខ្លួន។
បញ្ហាថ្មីមួយទៀតរបស់គណបក្សសង្គ្រោះជាតិ ដែលទើបនឹងកើតឡើង គឺតំណាងរាស្ត្រម្នាក់ បានទៅចុះចូលជាមួយគណបក្សប្រជាជនកម្ពុជា។ ប៉ុន្តែបញ្ហានេះ មិនបានធ្វើឲ្យគណបក្សសង្គ្រោះជាតិ កើតទោមនស្ស ឬបារម្ភនោះទេ។ មិនត្រឹមតែប៉ុណ្ណោះ គណបក្សសង្គ្រោះជាតិ ថែមទាំងជូនពរតំណាងរាស្ត្រឬមន្ត្រីរបស់ខ្លួន ដែលទៅរួមជីវភាពនយោបាយជាមួយគណបក្សប្រជាជនកម្ពុជា ថែមទៀត។
ប្រធានបទនៃការដើរចេញរបស់តំណាងរាស្ត្រ ត្រូវបានលើកទៅនិយាយក្នុងពិធីអបអរសាទរទិវារម្លឹកខួបលើកទី២៦ នៃកិច្ចព្រមព្រៀងសន្តិភាពទីក្រុងប៉ារីស ដែលរៀបចំនៅទីស្នាក់ការកណ្តាលរបស់គណបក្សសង្គ្រោះជាតិ នាថ្ងៃទី២៣ ខែតុលា ឆ្នាំ២0១៧នេះ។ ហើយលោក ឡុង ប៊ុន្នី តំណាងរាស្ត្រប្រចាំខេត្តព្រៃវែង ដែលទើបនឹងប្រកាសដើរចេញពីគណបក្សសង្គ្រោះជាតិ ហើយទៅចូលរួមជាមួយគណបក្សប្រជាជនកម្ពុជា បានក្លាយតួអង្គ ដែលត្រូវបានលើកឡើងក្នុងពីធីនេះ។
លោក គង់ គាំ អ្នកនយោបាយជាន់ខ្ពស់ ហើយត្រូវបានចាត់ទុកជាចាស់ទុំមួយរូបក្នុងគណបក្សសង្គ្រោះជាតិ ជាអ្នកនិយាយមុនគេ ចំពោះករណីរបស់លោក ឡុង ប៊ុន្នី ក្នុងពិធីអបអរសាទរទិវារម្លឹកខួបលើកទី២៦ នៃកិច្ចព្រមព្រៀងសន្តិភាពទីក្រុងប៉ារីស។ លោក គង់ គាំ លើកឡើងថា កុំថាឡើយត្រឹមលោក ឡុង ប៊ុន្នី សូម្បីតែតំណាងរាស្ត្រនិងសមាជិកក្រុមប្រឹក្សាឃុំ-សង្កាត់ទាំងអស់ ទៅចុះចូលជាមួយគណបក្សប្រជាជនកម្ពុជា ក៏គណបក្សសង្គ្រោះជាតិ មិនហាមឃាត់ដែរ។
លោក គង់ គាំ បញ្ជាក់យ៉ាងដូច្នេះថា៖«ខ្ញុំមិនដឹងទេ ស្រេចតែបងប្អូន សម្រេចដោយខ្លួនចុះ។ ខ្ញុំមិនឃាត់ មិនឃាំង មិនរារាំង មិនរុញច្រានអីទេ ពិចារណាមើលទៅ។ […..] ក្រុមប្រឹក្សាឃុំ សង្កាត់ទាំង ៥ពាន់នាក់នុ៎ង ខ្ញុំគោរពណាស់ ខ្ញុំជឿណាស់ ប៉ុន្តែ អ្នកមានបញ្ហា ចង់ទៅ ក៏ទៅចុះ។ ហើយអ្នកតំណាងរាស្ត្រទាំង ៥៥នាក់នុ៎ង ខ្ញុំគោរពស្រឡាញ់ណាស់ ប៉ុន្តែបើមានបញ្ហា ចង់ទៅ ក៏ទៅចុះ។ ទៅភ្លក់ទៅ»។ ដ្បិតលើកឡើយបែបនេះក្តី តែលោក គង់ គាំ បែរជាបង្ហាញជំនឿយ៉ាងមុតមាំថា ក្រុមតំណាងរាស្ត្រ និងក្រុមប្រឹក្សាឃុំ-សង្កាត់ រួមទាំងប្រជាពលរដ្ឋជាង ៣លាននាក់ ដែលគាំទ្រគណបក្សសង្គ្រោះជាតិ នឹងមិនបោះបង់គណបក្សសង្គ្រោះជាតិឡើយ។
លោក ប៉ុល ហំម អនុប្រធានគណបក្សសង្គ្រោះជាតិ មិនខ្វល់អ្វីឡើយចំពោះការចាកចេញរបស់លោក ឡុង ប៊ុន្នី ឬក៏អ្នកផ្សេងទៀត។ លោក ចាត់ទុក ការចាកចេញនិងការចូលរួមក្នុងគណបក្សណាមួយ ថាជាសិទ្ធិសេរីរបស់បុគ្គល ដោយមិនគួររំលោភបំពាននោះទេ។ លោក និយាយដូចលោក គង់ គាំ ដែរថា ទោះជាតំណាងរាស្ត្រឬក្រុមប្រឹក្សាឃុំ-សង្កាត់ផ្សេងទៀត ចង់ដើរចេញ ក៏គណបក្សសង្គ្រោះជាតិ មិនហាមប្រាមដែរ។
អនុប្រធានគណបក្សសង្គ្រោះជាតិរូបនេះ បញ្ជាក់យ៉ាងដូច្នេះ៖«គេ មានការភ័យខ្លាច គេចង់ទៅ ជាសិទ្ធិរបស់គេ។ យើង គ្មានវិធីអ្វីទប់ស្កាត់ទេ។ អ្នកណា ចង់ទៅ ទៅ ទៅ។ ខ្ញុំអត់មានការព្រួយបារម្ភទាំងអស់។ សូម្បីរំលាយគណបក្ស ក៏ខ្ញុំអត់មានការព្រួយបារម្ភដែរ»។
ឯលោក មៅ មុនី្នវណ្ណ តំណាងរាស្ត្រ និងជាអនុប្រធានគណៈកម្មាធិការប្រតិបត្តិនៃគណបក្សសង្គ្រោះជាតិ ក៏មិនកើតក្តីថ្នាំងថ្នាក់ជាមួយលោក ឡុង ប៊ុន្នី ដែរ។ ឆ្លើយនឹងសំណួរក្រុមអ្នកកាសែត ដែលសួរចំពោះការចាកចេញរបស់លោក ឡុង ប៊ុន្នី លោក ម៉ៅ មុនី្នវណ្ណ និយាយយ៉ាងខ្លីថា៖«គាត់ចេញទៅ ខ្ញុំ យល់ថា ជាសិទ្ធិសេរីភាពគាត់»។
សម្រាប់ លោក អ៊ូ ច័ន្ទរ័ត្ន តំណាងរាស្ត្រ និងជាសមាជិកគណៈកម្មាធិការអចិន្ត្រៃយ៍នៃគណបក្សសង្គ្រោះជាតិ បានជូនពរលោក ឡុង ប៊ុន្នី ដោយលាយឡំជាមួយការចំអកឡកឡឺយ។ លោក លើកឡើងថា អ្នកទៅចុះចូលជាមួយគណបក្សប្រជាជនកម្ពុជា ព្រោះទំនងជាមិនទាន់ស្គាល់ច្បាស់ពីគណបក្សប្រជាជនកម្ពុជា។ លោក និយាយបែបនេះថា៖«អ្នកដែលចង់ទៅភ្លក់ ដោយសារអត់ដែលដឹងក្លិន។ ខ្ញុំថា មិនបាច់ ទៅភ្លក់ទេ គ្រាន់តែធុំក្លិនហ្នឹង ក៏គ្រប់គ្រាន់ដែរ»។
សារព័ត៌មានថ្មីៗ មិនអាចសុំការឆ្លើយតបពីលោក ឡុង ប៊ុន្នី បានឡើយ ដោយសារតែហៅទូរសព្ទមិនចូល។
លោក ឡុង ប៊ុន្នី បានសុំចុះចូលជាមួយគណបក្សប្រជាជនកម្ពុជា ស្របពេលឯកឧត្តម កឹម សុខា កំពុងជាប់ឃុំ ហើយគណបក្សសង្គ្រោះជាតិ ក៏កំពុងប្រឈមនឹងការរំលាយចោលពីសំណាក់តុលាការកំពូល។ លោក ឡុង ប៊ុន្នី សុំចុះជាមួយគណបក្សប្រជាជនកម្ពុជា ក្រោយសម្តេច ហ៊ុន សែន ប្រកាសនៅថ្ងៃទី២១ ខែតុលា ឆ្នាំ២0១៧ ថា ៩៩ភាគរយ ដែលគណបក្សសង្គ្រោះជាតិ នឹងត្រូវរំលាយ។
សម្តេច ហ៊ុន សែន បន្តថា ពេលត្រូវរំលាយចោល តំណាងរាស្ត្រនិងក្រុមប្រឹក្សាឃុំ-សង្កាត់ ទាំងអស់នៃគណបក្សសង្គ្រោះជាតិ និងអស់សុភពភាព។ ប៉ុន្តែ សម្តេច ប្រកាសបើកផ្លូវថា បើចង់រក្សាតំណែងដដែល សមាជិកក្រុមប្រឹក្សាឃុំ-សង្កាត់នៃគណបក្សសង្គ្រោះជាតិ គួរតែចុះចូលជាមួយគណបក្សប្រជាជនកម្ពុជា។
គ្រាន់តែលោក ឡុង ប៊ុន្នី សរសេរលិខិតទៅសុំចុះចូលភ្លាម សម្តេច ហ៊ុន សែន ក៏ប្រកាសស្វាគមន៍តែម្តង ដោយមិនបង្អង់យូរ។ ហ្វ្រេសញូ (Fresh News) ដែលជាសារព័ត៌មានស្និទ្ធនឹងរដ្ឋាភិបាល បានស្រង់ប្រសាសន៍របស់សម្តេច ហ៊ុន សែន យ៉ាងដូច្នេះថា៖«ស្វាគមន៍ទាំងអស់ចំពោះការចុះចូលជាមួយគណបក្សប្រជាជនកម្ពុជា ហើយបើតំណាងរាស្ត្រ មេឃុំ-ចៅសង្កាត់ ឬសមាជិកគណបក្សសង្គ្រោះជាតិ ដែលមានបំណងចុះចូល គឺគណបក្សប្រជាជនកម្ពុជា ស្វាគមន៍ទាំងអស់»។
ប្រសិនបើគណបក្សសង្គ្រោះជាតិ ដែលកំពុងរងបណ្តឹងនៅតុលាការកំពូល ត្រូវបានរំលាយចោលមែននោះ រាល់អាសនៈក្នុងរដ្ឋសភា និងសមាជិកក្រុមប្រឹក្សាឃុំ-សង្កាត់នៃគណបក្សនេះ នឹងអស់សុពលភាព និងលែងមានគុណសម្បតិ្តជាអ្នកតំណាងឲ្យប្រជាពលរដ្ឋទៀតហើយ ព្រោះច្បាប់ថ្មីចំនួន៤ ទើបនឹងត្រូវបានកែប្រែ មានខ្លឹមសារជារួមយ៉ាងដូច្នេះ។ តាមច្បាប់ថ្មី ដែលផ្តួចផ្តើមដោយក្រុមតំណាងរាស្ត្រគណបក្សប្រជាជនកម្ពុជា រាល់អាសនៈរបស់គណបក្សសង្គ្រោះជាតិ ដែលត្រូវរំលាយចោល ត្រូវបែងចែកទៅឲ្យគណបក្សដទៃ។
បច្ចុប្បន្ន ច្បាប់ថ្មីទាំងនោះ កំពុងស្ថិតក្នុងដៃក្រុមប្រឹក្សាធម្មនុញ្ញ ដើម្បីពិនិត្យបន្ត។ ពេលក្រុមប្រឹក្សាធម្មនុញ្ញ ពិនិត្យរួចហើយ ជាដំណាក់កាលចុងក្រោយ ច្បាប់ខាងលើ នឹងត្រូវថ្វាយទៅព្រះមហាក្សត្រ ដើម្បីព្រះអង្គឡាយព្រះហស្តលេខា ប្រកាសឲ្យប្រើប្រាស់ជាផ្លូវការ។
ច្បាប់ទាំង៤ ដែលត្រូវបានកែប្រែ រួមមាន ច្បាប់ទាំង៤ ដែលត្រូវបានកែប្រែ រួមមាន ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ច្បាប់ស្តីពីការបោះឆ្នោតជ្រើសតាំងក្រុមប្រឹក្សាឃុំ សង្កាត់ និងច្បាប់ស្តីពីការបោះឆ្នោតជ្រើសតាំងក្រុមប្រឹក្សារាជធានី ខេត្ត ក្រុង ស្រុក ខណ្ឌ៕
Tag:
CNRP
CPP
គង់ គាំ
© រក្សាសិទ្ធិដោយ thmeythmey.com
