ជាតិ
នយោបាយជាតិ
ក្រោយចូល CPP លោក ឡុង ប៊ុន្នី ក្លាយជាទីប្រឹក្សាផ្ទាល់របស់សម្តេច ហ៊ុន សែន អតីតតំណាងរាស្ត្រគណបក្សសង្គ្រោះជាតិ លោក ឡុង ប៊ុន្នី ក្លាយជាទីប្រឹក្សាសម្តេចហ៊ុន សែន។ រូបថត BTV Cambodia
× ភ្នំពេញ៖ ក្រោយចាកចេញពីគណបក្សសង្គ្រោះជាតិ ទៅចុះចូលជាមួយគណបក្សប្រជាជនកម្ពុជា មិនទាន់បានមួយសប្តាហ៍ស្រួលបួលផង លោក ឡុង ប៊ុន្នី តំណាងរាស្ត្រប្រចាំខេត្តព្រៃវែង បានទទួលតំណែងជាទីប្រឹក្សាផ្ទាល់របស់សម្តេចនាយករដ្ឋមន្ត្រី ហ៊ុន សែន។ លោក ផៃ ស៊ីផាន អ្នកនាំពាក្យនៃទីស្តីការគណៈរដ្ឋមន្ត្រី ប្រាប់សារព័ត៌មានថ្មីៗថា សម្តេច ហ៊ុន សែន បានប្រកាសពីការផ្តល់តួនាទីដល់លោក ឡុង ប៊ុន្នី នៅក្នុងកិច្ចប្រជុំនៃទីស្តីការគណៈរដ្ឋមន្ត្រី នាថ្ងៃទី២៧ ខែតុលា ឆ្នាំ២០១៧នេះ។
បើតាមលោក ផៃ ស៊ីផាន សម្តេច ហ៊ុន សែន លើកឡើងក្នុងកិច្ចប្រជុំនៃគណៈរដ្ឋមន្ត្រីថា នឹងបន្តទទួលស្វាគមន៍មន្ត្រីគណបក្សសង្គ្រោះជាតិផ្សេងទៀត ដែលទៅចុះចូលជាមួយគណបក្សប្រជាជនកម្ពុជា។ មន្ត្រីជាន់ខ្ពស់រដ្ឋាភិបាលរូបនេះ និយាយដូច្នេះថា៖«សម្តេច [ហ៊ុន សែន] នៅតែបន្តអំពាវនាវ ចំពោះការចុះចូលជាមួយគណបក្សប្រជាជនកម្ពុជា ដើម្បីជាកម្លាំងកសាងសន្តិភាពនិងការអភិវឌ្ឍរបស់ប្រទេសជាតិ»។
ថ្មីៗនេះ សម្តេច ហ៊ុន សែន បានប្រកាសម្តងហើយម្តងទៀត ថាតំណាងរាស្ត្រ សមាជិកក្រុមប្រឹក្សាឃុំ-សង្កាត់ រួមទាំងសមាជិកក្រុមប្រឹក្សារាជធានី ខេត្ត ក្រុង ស្រុខ ខណ្ឌ របស់គណបក្សសង្គ្រោះជាតិ នឹងអាចរក្សាតំណែងរបស់ខ្លួនបានដដែល ប្រសិនបើពួកគេ ទៅចួលរួមជីវភាពនយោបាយជាមួយគណបក្សប្រជាជនកម្ពុជា។ សម្តេច ហ៊ុន សែន បញ្ជាក់ថា ពួកគេ នឹងមិនអាចបន្តធ្វើជាអ្នកតំណាងរបស់ប្រជាពលរដ្ឋបានទៀតទេ ប្រសិនបើគណបក្សសង្គ្រោះជាតិ ត្រូវបានរំលាយ។
ក្រៅពីលោក ឡុង ប៊ុន្នី អ្នកមួយចំនួនទៀត ជាពិសេសក្រុមប្រឹក្សាឃុំ-សង្កាត់ពីគណបក្សសង្គ្រោះជាតិ ត្រូវបានសារព័ត៌មានចុះផ្សាយជាហូរហែថា បានទៅចុះចូលជាមួយគណបក្សប្រជាជនកម្ពុជា ក្រោយសម្តេច ហ៊ុន សែន ប្រកាសស្វាគមន៍។ យ៉ាងណា ស្របពេលមានការចាកចេញបែបនេះ ក៏មានសមាជិកប្រឹក្សាឃុំ-សង្កាត់មួយចំនួនរបស់គណបក្សសង្គ្រោះជាតិ ព្យាយាមបង្ហាញពីភាពស្មោះស្មគ្ររបស់ខ្លួនផងដែរ ដោយប្រកាសថានឹង មិនទៅចុះចូលជាមួយគណបក្សប្រជាជនកម្ពុជាឡើយ។
រីឯមន្ត្រីជាន់ខ្ពស់គណបក្សសង្គ្រោះជាតិខ្លះ មានដូចជា លោក គង់ គាំ លោក ប៉ុល ហំម និងលោក ម៉ៅ មុន្នីវណ្ណ ជាដើម អះអាងថា មិនឃាត់ឃាំងបុគ្គលណាមួយ ដែលចង់ទៅចុះចូលជាមួយគណបក្សប្រជាជនកម្ពុជានោះទេ។ មន្ត្រីជាន់ខ្ពស់គណបក្សសង្គ្រោះជាតិខាងលើ យល់ថា ការចាកចេញពីគណបក្ស គឺជាសិទ្ធិសេរីភាព។ ប៉ុន្តែ មន្ត្រីជាន់ខ្ពស់គណបក្សសង្គ្រោះជាតិមួយរូបទៀត គឺលោក អេង ឆៃអ៊ាង ស្នើឲ្យតំណាងរាស្ត្រ ក៏ដូចជាក្រុមប្រឹក្សាឃុំ-សង្កាត់ទាំងអស់របស់គណបក្សសង្គ្រោះជាតិ រក្សាជំហររបស់ខ្លួនឲ្យបាននឹងន។
បច្ចុប្បន្ននេះ គណបក្សសង្គ្រោះជាតិ កំពុងប្រឈបនឹងការរំលាយចោល ពីសំណាក់តុលាការកំពូល ដែលមានក្រសួងមហាផ្ទៃ ជាដើមបណ្តឹង។ ប្រសិនបើតុលាការកំពូល រំលាយចោលមែននោះ រាល់អាសនៈនិងភាពជាតំណាងរបស់គណបក្សសង្គ្រោះជាតិ នឹងត្រូវបែងចែកទៅឲ្យគណបក្សដទៃ ទៅតាមខ្លឹមសារថ្មីនៃច្បាប់បោះឆ្នោត ដែលទើបនឹងធ្វើវិសោធនកម្ម ក្រោមគំនិតផ្តួចផ្តើមរបស់តំណាងរាស្ត្រគណបក្សប្រជាជនកម្ពុជា៕
Tag:
លោក ឡុង ប៊ុន្នី
CNRP
CPP
© រក្សាសិទ្ធិដោយ thmeythmey.com