១៨ថ្ងៃទៀតប៉ុណ្ណោះ តុលាការកំពូល នឹងសម្រេចថា ត្រូវរំលាយបក្សសង្គ្រោះជាតិ ឬមិនរំលាយ

ជាតិ

នយោបាយជាតិ

១៨ថ្ងៃទៀតប៉ុណ្ណោះ តុលាការកំពូល នឹងសម្រេចថា ត្រូវរំលាយបក្សសង្គ្រោះជាតិ ឬមិនរំលាយ

30, Oct 2017 , 12:28 pm

រូបភាព

រូបភាព៖ ទីស្នាក់ការកណ្តាលគណបក្សសង្គ្រោះជាតិ ស្ថិតក្នុងសង្កាត់ចាក់អង្រែលើ ខណ្ឌមានជ័យ រាជធានភ្នំពេញ

ដោយ: ម៉ៅ សុផា

ភ្នំពេញ៖ តុលាការកំពូល នឹងជំនុំជម្រះលើបណ្តឹងសុំឲ្យរំលាយគណបក្សសង្គ្រោះជាតិ នៅថ្ងៃទី១៦ ខែវិច្ឆិកា ឆ្នាំ២0១៧ ដោយបានកោះហៅឯកឧត្តម កឹម សុខា ឲ្យចូលរួមតតាំង ក្នុងសវនាការ។ ប៉ុន្តែឯកឧត្តម កឹម សុខា និងគណបក្សសង្គ្រោះជាតិ នៅតែប្រកាន់ជំហរថា មិនធ្វើតាមអ្វីដែលតុលាការកំពូលបង្គាប់។

ត្រឹម១៨ថ្ងៃទៀតប៉ុណ្ណោះ វាសនារបស់គណបក្សសង្គ្រោះជាតិ ដែលក្លាយទៅជាយ៉ាងណានោះ នឹងត្រូវសម្រេចដោយតុលាការកំពូល។ តុលាការកំពូល បានកំណត់យកថ្ងៃទី១៦ ខែវិច្ឆិកា ឆ្នាំ២0១៧ ដើម្បីបើកសវនាការជំនុំជម្រះលើបណ្តឹងសុំឲ្យរំលាយគណបក្សសង្គ្រោះជាតិ។

លោក ឌិត មុន្នី ប្រធានតុលាការកំពូល នឹងធ្វើជាប្រធានក្រុមប្រឹក្សាជំនុំជម្រះដោយខ្លួនឯង ដើម្បីកាត់ក្តីលើបណ្តឹងសុំឲ្យរំលាយគណបក្សសង្គ្រោះជាតិ។ ហើយលោក ជាអ្នកចេញដីកា ដើម្បីកំណត់កាលបរិច្ឆេទនៃការបើកសវនាការ។ តាមរយៈដីកា ប្រធានតុលាការកំពូលរូបនេះ បានបង្គាប់ឯកឧត្តម កឹម សុខា ប្រធានគណបក្សសង្គ្រោះជាតិ ដែលកំពុងជាប់ឃុំក្នុងពន្ធនាគារ ក្រោមការសង្ស័យថាជាប់ពាក់ព័ន្ធនឹងអំពើក្បត់ជាតិ ឲ្យចូលរួមសវនាការនាពេលខាងមុខ។

ដីការបស់ប្រធានតុលាការកំពូល ត្រូវបានសមត្ថកិច្ចយកទៅបិទនៅមុខទីស្នាក់ការកណ្តាលគណបក្សសង្គ្រោះជាតិ ដែលស្ថិតនៅសង្កាត់ចាក់អង្រែលើ ខណ្ឌមានជ័យ។ «យើង បានឃើញហើយដីកាហ្នឹង។ ខ្ញុំ ឃើញគេបិទនៅមុខទីស្នាក់ការ»។ លោក ម៉ៅ មុន្នីវណ្ណ តំណាងរាស្ត្រនិងជាអនុប្រធានគណៈកម្មាធិការប្រតិបត្តិនៃគណបក្សសង្គ្រោះជាតិ បញ្ជាប់ប្រាប់សារព័ត៌មានថ្មីៗ តាមទូរសព្ទយ៉ាងដូច្នេះ។

លោក ម៉ៅ មុន្នីវណ្ណ អះអាងថា គណបក្សសង្គ្រោះជាតិ នៅតែប្រកាន់ជំហរ មិនពឹងពាក់មេធាវីដើម្បីឲ្យជួយការពារក្តី ឬដាក់ឯកសារទៅតុលាការកំពូលនោះទេ។ លោក និយាយបែបនេះថា៖«យើង អត់ចូលទៅការពារអីទេ។ តែយើងនឹងរង់ចាំមើលលទ្ធផល»។

ឯកឧត្តម កឹម សុខា បានទទួលដីកាកោះហៅ ឬយ៉ាងណា នៅមិនទាន់មានការបញ្ជាក់ពីអ្នកនាំពាក្យគណបក្សសង្គ្រោះជាតិឡើយ។ លោក សុន ឆ័យ ប្រធានក្រុមតំណាងរាស្ត្រ ហើយទើបទទួលបានតួនាទីជាអ្នកនាំពាក្យគណបក្សសង្គ្រោះជាតិ ប្រាប់សារព័ត៌មានថ្មីៗ ថា អ្វីដែលគណបក្សសង្គ្រោះជាតិ បានដឹងកន្លងមក គឺឯកឧត្តម កឹម សុខា មិនឲ្យពឹងពាក់មេធាវី ដើម្បីតតាំងនៅតុលាការកំពូលនោះទេ។

ការកំណត់ពេល ដើម្បីបើកសវនាការជំនុំជម្រះលើបណ្តឹងសុំឲ្យរំលាយគណបក្សសង្គ្រោះជាតិ ធ្វើឡើង ក្រោយពីវិសោធនកម្មច្បាប់ចំនួន៤ ដែលមានខ្លឹមសារជារួមថា «រាល់អាសនៈនៃគណបក្ស ដែលត្រូវបានរំលាយ ត្រូវបែងចែកទៅឲ្យគណបក្សដទៃ» ទើបនឹងចូលជាធរមាននិងដាក់ឲ្យអនុវត្ត នាពេលថ្មីៗនេះ។ ច្បាប់ទាំង៤ ដែលត្រូវបានធ្វើវិសោធនកម្មដោយក្រុមតំណាងរាស្ត្រគណបក្សប្រជាជនកម្ពុជា រួមមាន ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ច្បាប់ស្តីពីការបោះឆ្នោតជ្រើសតាំងក្រុមប្រឹក្សាឃុំ សង្កាត់ និងច្បាប់ស្តីពីការបោះឆ្នោតជ្រើសតាំងក្រុមប្រឹក្សារាជធានី ខេត្ត ក្រុង ស្រុក ខណ្ឌ។

ឲ្យតែគណបក្សសង្គ្រោះជាតិ ត្រូវបានរំលាយចោល ក្រោមអំណាចនៃសាលដីការបស់តុលាការកំពូលពេលណា រាល់អាសនៈក្នុងរដ្ឋសភា អាសនៈជាសមាជិកក្រុមប្រឹក្សាឃុំ សង្កាត់ និងអាសនៈជាសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ របស់គណបក្សសង្គ្រោះជាតិ នឹងត្រូវបែងចែកទៅឲ្យគណបក្សដទៃ។

អ្នកដែលដាក់បណ្តឹងទៅតុលាការកំពូល ដើម្បីសុំឲ្យរំលាយគណបក្សសង្គ្រោះជាតិ គឺក្រសួងមហាផ្ទៃ ក្រោយមានសំណើពីសំណាក់គណបក្សហ្វ៊ុនស៊ិនប៉ិចរបស់សម្តេចក្រុមព្រះ នរោត្តម រណឫទ្ធិ និងគណបក្សយុវជនកម្ពុជារបស់លោក ពេជ្រ ស្រស់។ គណបក្សទាំងពីរ រួមទាំងក្រសួងមហាផ្ទៃ បានផ្សារភ្ជាប់ករណីឯកឧត្តម កឹម សុខា ដែលសង្ស័យថាជាប់ពាក់ព័ន្ធនឹងអំពើក្បត់ជាតិ ព្រោះបានឃុបឃិតជាមួយបរទេសជាសម្ងាត់ ដើម្បីផ្តួលរំលាយរដ្ឋាភិបាលកម្ពុជា ទៅនឹងគណបក្សសង្គ្រោះជាតិ៕