លោក អ៊ូ ច័ន្ទរ័ត្ន ថា មិនទាន់ឃើញសកម្មភាពលោក ម៉ៅ មុនីវណ្ណ ក្បត់បក្ស

ជាតិ

នយោបាយជាតិ

លោក អ៊ូ ច័ន្ទរ័ត្ន ថា មិនទាន់ឃើញសកម្មភាពលោក ម៉ៅ មុនីវណ្ណ ក្បត់បក្ស

31, Oct 2017 , 10:18 am

រូបភាព

លោក ម៉ៅ មុនីវណ្ណ ឆ្លើយតបសំនួររបស់អ្នកកាសែតនៅមុខតុលាការ នៅថ្ងៃទី៣១ តុលា ឆ្នាំ២០១៧

ដោយ: ម៉ៅ សុផា

ភ្នំពេញ៖ មន្ត្រីជាន់ខ្ពស់គណបក្សសង្គ្រោះជាតិ បាននិយាយថា គណបក្សមិនទាន់ឃើញសកម្មភាពក្បត់បក្សរបស់លោក ម៉ៅ មុនីវណ្ណ ឡើយ។ ការលើកឡើងនេះ ក្រោយពីអតីតប្រធានគណបក្សសង្គ្រោះជាតិ លោក សម រង្ស៊ី បានចោទលោក ម៉ៅ មុនីវណ្ណ ជាសាធារណៈថា កំពុងមានគម្រោងធ្វើបក្សប្រហារ។ សម្រាប់លោក ម៉ៅ មុនីវណ្ណ គណបក្សសង្គ្រោះជាតិនៅតែរឹងមាំ បើទោះជាមានការចោទរបស់លោក សម រង្ស៊ី បែបនេះក្តី។

ខណៈដែលគណបក្សសង្គ្រោះជាតិ កំពុងជាប់ក្តីក្ដាំរឿងរំលាយបក្សនោះ ស្រាប់តែពេលនេះផ្ទុះព័ត៌មានបែកបាក់ផ្ទៃក្នុងបក្សកើតឡើង។ លោក សម រង្ស៊ី អតីតប្រធានគណបក្សសង្គ្រោះជាតិ បានថ្លែងសារនយោបាយពីទីក្រុងរ៉ូម ប្រទេសអ៊ីតាលី តាមរយៈវីដេអូឃ្លីប ៨នាទី ដោយលោកបានចោទប្រកាន់លោក ម៉ៅ មុនីវណ្ណ តំណាងរាស្ត្រមណ្ឌលខេត្តកំពង់ចាម ថាក្បត់បក្ស ដោយរៀបចំគម្រោងធ្វើបក្សប្រហារ។

អត្ថបទទាក់ទង

លោក សម រង្ស៊ី ចោទលោក ម៉ៅ មុនីវណ្ណ ថាក្បត់បក្ស

ប៉ុន្តែមកដល់ពេលនេះ គណបក្សសង្គ្រោះជាតិ មិនទាន់ចេញសេចក្តីថ្លែងការណ៍ណាមួយ ជំទាស់ឬយល់ស្របតាមការលើកឡើងរបស់លោក សម រង្ស៊ី ដែលបានចោទលោក ម៉ៅ មុនីវណ្ណ ក្បត់បក្សឡើយ។ តំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន បានថ្លែងប្រាប់អ្នកសារព័ត៌មាន តបនឹងការលើកឡើងរបស់លោក សម រង្ស៊ី នៅមុខតុលាការកំពូលថា លោកមិនទាន់ឃើញសកម្មភាពញុះញង់ ឬបំបែកបំបាក់គណបក្ស របស់លោក ម៉ៅ មុនីវណ្ណ ដែលមានបំណងធ្វើបក្សប្រហារនោះទេ។

តែយ៉ាងណាលោក អ៊ូ ច័ន្ទរ័ត្ន ហាក់មិនបដិសេធដាច់អហិង្ការ ចំពោះការចោទប្រកាន់របស់លោក សម រង្ស៊ី ដែរ ។ លោក អ៊ូ ច័ន្ទរ័ត្ន ដែលចូលរួមតាមដានសំណុំរឿងឯកឧត្តម កឹម សុខា នៅព្រឹកថ្ងៃទី៣១ តុលានេះ ចាត់ទុកសម្តីលោក សម រង្ស៊ី គឺជាការដាស់តឿនស្មារតីរបស់តំណាងរាស្ត្រ និងសមាជិកគណបក្ស ឲ្យមានការប្រុងប្រយ័ត្នខ្ពស់ប៉ុណ្ណោះ។

ជាមួយគ្នានេះលោក ម៉ៅ មុនីវណ្ណ ដែលបានចូលរួមសំណុំរឿងឯកឧត្តម កឹម សុខា នៅមុខតុលាការដែរនោះ មិនបានឆ្លើយតបអ្វីច្រើន ចំពោះការចោទប្រកាន់របស់លោក សម រង្ស៊ី ឡើយ។ លោក ម៉ៅ មុនីវណ្ណ គ្រាន់តែនិយាយថា គណបក្សសង្គ្រោះជាតិនៅតែរឹងមាំ បើទោះជាមានការចោទរបស់លោក សម រង្ស៊ី បែបនេះក្តី។ លោក ម៉ៅ មុនីវណ្ណ ស្នើឲ្យប្រជាពលរដ្ឋជាអ្នកវាយតម្លៃលើសកម្មភាពរបស់ខ្លួន ចំពោះការចោទប្រកាន់របស់លោក សម រង្ស៊ី នេះ ។

ទាក់ទងនឹងភាពចម្រូងចម្រាសរបស់លោក ម៉ៅ មុនីវណ្ណ នេះធ្លាប់ត្រូវបានផ្សព្វផ្សាយកន្លងមក តាមរយៈសម្តីរបស់សម្ដេចនាយករដ្ឋមន្ត្រី ហ៊ុន សែន ដែលបានអះអាងថា លោក ម៉ៅ មុនីវណ្ណ គឺជាមនុស្សរបស់គណបក្សប្រជាជនកម្ពុជា។ ប៉ុន្តែបញ្ហានេះធ្លាប់ត្រូវបានគណបក្សសង្គ្រោះជាតិច្រានចោលដែរ។

ប៉ុន្តែបញ្ហាចម្រូងចម្រាសគណបក្សសង្គ្រោះជាតិ ស្របពេលដែលតុលាការកំពូល នឹងជំនុំជម្រះលើបណ្តឹងសុំឲ្យរំលាយគណបក្សសង្គ្រោះជាតិ នៅថ្ងៃទី១៦ ខែវិច្ឆិកា ឆ្នាំ២០១៧ ដើម្បីកំណត់ជោគវាសនាគណបក្សសង្គ្រោះជាតិ។ តុលាការកំពូលបានកោះហៅឯកឧត្តម កឹម សុខា ឲ្យចូលរួមតតាំង ក្នុងសវនាការ ៕