ក្រសួងធនធានទឹក៖ ថ្ងៃអុំទូក ភ្នំពេញមានភ្លៀងធ្លាក់ពេលយប់ និងមានខ្យល់ខ្លាំង

ជាតិ

ក្រសួងធនធានទឹក៖ ថ្ងៃអុំទូក ភ្នំពេញមានភ្លៀងធ្លាក់ពេលយប់ និងមានខ្យល់ខ្លាំង

01, Nov 2017 , 7:59 am

រូបភាព

ដោយ:

រាជធានីភ្នំពេញ ចាប់ពីថ្ងៃទី២-៤ ខែវិច្ឆិកា ដែលជាថ្ងៃប្រារព្ធព្រះរាជពិធីបុណ្យអុំទូក អាចនឹងមានភ្លៀងធ្លាក់នៅពេលយប់។នេះបើតាមការព្យាកររបស់ក្រសួងធនធានទឹក និងឧតុនិយម ដែលបន្តថា បណ្តាខេត្តនានា ពិសេសតំបន់ទំនាបកណ្ដាលភាគខាងត្បូង និងភាគខាងកើត(ជាប់វៀតណាម) មានភ្លៀងធ្លាក់ ពីថ្ងៃទី៣១ ខែតុលា ដល់ថ្ងៃទី២ ខែវិច្ឆិកា ខណៈតំបន់មាត់សមុទ្រ ពិសេសខេត្តកំពត កែប និងព្រះសីហនុវិញ ក៏មានភ្លៀងធ្លាក់ដែរ នៅថ្ងៃទី២ និងទី៣ ខែវិច្ឆិកា។ មូលហេតុ បើក្រសួងជំនាញដដែល គឺបណ្តាលមកពីខ្យល់មូសុងឦសានដែលកំពុងបង្កើនឥទ្ធិពល និងវិសម្ពាធទាបដែលកំពុងកើតឡើងនៅក្នុងសមុទ្រចិនខាងត្បូង។

បណ្តាខេត្តនានា ពិសេសនៅតំបន់ទំនាបកណ្ដាលភាគខាងត្បូង និងភាគខាងកើត (ជាប់វៀតណាម)។ ដោយឡែកនៅរាជធានីភ្នំពេញ ពីថ្ងៃទី២-៤ ខែវិច្ឆិកា ដែលជាថ្ងៃប្រារព្ធព្រះរាជពិធីបុណ្យអុំទូកតែម្តង នៅពេលយប់ អាចនឹងមានភ្លៀងធ្លាក់ពីតិចទៅមធ្យម ហើយមានខ្យល់ខ្លាំង និងសីតុណ្ហភាពអប្បបរមាក្នុងរង្វង់ ២២ អង្សាសេ។ នៅតំបន់មាត់សមុទ្រ ពិសេស ខេត្តកំពត កែប និងព្រះសីហនុវិញ ក៏មានភ្លៀងធ្លាក់ដែរ នៅថ្ងៃទី២ និងទី៣ ខែវិច្ឆិកា ខណៈនៅលើផ្ទៃសមុទ្រ មានភ្លៀងលាយឡំខ្យល់បក់បោកខ្លាំង។

បើតាមការផ្សាយក្រសួងធនធានទឹក និងឧតុនិយម នៅថ្ងៃទី៣១ ខែតុលា កម្ពុជា បាននិងកំពុង ទទួលរបបខ្យល់មូសុងឦសាន។ ខ្យល់ឦសាននេះ នឹងបង្កើនឥទ្ធិពលខ្លាំង ចាប់ពីថ្ងៃទី២ ដល់ថ្ងៃទី៤ ខែវិច្ឆិកា ដែលមានល្បឿនពី៥ ទៅ៨ម៉ែត្រក្នុង១វិនាទី ខណៈដែលនៅក្នុងសមុទ្រចិនខាងត្បូងឯណោះវិញ មានវិសម្ពាធទាបមួយបានកើតឡើង ហើយវានឹងធ្វើដំណើរចូលមកប៉ែកខាងក្រោមឈូងសមុទ្រថៃ។

តាមក្រសួងធនធានទឹក លក្ខណៈបែបនេះ នឹងធ្វើឲ្យអាកាសធាតុនៅកម្ពុជា នឹងមានភ្លៀងធ្លាក់ ពីថ្ងៃទី៣១ ខែតុលា ដល់ថ្ងៃទី២ ខែវិច្ឆិកា នៅតាមបណ្តាខេត្តនានា ពិសេសនៅតំបន់ទំនាបកណ្ដាលភាគខាងត្បូង និងភាគខាងកើត (ជាប់វៀតណាម)។ ដោយឡែកនៅរាជធានីភ្នំពេញ ពីថ្ងៃទី២-៤ ខែវិច្ឆិកា ឆ្នាំដែលជាថ្ងៃប្រារព្ធព្រះរាជពិធីបុណ្យអុំទូកតែម្តង នៅពេលយប់ អាចនឹងមានភ្លៀងធ្លាក់ពីតិចទៅមធ្យម មានខ្យល់ខ្លាំង និងសីតុណ្ហភាពអប្បបរមាក្នុងរង្វង់ ២២ អង្សាសេ។

នៅតំបន់មាត់សមុទ្រ ពិសេស ខេត្តកំពត កែប និងព្រះសីហនុវិញ ក៏មានភ្លៀងធ្លាក់ដែរ នៅថ្ងៃទី២ និងទី៣ ខែវិច្ឆិកា ខណៈនៅលើផ្ទៃសមុទ្រ មានភ្លៀងលាយឡំខ្យល់បក់បោកខ្លាំង។ ក្រសួងបានអំពាវនាវដល់ប្រជានេសាទ និងអ្នកធ្វើដំណើរតាមសមុទ្រ ឲ្យប្រុងប្រយ័ត្នឲ្យខ្ពស់ ដើម្បីចៀសវាងគ្រោះថ្នាក់ផ្សេងៗដែលអាចកើតឡើង៕