ជាតិ
សេដ្ឋកិច្ច
កម្ពុជានាំចេញសត្វគោប្រហែល ២ម៉ឺនក្បាលក្នុងមួយខែទៅវៀតណាម
× ភ្នំពេញ៖ កម្ពុជាបាននាំចេញគោរស់ប្រហែល ២ម៉ឺនក្បាលក្នុងមួយខែៗ ចូលប្រទេសវៀតណាម។ នេះបើតាមមន្ត្រីក្រសួងកសិកម្ម រុក្ខាប្រមាញ់ និងនេសាទ។
លោក សេន សុវណ្ណ អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម បានឲ្យដឹងថា វៀតណាមជាទីផ្សារទីមួយរបស់កម្ពុជាចំពោះការនាំចេញសត្វគោរស់។ លោក សេន សុវណ្ណ ត្រូវបានដកស្រង់សំដីដោយសារព័ត៌មានខ្មែរថាម កាលពីសប្ដាហ៍មុនយ៉ាងដូច្នេះថា៖«យើងមិនមានតួលេខច្បាស់លាស់នោះទេ ប៉ុន្តែបើតាមមន្ត្រីរបស់ប្រទេសវៀតណាម គឺគោរស់ប្រហាក់ប្រហែល ២ម៉ឺនក្បាល កំពុងត្រូវបាននាំចូលពីកម្ពុជាទៅវៀតណាមជារៀងរាល់ខែ»។
រីឯប្រទេសថៃ ទំនងជាទីផ្សារទី២សម្រាប់ការនាំចេញគោរបស់កម្ពុជា។ នេះបើតាមលោក សេន សុវណ្ណ ប៉ុន្តែលោកមិនអាចបញ្ជាក់ពីតួលេខនាំចេញទៅទីផ្សារមួយនេះបាននោះទេ។
បើតាមលោក សេន សុវណ្ណ កម្ពុជាកំពុងត្រូវការវិស័យឯកជន វិនិយោគលើការចិញ្ចឹមគោលក្ខណៈពាណិជ្ជកម្ម។
ទោះបីជាមានតម្រូវការនាំចេញដូចការអះអាងខាងលើយ៉ាងណាក៏ដោយ តែការចិញ្ចឹមគោលក្ខណៈគ្រួសារហាក់មិនសូវអំណោយផលនោះទេ។ តម្លៃគោរស់បានចុះថោក ក្នុងរយៈពេលប៉ុន្មានឆ្នាំចុងក្រោយនេះ ដែលធ្វើឲ្យកសិករមួយចំនួនបានបោះបង់មុខរបរនេះ៕
© រក្សាសិទ្ធិដោយ thmeythmey.com