សម្រាប់ម្តាយ កូនអាយុច្រើនប៉ុណ្ណាក៏ដោយ ប៉ុន្តែគេនៅតែជាក្មេងតូចដ៏គួរឲ្យស្រឡាញ់។ លោក Tom Keating អាយុ៨០ឆ្នាំ បានទៅរស់នៅមណ្ឌលថែទាំជនចាស់ជរា Moss View ក្នុងតំបន់ Huyton ក្រុងលីវើភូល ដោយ លោ កត្រូវការជំនួយ និងការថែទាំបន្ថែម។ មួយឆ្នាំក្រោយមក លោកយាយ Ada ដែលមានវ័យ៩៨ឆ្នាំ បានសម្រេចប្តូរ ទីលំនៅទៅកាន់ទីនោះផងដែរ ក្រោមហេតុផលថា មានឱកាសមើលថែទាំកូនប្រុសច្បងរបស់ខ្លួន។ នេះបើតាមការផ្សាយរបស់សារព័ត៌មាន Liverpool Echo។
លោកយាយ Ada Keating និងកូនប្រុស Tom Keating មានគម្លាតអាយុគ្នា១៨ឆ្នាំ។ លោក Tom ត្រូវបានចាត់ទុកជាកូនប្រុសម្នាក់ដ៏មហាសំណាង ពីព្រោះនៅតែទទួលបានការថ្នាក់ថ្នមដោយផ្ទាល់ពីម្តាយ បើទោះបីជាខ្លួនមានអាយុ៨០ឆ្នាំទៅហើយក្តី។ ដោយមិនចង់ឃើញកូនលំបាក លោកយាយ Ada អាយុ៩៨ឆ្នាំ បានប្តូរលំនៅដ្ឋានពីតំបន់ Wavertree ទៅរស់នៅមណ្ឌលចាស់ជរា Moss View ក្នុងតំបន់ Huyton ក្រុងលីវើភូល។
នៅក្នុងមណ្ឌលចាស់ជរា លោកយាយ Ada មានឱកាសជាច្រើននៅជាមួយលោកតា Tom ដែលជាកូនប្រុស ដោយពួកគេអាចលេងហ្គេមជាមួយគ្នា មើលទូរទស្សន៍រួមគ្នា។ ក្នុងបទសម្ភាសជាមួយ Liverpool Echo លោកយាយ បានមានប្រសាសន៍ថា៖ «ខ្ញុំតែងតែទៅដល់បន្ទប់របស់ Tom ដើម្បីនិយាយថា រាត្រីសួស្តី ហើយពេលព្រឹក ថា អារុណសួស្តី រួមទាំងហៅញ៉ាំអាហារពេលព្រឹក»។
លោកយាយបានបន្ថែមថា លោកតា Tom តែងតែដើរតាមគាត់ជានិច្ច ហើយក៏មើលថែទាំគាត់វិញផងដែរ។ លោកតា Tom បានអះអាងថា គាត់ពិតជាសប្បាយរីករាយខ្លាំងណាស់ដែលមានឱកាសនៅជាមួយម្តាយ និងទទួលបានការថែទាំបន្តទៀតពីគាត់។
លោកយាយ Ada និងលោកតា Harry ដែលជាស្វាមី មានកូន៤នាក់ រួមមាន Tom, Barbara, Margi និង Janet ដោយកូនពៅស្លាប់តាំងពីអាយុ១៣ឆ្នាំ។ នៅមុនចូលនិវត្តន៍ លោក Tom គឺជាអតីតវិចិត្រករ និងជាអ្នកជំនាញផ្នែកតុបតែងម្នាក់នៅក្រុមហ៊ុនឯកជន រីឯលោកយាយ Ada ជាអតីតគិលានុបដ្ឋាយិកា។
លោកតា Tom មិនដែលបានរៀបការនោះឡើយ ហើយគាត់តែងតែនៅជាមួយលោកយាយ Ada ដើម្បីមើលថែទាំគាត់ មុនពេលចេញទៅរស់នៅមណ្ឌលថែទាំជនចាស់ជរា Moss View ក្នុងតំបន់ Huyton ក្រុងលីវើភូល។ ដោយសារតែយល់ថា កូនប្រុសមានសុខភាពហាក់ដូចជាទ្រុឌទ្រោមជាងខ្លួន លោកយាយ Ada បានសម្រេចចិត្តដូរទីលំនៅដើម្បីតាមមើលថែទាំកូន។
ដូចជា Debi Higham ដែលជាចៅស្រីម្នាក់របស់លោកយាយ Ada ផងដែរ លោក Philip Daniels ប្រធានមណ្ឌល Moss View បានបង្ហាញពីក្តីរំភើបរបស់ខ្លួនចំពោះទំនាក់ទំនងម្តាយកូនទាំងពីរ។ លោកបានអះអាងផងដែរថា នេះជាករណីលើកដំបូងបំផុតដែលម្តាយ និងកូន រស់នៅក្នុងមណ្ឌលចាស់ជរាជាមួយគ្នា។
លោក Philip រំភើបយ៉ាងខ្លាំងចំពោះសម្តីរបស់លោកយាយ Ada ដែលថា៖ «អ្នកមិនអាចបញ្ឈប់តួនាទីជាម្តាយរបស់ខ្លួននោះឡើយ»៕