កីឡាជាតិ
ជាតិ
AFC U19៖ វៀតណាម និងអារ៉ាប់រួមអេមីរ៉ាត ទៅវគ្គបន្ត ខណៈកម្ពុជានៅតែចាំអ៊ុតឱកាស
× ការប្រកួតពូលផ្សេងៗវគ្គជម្រុះ AFC U19 Championship ឆ្នាំ២០១៨ ត្រូវបញ្ចប់នៅថ្ងៃពុធ ទី៨ ខែវិច្ឆិកា នេះ ដោយពូលមួយចំនួនរកឃើញក្រុមដែលត្រូវឈានទៅវគ្គ ហើយក្រុមដែលត្រូវហាលអាវផងដែរ។ សម្រាប់ U19 កម្ពុជា ពួកគេនៅតែចាំមើលឱកាសរបស់ខ្លួនក្នុងចំណោមក្រុមលេខ២ឆ្នើម។
ជាមួយនឹងការប្រកួតមួយលើកដែលនៅសេសសល់ ក្រុម U19 អារ៉ាប់រួមអេមីរ៉ាត់ និងវៀតណាម ទទួលកៅអីទៅកាន់ការប្រកួតជុំចុងក្រោយនៅប្រទេសឥណ្ឌូណេស៊ី ដោយស្វ័យប្រវត្តិ ដោយពួកគេក្តោបជាប់ចំណាត់ថ្នាក់លេខ១ក្នុងពូល A និងពូល H រៀងៗខ្លួន។
អារ៉ាប់រួមអេមីរ៉េត និងវៀតណាម ត្រូវរួមដំណើរជាមួយចិន និងម្ចាស់ផ្ទះឥណ្ឌូណេស៊ី សម្រាប់ការប្រកួតជុំចុងក្រោយចន្លោះពីថ្ងៃទី១៨ ខែតុលា ដល់ថ្ងៃទី៤ ខែវិច្ឆិកា ឆ្នាំ២០១៨ ខាងមុខ។
ដោយសារតែម្ចាស់ផ្ទះឥណ្ឌូណេស៊ី មិនមានពិន្ទុគ្រប់គ្រាន់ក្នុងការបញ្ចប់ចំណាត់ថ្នាក់លេខ១ ឬលេខ២នៅក្នុងពូល F ចំនួនក្រុមលេខ២ឆ្នើម ដែលត្រូវរួមដំណើរជាមួយម្ចាស់កំពូលតារាងនៃពូលនីមួយៗ នឹងមានតែ៥ប៉ុណ្ណោះ។
សម្រាប់ការប្រៀបធៀបតារាងលេខពីរឆ្នើម សហព័ន្ធកីឡាបាល់ទាត់ទ្វីបអាស៊ី (AFC) ធ្វើការស៊ីសងគ្នាតែរវាង៣ក្រុមកំពូលប៉ុណ្ណោះ ដើម្បីឲ្យស្មើភាពសម្រាប់ពូលដែលមាន៥ក្រុម និងពូលខ្លះមានតែ៣ក្រុម។
កម្ពុជាស្ថិតក្នុងចំណាត់ថ្នាក់លេខ២នៅក្នុងពូល G បន្ទាប់ពីចិន ហើយពិន្ទុដែលកម្ពុជាត្រូវប្រៀបធៀបជាមួយលេខ២ពូលផ្សេងទៀតនោះ គឺ ៣ពិន្ទុ (+០) ដោយផ្អែកលើលទ្ធផលចាញ់ចិន ១-០ និងឈ្នះមីយ៉ាន់ម៉ា ៣-២ រីឯលទ្ធផលស្មើ ០-០ ជាមួយហ្វីលីពីន មិនត្រូវបានរាប់បញ្ចូលនោះឡើយ។
ផ្ទុយពីម្ចាស់ផ្ទះឥណ្ឌូណេស៊ី ចិន អារ៉ាប់រួមអេមីរ៉ាត និងវៀតណាម ដែលទទួលបានកៅអីស្វ័យប្រវត្តិទៅកាន់ជុំចុងក្រោយ ក្រុមដែលហាលអាវដោយស្វ័យប្រវត្តិរួមមាន ណេប៉ាល់ (ពូល A), បង់ក្លាដែស ម៉ាល់ឌីវ ស្រីលង្កា (ពូល B), លីបង់ (ពូល C), ឥណ្ឌា តួកមេនីស្ថាន (ពូល D), ប៉ាឡេស្ទីន (ពូល E), ទីម័រខាងកើត ព្រុយណេ (ពូល F), មីយ៉ាន់ម៉ា ហ្វីលីពីន (ពូល G), ឡាវ (ពូល H), សិង្ហបុរី ម៉ុងហ្គោលី (ពូល I) និង ហុងកុង (ពូល J)។ ដោយឡែក អាហ្វហ្គានីស្ថាន និងកោះ Northern Mariana Islands បានដកខ្លួនចេញមុនការប្រកួត៕
© រក្សាសិទ្ធិដោយ thmeythmey.com