អន្តរជាតិ
នយោបាយអន្តរជាតិ
ស៊ី ជិនភីង និងដូណាល់ ត្រាំ ត្រៀមចុះកិច្ចព្រមព្រៀងពាណិជ្ជកម្មទំហំប្រហែល ២៨០ពាន់លានដុល្លារ
រូបភាព៖ AFP
×![]()
ដោយ: ថ្មីៗ
ប្រធានាធិបតីចិនលោក ស៊ី ជិនភីង និងប្រធានាធិបតីអាមេរិកលោក ដូណាល់ ត្រាំ ធ្វើជាអធិបតីភាពនៃការចុះកិច្ចព្រមព្រៀងពាណិជ្ជកម្មដែលមានទំហំរហូតដល់ ២៨០ពាន់លានដុល្លារនៅថ្ងៃព្រហស្បតិ៍ទី ៩ ខែវិច្ឆិកា។ វានឹងក្លាយជាដំណើរទស្សនកិច្ចមួយដ៏មានផ្លែផ្ការបស់ប្រធានាធិបតីអាមេរិកនៅចិនផងដែរ។
កិច្ចព្រមព្រៀងដែលមានទំហំរហូតដល់ ២៨០ពាន់លានដុល្លារនឹងត្រូវចុះរួមគ្នារវាងអាមេរិក និងចិន ក្រោមអធិបតីភាពលោក ដូណាល់ ត្រាំ និងសមភាគីចិនលោក ស៊ី ជិនភីងនៅថ្ងៃព្រហស្បតិ៍នេះ។ នេះបើតាមការផ្សាយរបស់សារព័ត៌មាន South China Morning Post ដែលស្រង់សម្តី មន្ត្រីដែលបានឃើញបញ្ជីកិច្ចព្រមព្រៀងពាណិជ្ជកម្មផ្ទាល់។
សារព័ត៌មានដដែលផ្សាយថា កិច្ចព្រមព្រៀងដែលចិនត្រូវចុះរួមគ្នាជាមួយអាមេរិកនោះគ្របដណ្តប់លើវិស័យជាច្រើនមានតាំងពីការរុករកប្រេងរួមគ្នា បើករោងចក្រដំឡើងនិងផលិតផ្នែកនៃរថយន្ត និងបច្ចេកវិទ្យាជាដើម
តួយ៉ាងក្រុមហ៊ុនប្រេងរដ្ឋចិន Sinopec នឹងចុះហត្ថលេខាលើកិច្ចព្រមព្រៀងរុករកប្រេងរួមគ្នានៅរដ្ឋអាឡាស្កាជាមួយក្រុមហ៊ុនអាមេរិក។ ចំណែកក្រុមហ៊ុនថាមពល China National Petroleum Corp នឹងចុះហត្ថលេខាជាមួយក្រុមហ៊ុន Cheniere Energy ដើម្បីធានាការផ្គត់ផ្គង់ឧស្ម័នធម្មជាតិ។ដោយឡែក ក្រុមហ៊ុនទូរសព្ទ Xiaomi និង Vivo របស់ចិននឹងចុះកិច្ចព្រមព្រៀងទិញផលិតផលពីក្រុមហ៊ុនទូរគមនាគមន៍អាមេរិក Qualcomm ផងដែរ។
កាលពីថ្ងៃពុធម្សិលមិញ ក្រុមហ៊ុនអាមេរិក និងចិន បានចុះកិច្ចព្រមព្រៀងរួមគ្នាដែលមានទំហំ ៩ ពាន់លានដុល្លាររួចទៅហើយ។
បើសិនជាកិច្ចព្រមព្រៀងដែលត្រូវបានគេរៀបរាប់ខាងលើនេះនឹងត្រូវចុះហត្ថលេខា មែននោះ វានឹងក្លាយជាដំណើរទស្សនកិច្ចដ៏មានផ្លែផ្កាបំផុតរបស់ប្រធានាធិបតីអាមេរិកនៅចិន។ វាចំណេញដល់ក្រុមហ៊ុនចិន និងក្រុមហ៊ុនអាមេរិក ហើយវាក៏បង្ហាញឲ្យឃើញពីឆន្ទៈរបស់ភាគីទាំងពីរក្នុងការបង្រួមអតុល្យភាពពាណិជ្ជកម្មទ្វេភាគីដែលចិនចំណេញច្រើននោះ។
ពាក់ព័ន្ធពាណិជ្ជកម្មទ្វេភាគីនេះ កាលពីថ្ងៃអង្គរដ្ឋបាលពន្ធគយចិនបានបញ្ចេញរបាយការណ៍ដែលបង្ហាញចិនចំណេញបាន ២៦,៦ ពាន់លានដុល្លារពីពាណិជ្ជកម្មជាមួយអាមេរិកគ្រាន់តែក្នុងខែតុលាមួយប៉ុណ្ណោះ៕
Tag:
ដូណាល់ ត្រាំ
ស៊ី ជិនភីង
ចិន
អាមេរិក
© រក្សាសិទ្ធិដោយ thmeythmey.com
